Saan, awan ti ibaga ti Biblia wenno ti historia nga adda kasta a maar-aramid idi.

Gapu iti pamay-an ti pannakaipatarus daytoy a teksto iti adu a Biblia, impagarup ti dadduma nga idi panawen ni Pablo, adda dagiti tattao nga ibautisaranda dagiti natay. Kas pagarigan: “No dagiti natay saanda nga agungar uray kaanoman, apay-apay ngarud agbautisarda a maipaay kadakuada?”—Ti Biblia.

Ngem kitaentayo ti komento ti dua nga eskolar ti Biblia. Imbaga ni Dr. Gregory Lockwood nga awan ti ebidensia iti Biblia wenno iti historia nga adda asinoman a nangibautisar iti maysa a natay a tao. Kasta met, insurat ni Professor Gordon D. Fee: “Awan ti napasamak a kasta a pannakabautisar iti historia wenno iti Biblia. Awan met ti dinakdakamat ti B[aro] a T[ulag] maipapan iti dayta; awan ti ebidensia nga inaramid dayta ti asinoman a nagkauna a Kristiano wenno ti aniaman a relihion a nabuangay di nagbayag kalpasan a natay dagiti apostol.”

Ibaga ti Biblia nga imbilin ni Jesus kadagiti pasurotna: “Inkayo . . . kadagiti tattao iti amin a nasion ket pagbalinenyo ida nga adalak, ken bautisaranyo ida . . . , ken isuroyo a tungpalenda ti amin nga imbilinko kadakayo.” (Mat. 28:19, 20) Sakbay nga agbalin a bautisado nga adalan ti maysa a tao, masapul nga agsursuro, mamati, ken agtulnog ken Jehova ken iti Anakna. Saan a maaramid dayta ti maysa a natayen ken addan iti tanem. Saan met a maaramid dayta ti maysa a sibibiag a Kristiano para iti dayta a natay a tao.—Ecl. 9:5, 10; Juan 4:1; 1 Cor. 1:14-16.

Ania ngarud ti dakdakamaten idi ni Pablo?

Ibagbaga ti dadduma a taga-Corinto a saan a mapagungar dagiti natay. (1 Cor. 15:12) Kuna ni Pablo a saan a husto dayta. Imbagana nga ‘inaldaw a maipaspasango iti ipapatay.’ Siempre, sibibiag pay la ni Pablo idi imbagana dayta. Ngem uray no adu a peggad ti pakaipaspasanguanna, agtalek nga uray matay, mapagungar kas mannakabalin nga espiritu, kas iti napasaran ni Jesus.—1 Cor. 15:30-32, 42-44.

Masapul a maawatan dagiti taga-Corinto a kas napulotan a Kristiano, inaldaw a maipasangoda kadagiti pakasuotan ket matayda tapno mapagungarda nga agbiag idiay langit. Ti ‘pannakabautisar ken Kristo Jesus’ ramanenna ti ‘pannakabautisar iti ipapatayna.’ (Roma 6:3) Ti simboliko a pannakabautisarda kaipapananna a literal a matayda sadanto mapagungar idiay langit.

Nasurok a dua a tawen kalpasan a nabautisaran ni Jesus iti danum, imbagana iti dua nga apostolna: “Mabautisarankayto iti pakabautisarak.” (Mar. 10:38, 39) Saan idi a madama a mababautisaran ni Jesus iti danum. Ibagbagana ditoy a ti kinamatalekna ket agresultanto iti ipapatayna. Insurat ni Pablo a dagiti napulotan ket ‘agsagaba a kas [ken Kristo] tapno kaduana met [ida] a maipadayag.’ (Roma 8:16, 17; 2 Cor. 4:17) No kasta, matayda met tapno mapagungarda nga agbiag idiay langit.

Gapuna, kastoy ti umiso a pannakaipatarus ti imbaga ni Pablo: “Ta no saan, anianto ti gunggona dagidiay mabautisaran no mataydanto laeng? No saanto a pulos mapagungar dagiti natay, apay a mabautisaranda no mataydanto met laeng?”