Kana, kikale o Bibidya mba o akwa misoso ene katange kwila o Jikidistá mu ukulu exile ni kijila kiki.

Sayi ji Bibidya o ukexilu walungulula o velesu yiyi ilondekesa kwila o athu mu izuwa ya poxolo Phawulu akexile ni kijila kya ku abatizala mukonda dya madifundu. Mukifika o Bibidya Nova Versão Internacional yamba: “Se kibhwala difukunukinu, ihi yandabhanga yo amwabatizala mukonda dya madifundu?”

Tala yazwela athu ayadi akwakutokwesa o Mikanda Ikôla. Gregory Lockwood, wadilongo o Teologia, mwene wambe kwila kikale o Bibidya mba omisoso ya athu, ki ilondekesa kwila mukulu exile mubatizala o athu mukonda dya madifundu. Kyene kimoxi kyazwela omulongexi waxikola wakatunda Gordon D. Fee. Mwene wasoneka: Seku misoso mba milongi ya Bibidya izwela yalungu ni batizu yiyi. Mu Bibidya, mumikanda ya ngeleku kikwala we kima kizwela yalungu ni maka enya. Sekwe kima kilondekesa kwila o Jikidistá jadyanga mba Jingeleja exile mubhanga obatizu yiyi.

O Bibidya izwela kwila o akayedi a Jezú Kidistu atokalele “kulonga jixibulu ku akwa jixi joso, ni ku a batizala . . . Ni ku a longa kwaluka o ima yoso” yatumu mwene. (Mat. 28:19, 20) Omuthu phala kumu batizala kala dixibulu, kyadyanga mwene watokala kudilonga yalungu ni Jihova ni Mone, ku adyelela ni ku abelesela. Omuthu wafu kya katena dingi kubhanga o ima yiyi; okidistá wala ni mwenyu katena kubhanga kiki phala yo wafu kya.—Ndo. 9:5, 10; Nzwá 4:1; 1 Kol. 1:14-16.

Ihiphe yamesenene kuzwela Phawulu?

Sayi athu mumbanza ya Kolindu kaxikinine kwila o athu afu kya eji kwafukununa. (1 Kol. 15:12) Poxolo Phawulu wamesenene kulondekesa kwila, o kixinganeku kyokyo kikyexile kyakidi. Mwene wambe kwila o ‘kalunga ka mu zukamene izuwa yoso.’ Sumbala ni ibhidi yabhonzo yadibhana nayu, mwene wadyelele ni kidi kyoso kwila kyoso kyeji fwa, ejimufukununa ni mukutu mu nzumbi kala kyabhiti ni Jezu.—1 Kol. 15:30-32, 42-44.

O akwa Kolindu abhingile kwijiya kwila, kukala Kidistá a mu undu kulombolola kubhita mu ibhidi yabhonzo izuwa yoso kate mwene ni kufwa ande dya kumufukununa. Ku tu “batizala mwa Kidistu Jezú” kulombolola we ku tu “batizala mu kufwa kwê.” (Loma 6:3) Kiki kilombolola kwila, kala kyabhiti ni Jezú, ene we ejidibhana ni ibhidi kate kyeji kufwa. Kyene kiwa kyeji kwafukununa phala kuya kudyulu.

Mukubhita mivu iyadi tunde Jezú kyamubatizala ni menya, mwene watangele o jipoxolo jê jiyadi kwila: “A mi bhitisa we o batizu ya ngi batizala eme.” (Mál. 10:38, 39) Jezú kexile muzwela o batizu yé yamenya. Mwene wexile muzwela kwila, o ufiyele we kwa Nzambi weji kumubhekela o kufwa. Poxolo Phawulu wasoneka kwila o Jikidistá a a undu eji ‘tala hadi kumoxi ni Jezú Kidistu, phala ajingise we kumoxi ni mwene.’ (Loma 8:16, 17; 2 Kol. 4:17) Kiki kilombolola kwila, ene abhingile hanji kufwa phala ku afukununa nakale ni mwenyu kudyulu.

Kyenyikiphe, o izwelu ya Phawulu tutena ku ilungulula mu ukexilu watokala kala kiki: “Se o madifundu ka-nda kwa fukununa, ihi yanda bhita ni yó a mwa batizala phala kufwa? Se o madifundu kanda kwa fukununa, mukonda dyahi o athu a mwa batizala phala kufwa?”