Kako, mena rokutja Ombeibela poo omambo warwe womakuruhungi kaye raisa kutja Ovakriste aave papitisiwa mena rovakoke.

Omuano ezeva ndi mu ra torokwa mOzombeibela ozengi tja tjita kutja ovandu tjiva ve mune kutja Ovakriste veserewondo etenga aave papitisiwa mena rovakoke. Otjotjihorera, Ozombeibela tjiva ze tja: “Imba, mbe papetisirua ovakoke, mave tjitire tjike, ovakoke tji ve hi na pu mave penduka?”—Etestamente Epe nOmapsalme.

Ngatu tare ku imbi Ovakonḓonone vOmbeibela mbi va hungira. Omukonḓonone wOmbeibela Dr. Gregory Lockwood wa tja, kape notjiraisiro mOmbeibela poo momambo womakuruhungi tji tji raisa kutja ovandu aave papitisiwa mena rovakoke. Omukonḓonone warwe, Professor Gordon D. Fee wina wa tjanga kutja, kape notjihorera mOmbeibela poo momambo womakuruhungi nge hungira ohunga nombapitisimo otja indjo. Eye wa tja otjiṋa ho katji yarora okutamunwa mEtestamente Epe nu kape notjiṋa tji tji raisa kutja Ovakriste veserewondo etenga, poo ozokereka nḓa utwa kombunda ya indu ovaapostele tji va ṱa kutja aave tjiti otjiṋa ho.

Ombeibela i tja ovakongorere va Jesus aave ‘sokuyenda koviwaṋa avihe ngamwa akuhe ve kaise po ovandu ovahongewa ve amave ve papitisa . . . . Nu ve ve honge okuṱakamisa oviṋa avihe mbye ve raera.’ (Mat. 28:19, 20) Omundu ngunda e hiya rira omuhongewa ngwa papitisiwa, eye ma hepa okurihonga okukara nongamburiro nonḓuviro ku Jehova nOmuna we. Omukoke kamaa yenene okutjita oviṋa mbyo, nu wina omunamuinyo kamaa tjitire mena re.—Omuzuv. 9:5, 10; Joh. 4:1; 1 Kor. 1:14-16.

Hapo Paulus aa hee tjike?

Ovandu tjiva moKorinte kaave kambura kutja ovaṱi mave kapendurwa. (1 Kor. 15:12) Omomuano uṋe Paulus meeve raisira kutja oumune wawo wa ri posyo? Eye wa ṋunisa kutja aruhe aa “kara moumba wonḓiro.” Otjingaperi kutja oruveze ndwo ngunda wa ri nomuinyo. Eye wa kahurura kutja wa ri moumba wonḓiro eyuva arihe, posi yokutja wa ri nongamburiro kutja kombunda yonḓiro eye ma kapendurwa tjimuna Jesus okukahupa meyuru.—1 Kor. 15:30-32, 42-44.

Ovakambure moKorinte aave hepa okutjiwa kutja Ovakriste ovatwirisiwa mave sokutuurunga omarorero nonḓiro ngunda ave hiya pendurwa komuinyo. Kunao ‘okupapitisiwa mu Kristus Jesus’ ku heya ‘okupapitisiwa monḓiro ye.’ (Rom. 6:3) Ihi matji hee kutja owo mave sokutuurunga omauzeu nonḓiro tjimuna Jesus kutja ve pendurwe okukahupa meyuru.

Kombunda yozombura mbari indu Jesus tja za nokupapitisiwa, eye wa raera ovaapostele ve vevari omambo nga: “Mamu papitisiwa nombapitisimo Ami ndji me papitisiwa na yo.” (Mar. 10:38, 39) Imbo Jesus ka hee kutja ma papitisiwa nomeva. Nungwari a hee kutja ouṱakame we ku Mukuru mau twara konḓiro ye. Paulus wa tjanga kutja ovatwirisiwa mbu mave kara ‘norupa momahihamisiro wa Kristus, wina mave kara norupa mondjozikiro ye.’ (Rom. 8:16, 17; 2 Kor. 4:17) Kunao, owo wina mave sokuṱa kutja ve pendurwe okukahupa meyuru.

Omambo wa Paulus ngo oyeni ye tja: “Tjinangara ovaṱi kave nokupendurwa, nu hapo tjike na imba mbe papitisiwa nondando yokukoka? Nu indu ovaṱi tji ve hi nokupendurwa, ongwaye owo tji ve muna ombapitisimo ndjo?”