Eye! Ije soso iribhi Baibo nọn rẹman ghe ọnan sunu. Sẹyẹ, ebe okha nin ẹbho gbẹn soso bha tale ghe Kristiẹn lu emhin nọn sẹ iriọ.

Uwedẹ nan rẹ gbẹn ọne ulọnlẹn nan bhi Baibo eso, ọle re ẹbho riale ghe, bhi ore nin ọhẹnhẹn, Kristiẹn wo ha mianmẹn nin ẹbho ne yu. Bhi ọsi ijiẹmhin, Baibo ọkpa da yọle: ‘Ejayenan nian, ahamiẹn ariọkpanọ iribhọ, be ẹbho ne mianmẹn nin ene yu ha ki lu yẹ?’​—New International Version.

Bha ji mhan fẹghe ebi ẹbho eso ne fẹ otọ iBaibo ghe tayẹ. Dr.  Gregory Lockwood da yọle ghe, ije soso iribhi Baibo nọn rẹman ghe ẹbho mianmẹn nin ene yu. Ọle da yẹ yọle ghe, ebe okha soso iribhọ nọn rẹman ghe ọ sunu. Sẹyẹ, okpea natiọle Professor Gordon D. Fee da gbẹn yọle: “Baibo bha rẹman ghe ọ sunu. Ebe okha soso bha rẹman ghe Kristiẹn ka ha lu iriọ. Obọ iBaibo natiọle N[ew] T[estament] bha tẹmhọn emhin nọn sẹ inian hiehie, ghe Kristiẹn ka ha lu iriọ. Otuẹ ne ki dọ ha ribhọ ẹghe nin ene etuegbe rẹ yu fo bha ha lu emhin nọn sẹ inian.”

Bhi Baibo, Jesu da taman ene rẹkhan ọlẹn yọle: “Bha ha khian dọ re ẹbho kiẹn edibo bhi agbaẹbho rebhe. Gbe ele ruẹ bhi amẹn. . . .  Bha ha man ele emhin nin ele re obọ rẹkhan ene emhin rebhe nin mẹn rẹ gbuhi nin bha.” (Matt. 28:​19, 20) Ọnan rẹman ghe, ọkuẹsẹ ọria mianmẹn nin ọle kiẹn odibo nọnsi Jesu, ọkhẹke nin ọle luẹ ẹmhọn iJehova bi Jesu yẹ rẹọbhi ebi ọle luẹ. Ọria nọn yulu ida sabọ lu ọnan. Sẹyẹ, Kristiẹn nọn nyẹnlẹn ida sabọ rẹkpa ọle lu ọle.​—Eccl. 9:​5, 10; John 4:1; 1 Cor. 1:​14-16.

Bhiriọ, be bhọ Paul ha tẹmhọnlẹn?

Bhi ore nin ọhẹnhẹn, ibhokhan iCorinth eso da ha tale ghe, ọria nọn yu ida sabọ riọkpanọ. (1 Cor. 15:12) Paul da rẹman ele ghe ohoghe ele bhale. Ọle da taman ele ghe ukpẹdẹ-ukpẹdẹ ọle rẹ kuẹlo da uu. Sokpan, ọle sẹyẹ ha ribhi agbọn. Ọrẹyiriọ, ọle wo mhọn ọne ikhuaẹloghe ghe, ọle ha yu, a dẹ riọ ọle kpanọ nin ọle ha mhọn egbe ẹlinmhin beji a rẹ riọ iJesu kpanọ.​—1 Cor. 15:​30-32, 42-44.

Ọkhẹke nin Kristiẹn ne ribhi Corinth lẹn ghe, beji a miẹn ghe enanzẹle ele khin, ele dẹ ha miẹn edọnmhẹn ukpẹdẹ-ukpẹdẹ. Ọkike ọle, ele ki yu ọkuẹsẹ ele riọkpanọ. Bhiriọ, beji ele rẹ “mianmẹn nin [ele] rẹ kugbe deba iJesu,” ele da yẹ “mianmẹn nin [ele] rẹ deba ọle bhi uu nin ọle yu.” (Rom. 6:3) Ọnan rẹman ghe, bọsi Jesu, ele dẹ miẹn edọnmhẹn yẹ yu ọkuẹsẹ a riọ ele kpanọ ha khian okhun.

Ikpe eva ki gbera nin Jesu mianmẹn fo, ọle da taman edibo nesọle eva ghe, ele dẹ mianmẹn bhi uwedẹ nin ọle rẹ mianmẹn. (Mark 10:​38, 39) Jesu bha ha mianmẹn bhi ọne ẹghe nan. Bhiriọ, ebi ọle ha tẹmhọnlẹn hi, ọle dẹ miẹn uu ranmhude ọle sun rẹkhan iJehova. Paul da gbẹn ghe, enanzẹle dẹ loya kugbe beji a ha da yẹ khua ele okhun kugbe. (Rom. 8:​16, 17; 2 Cor. 4:17) Bhiriọ, ele dẹ yumhin ọkuẹsẹ a riọ ele kpanọ ha khian okhun.

Bhiriọ, uwedẹ ọbhebhe nin mhan ha sabọ rẹ ta ọta nin paul tale bhi 1 Corinthians 15:29 hi: “Sokpan, be ene mianmẹn nin ele da yu ha ki lu yẹ? Ahamiẹn ene yu ida riọkpanọ bhi uu, bezẹle nin ele ki da miẹn imanmẹn nọn sẹ iriọ ọbhi egbe?”