Ari. Awan tu mabibbig ta Biblia onu ta libru ira na historia nga kingngua yatun na Cristiano ira.

Tanakuan i pinangitransleyt na aru nga Biblia tatun nga teksto. Yayya nga egga karuan nga nannono nga nappabawtiso ta danum i Cristiano ira ta kaggawan ni Pablo para ta natay ira. Angngariganna, kunnaw i mabibbig ta I Bagu nga Pakkasinabban Anna Salmo Ira: “Nu kurug tu ari noka nga maginnolay i natay ira, ngatta ta egga i mappabawtiso megafu ta natay?”

Ngem sifutan i komento na dua nga iskolar na Biblia. Kagian ni Dr. Gregory Lockwood nga awan tu ebidensia ta Biblia onu ta historia nga egga i maski sinni nga nappabawtiso para ta natay nga tolay. Umanugu gapa si Professor Gordon D. Fee nga awan tu rekord ta Biblia onu ta historia na kunnaw nga kabawtiso. Kagianna nga ari vuluvuga mabibbig ta New Testament yatun anna awan tu pamakurug nga kingngua yatun na ollu-siglo ira nga Cristiano onu na maski anni nga relihion nga nabuu kabalin nga natay i apostol ira.

Kinagi na Biblia nga zinog ni Jesus danuri gumattuttulna: “Umay kamu gafu ta ngamin nga totolay ta ngamin nga lugu-lugar anna pabbalinan nu ira tu disipulò. Bawtisowan nu ira . . . Tudduan nu ira tu parulattad-da ngamin i bili-bilik-ku nikamu.” (Mat. 28:19, 20) Nige mabawtisowan i tadday nga disipulo, kawaganna nga gigiammuan, kurugan, anna tuttulan si Jehova anna si Jesus. Ari nga makua yatun na tadday nga natay ngana onu egga ta attanamman. Ari gapa awayya nga kuan yatun na sigga-matolay nga Cristiano para nisa.​—Ecl. 9:5, 10; Juan 4:1; 1 Cor. 1:14-16.

Anni gafu i kayà kagian ni Pablo?

Ari nga mangurug i karuan nga taga-Corinto nga maginnolay noka i natay ira. (1 Cor. 15:12) Ngem pinakurug ni Pablo nga mali yatun. Kinagina nga maski nu sigga-matolay paga yayya, ‘kagaggaw nga inarubanna i patay.’ Kayà kagian ni Pablo nga maski nu kagaggaw nga mappeligro i inangona, siguradu yayya nga mapaginnolay yayya noka ta langi sonu matay yayya gittana nesimmu kani Jesus.​—1 Cor. 15:30-32, 42-44.

Mawag gafu nga malippawa na taga-Corinto ira nga megafu ta nazelugan ira nga Cristiano, talaga meparubang ira kanayun ta kapurueba anna mawag tu matay ira nige nga mapaginnolay. Yayya nga oras tu ‘mabawtisowan ira nga netadday kani Cristo Jesus, nabawtisowan gapa ira nga netadday ta patena.’ (Roma 6:3) Kebalinan natun nga gitta ni Jesus, maka-ekspiriensa ira tu kapurueba tapus matay ira tapenu mapaginnolay mappange ta langi.

Maturu tu dua ragun kabalin na bawtismo ni Jesus ta danum, kinagina ta dua nga apostolna: “Mabawtisowakkamu noka ta kabawtisowakku.” (Mar. 10:38, 39, NW) Turi ta kinagi yatun ni Jesus, arianna nga tukuyan i nikabawtisona ta danum. Kayàna kagian nga matay yayya megafu ta kinamatalona ta Dios. Nitura gapa ni Pablo nga ‘makipazziga-riga danuri nazelugan kani Cristo tapenu mesipo ira ta karaya-rayawna.’ (Roma 8:16, 17; 2 Cor. 4:17) Yatutta mawag gafu nga matay ira tapenu mapaginnolay ira ta langi.

Yaw gafu i fustu nga ketura na kinagi ni Pablo ta 1 Corinto 15:29, NW: “Nu ari tu kurug yatun, anni gafu i mesimmu turi ira ta mabawtisowan tapenu mabbalin tu natay? Nu ari vuluvuga mapaginnolay i natay ira, ngatta gafu ta mabawtisowan ira tapenu mabbalin tu kunnatun?”