Paali, Biblu kavi owe whenuho tọn depope ma dohia dọ onú mọnkọ jọ.

Aliho he mẹ wefọ ehe yin lilẹdogbedevomẹ te to Biblu susu mẹ nọ zọ́n bọ mẹdelẹ nọ lẹndọ to ojlẹ Paulu tọn mẹ, baptẹm osin tọn nọ yin yíyí do oṣiọ lẹ tamẹ. Di apajlẹ, Biblu Gun Alada dọ dọ: “Etẹ wẹ yé he yè baptizi na oṣiọ lẹ wutu na wà, eyin oṣiọ lẹ ma tite lala?”

Etomọṣo, doayi nue weyọnẹntọ Biblu tọn awe delẹ dọ go. Weyọnẹntọ Gregory Lockwood dọ dọ, “kunnudenu whenuho tọn kavi Owe-wiwe tọn depope ma tin he nọgodona linlẹn lọ dọ baptẹm nọ yin yíyí do mẹhe ko kú lẹ tamẹ.” Mọdopolọ, Weyọnẹntọ Gordon D. Fee wlan dọmọ: “Whenuho kavi Biblu ma donù baptẹm mọnkọ de go pọ́n. Alẹnu Yọyọ uwọ ma tlẹ dọho de gbọn finẹ paali; podọ kunnudenu depope ma tin he dohia dọ Klistiani dowhenu tọn lẹ kavi ṣọṣi he yin didoai ojlẹ kleun de to okú apọsteli lẹ tọn godo depope wà onú mọnkọ.”

Biblu dọ dọ hodotọ Jesu tọn lẹ dona ‘hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé bo nọ plọn yé nado payi nuhe’ ewọ ko degbe etọn lẹpo go. (Mat. 28:19, 20) Whẹpo mẹde nido lẹzun devi he yí baptẹm de, e dona plọnnu gando Jehovah po Visunnu Etọn po go, do yise hia to yé mẹ bosọ setonuna yé. Mẹhe ko kú bo to yọdò mẹ ma gán wàmọ; mọ Klistiani he tlẹ to ogbẹ̀ de ma gán wàmọ do otẹn etọn mẹ.—Yẹwh. 9:5, 10; Joh. 4:1; 1 Kọl. 1:14-16.

Eyin mọ wẹ, etẹ na dọ wẹ Paulu te taun?

Kọlintinu delẹ ma kẹalọyi dọ oṣiọ lẹ na yin finfọnsọnku. (1 Kọl. 15:12) Paulu jẹagọdo pọndohlan enẹ. E dọ dọ ‘egbesọegbesọ wẹ emi nọ pannukọn okú.’ Nugbo wẹ dọ, e gbẹ́ pò to ogbẹ̀. Amọ́, mahopọnna ninọmẹ owù tọn he mẹ e to jujugbọn, e kudeji dọ to okú emitọn godo, emi na yin finfọnsọnku nado nọgbẹ̀ to olọn mẹ, taidi Jesu.—1 Kọl. 15:30-32, 42-44.

Kọlintinu lẹ dona yọnẹn dọ mẹyiamisisadode de na nọ pehẹ nuhahun lẹ egbesọegbesọ bo nasọ kú whẹpo do wá yin finfọn. Nado “yin bibaptizi to Klisti Jesu mẹ” zẹẹmẹdo nado yin “bibaptizi to okú etọn mẹ.” (Lom. 6:3) Baptẹm yẹhiadonu tọn yetọn na zọ́n bọ yé na pehẹ nuhahun lẹ bo kú bo nasọ yin finfọn do olọn mẹ.

Hugan owhe awe to whenue Jesu ko yí baptẹm to osin mẹ godo, e dọna awe to apọsteli etọn lẹ mẹ dọmọ: “Mì na yin bibaptizi po baptẹm he yè to yíyí do baptizi mi lọ po.” (Malku 10:38, 39) To whenue Jesu to mọdọ, e ma to osin mẹ bo to baptẹm yí. Amọ́, nue dọ e te wẹ yindọ gbẹzan tenọgligo-hinhẹn tọn emitọn na dekọtọn do okú mẹ na emi. Paulu dọ dọ mẹyiamisisadode lẹ na “jiya dopọ hẹ ẹ, na [yé] nido yin gigopana dopọ hẹ ẹ ga.” (Lom. 8:16, 17; 2 Kọl. 4:17) Enẹwutu, yelọsu dona kú nado yin finfọn do ogbẹ̀ to olọn mẹ.

Po ehe po, e sọgbe dọ nue Paulu dọ ni yin lilẹ́ dole: “Eyin e ma yinmọ, etẹwẹ mẹhe to yinyin bibaptizi na lẹndai lọ nado yin oṣiọ lẹ na wà? Eyin oṣiọ lẹ ma na yin finfọn paali, naegbọn yewlẹ ga do to yinyin bibaptizi na lẹndai mọnkọtọn?”