Nanga, chiro Ebiblia changwa engani birhasaga derha oku ebili nk’ebyola byaliri byajirika.

Okuntu olula lwandiko lunasomwa omu Biblia zinene kwarhumire bantu baguma bawaza oku omu mango ma Paulo hali Abakristu baliri babatizwa ahali h’abantu bafire. Omufano: “Sasa akaba harhakaba obufuke, bichi abanabatizwa ahali h’abantu bafire nji bajira?”​—New International Version.

Chiro akaba ntyo, yunva ebi basomi babiri b’Ebiblia baderhere. Dr. Gregory Lockwood aliderhere oku chiro ntacho n’echiguma omu Biblia changwa omu ngani chiyerekene ok’okuderha mp’omuntu abatizwe “ahali h’olala wafire byachigerere kuba chiro haba n’akatyu.” Konako, Profesere Gordon D. Fee aliyandikire ntya: “Ntaho omu Biblia changwa omu ngani haderhere obubatizo buli nk’obola. Endagano Mpyahya erhabuderhereko chiro; na ntacho chiyerekene oku echili nk’echola chachigerere kujirika oku Bakristu ba burhanzi changwa omu madini marhonderaga mira entumwa ziyusa kufa.”

Ebiblia ederhere oku abanafunzi ba Yesu balikwanene ‘bajire abanafunzi kurhenga omu bantu b’amashanja moshi, bababatize . . . , n’okubayigiriza kujira byoshi’ Yesu ahemere. (Mt. 28:19, 20) K’okuderha oku embere omuntu abe mwanafunzi wa Yesu obatizwe, alikwanene ayige, ayemere anakenge Yehova n’Omugala. Owafire okala ali omu shinda ntako byakashobokene ajire ntyo; changwa mp’Omukristu ochilamire ajire ntyo ahali hage.​—Muh. 9:5, 10; Yoh. 4:1; 1 Ko. 1:14-16.

Sasa si, bichi Paulo aliri aderha?

Omu Bakristu b’Ekorinto hali abaliri bahakana oku abafire barhakafuka. (1 Ko. 15:12) Paulo aja ahwanza abalahiza amola mawazo. Ayerekana oku yewe ‘anahurana n’olufu buli lusiku.’ Omu bukweri, Paulo alichilamire. Aliko chiro akaba ebibazo byoshi aliri ahurana nabyo, alichizerere oku enyuma w’okufa alikwanene kufulwa anaba chilemwa ch’eroho chiherhe emisi, kuguma nk’okubyaberaga Yesu naye.​—1 Ko. 15:30-32, 42-44.

Abakorinto balikwanene bamenye ok’okuba Bakristu bashigwa, kuderhere oku balikwanene bahurane ebibazo buli lusiku banafe embere bafulwe. “Okubatizwa muli Kristu Yesu” kw’alihirirwe “m’okubatizwa omu lufu lwage.” (Ro. 6:3) Obola bubatizo b’omufano bulonzeze kuderha oku balikwanene bahurane ebibazo byabageza oku lufu nya lufu, na buzinda banafuka banaja embingu.

Hali hamagera myaka erhalwise ebiri Yesu amalire kubatizwa, abwira babiri omu ntumwa zage ntya: “Obubatizo indi nabatizwamo, bu nenyu mwabatizwamo.” (Mk. 10:38, 39) Ahola Yesu arhaliza kubatizwa omu menji. Aliri aderha oku akalamo k’obwimana ali alama kakamugezeze oku lufu nya lufu. Paulo aliyandikire oku abashigwa nabo balikwanene “balibuke haguma, naho [bagale] kukuzwa haguma.” (Ro. 8:16, 17; 2 Ko. 4:17) Che chirhumire nabo balikwanene bafe yi bafulwa baje kulama embingu.

M’okola kon’okola ebinwa bya Paulo byakashuba kuderhwa ntya: “Omu kwindi, bichi balala bali babatizwa omu muhigo g’okuba bafu nji bajira? Akaba abafire barhakafuka chiro, bulagurhe yibaja babatizwa n’omuhigo guli nk’ogola?”