Sako. Baabuiyo chɔm naa wana nda yiŋ yiŋɔɔ waa naa wo le. Nduyɛ, yaula cheleŋ bɛɛ dounuŋ kona maa mi hei yɔŋnuŋ te.

Mɛɛ nda hivi bolle Baabuileŋ ndeŋ o Baabuila bɔɔbɔɔ niŋ yɛ tosa ni mi waŋnda yiyaŋ maa o teleŋ Pɔɔllo niŋ, mi ndaa yiŋ wanaa cho yoomu wa sɔŋgɔ wanaa vi wa. Le taamaseliiyo, o Baabui naŋ cho soliŋndo kpeku wo niŋ Yau Mɛlɛkaa, ma hivi leŋ aa: “La dimi maa wanaa wu wa a miiŋgu yoomu le. Ɔɔ le sabu nda nɔ niŋ waŋndo yiŋɔɔ sɔŋgɔ wana vi niŋ ndo wo?”

Tofawɔ nyɛ wanaa sinaa dɛniaa yaasiaa Baabuiyo wa dimi a hei okɔɔ wo. Mi Fallo Kikoli Lɔkwud dimi maa, mɛɛ o lɔmasɔlaa niŋ ma “yiŋ wana cho yoomu wo sɔŋgɔ wana vi niŋndo. Kɛ Baabuiyo chɔm naa wanaa nda yiŋ yiŋɔɔ suu waa naa wo le. Nduyɛ, yaula cheleŋ bɛɛ suu a hei okɔɔ le.” Mi Fallo Kɔdɔŋ D. Fee bɛɛ dimi aa: “Yau kɛ kɛ suu a yiŋɔɔ waa naa okɔɔ le nduyɛ, Baabuiyo bɛɛ chɔm naa hei yɔŋnuŋ nda le. Yau Kpema Sɛnɛiyo suu a ndi okɔɔ le. Ŋ tuiyɔ maa mi Kilisiɔŋnda ndaa tosa yiŋɔɔ waa naa o wɔsiŋ kɛmɛ tasoŋ niŋ te. O kaŋii tasei nda kila sindɛ ve niŋ bɛɛ, ŋ tuiyɔ maa mi ndaa yiŋ waŋnda lende le.”

Baabuiyo dimi maa tol kɔɔliaa Chiisu wa nɔ ma kuɛ ‘o ŋwaŋnda chiee lo ba o ba fee ma siiŋguu nda buɛiyaa ndɔ nduyɛ ma yiŋ nda. Okoŋ, ma pɛɛku nda ma tosa nyɛ o nyɛ o dimul nda le tosaa.’ (Maa. 28:​19, 20) Waŋndo nɔ fɛŋ mbo pɛɛku Baabuiyo, mbo laalaŋ nyɛ o pɛɛku wo, nduyɛ mbo diikuŋ Chɛhowa nda Po ndɔɔ malaŋ o yiŋ. Te waŋndo vi niŋ pɛ ma kumbu ndu, o nɔla lɛ keŋ tosa le nduyɛ, Kilisiɔŋnɔ cho yoomu wo nɔla mbo tosa keŋ le ndu le.—Ikili. 9:​5, 10; Chɔŋ 4:​1; 1 Kɔliŋ. 1:​14-16.

Mɛɛ yɛɛ Pɔɔl ndoo yiyaŋ yɛ?

Mi Kɔliŋtiaŋnda apum sɛɛŋgiaa maa waŋvilɛiya miiŋgu yoomu le. (1 Kɔliŋ. 15:​12) Kɛ mi Pɔɔl mala nda le sinaa maa wanaa vi wa cho miiŋgu yoomu. Mbo dimi maa ‘lepala o lepala piɔmndo wa ndu bindu binduuwo.’ Mi che bɛɛ yoomu ndɔɔ wa o kpundɔɔ niŋ, kɛ ndoo nɔ tiindaŋndo maa o wu bɛɛ, Mɛlɛka cho ndu miŋgi yoomu a dialuŋ inyinayaŋ maa Chiisu.—1 Kɔliŋ. 15:​30-32, 42-44.

Kilisiɔŋaa Mɛlɛka pɔya Kɔliŋ nda ndaa nɔ ma sina maa sɔɔŋ palaŋ nɔ le nda komallo lepaa o lepaa. Ndaa nɔ vɛlɛ ma sɔla fɛŋ piɔmndo malaŋ Mɛlɛka miŋgi nda yoomu. Lelaŋ, mɛɛ nda ‘yiŋ ma simnuŋ diomndo o pilɛ nda Chiisu Kiliti waa, mɛɛ wu o vi wo, nda ndaa vi wu koŋ ni.’ (Luomaŋ. 6:​3) Hei sim ni maa sɔɔŋ palaŋ cho nda komal ma sɔla piɔmndo maa Chiisu. Okoŋ, mi Mɛlɛka miŋgi nda yoomu le kɔlaŋ choo choo.

Mɛɛ Chiisu sɔla yiŋɔɔ o mɛŋndaŋ niŋ mi wɔsilaŋ la hiau la tiɔɔŋ a nyɛ lechoo, mbo dimul buɛiyaa nduaa a ŋiɔɔŋ aa: “La cho . . . sɔla [yiŋɔɔ] ya I nɔ kuee mi sɔla wo.” (Maki 10:​38, 39) O cho a yiŋɔɔ o mɛŋndaŋ niŋ okɔɔ le Chiisu wa suɛi le. Nyɛ ndoo yiyaŋndo cho ni maa o cho lo o laalaŋ ndɔɔ choo haaa mbo sɔla piɔmndo. Mi Pɔɔl dimi maa te Kilisiɔŋaa pɔyaŋnda ‘keeku pɛ o nyɛ palaa niŋ mɛɛ Kiliti keeku o nyɛ palaa niŋ yɛ, mɛɛ nda bɛɛ cho hunɔɔ wa o naŋɔɔ ndɔɔ niŋ.’ (Luomaŋ. 8:​16, 17; 2 Kɔliŋ. 4:​17) Mɛɛ hei sim ni maa nda bɛɛ nɔ ma sɔla piɔmndo malaŋ Mɛlɛka miŋgi nda yoomu le kɔlaŋ choo choo.

Lelaŋ, nyɛ Pɔɔl dimi o bolle Baabuile nyunaa tɔlnuŋ choo leŋ nɔ mbo hiviŋ aa: “Mɛɛ te o wa lende pɛ, tɔnɔ yɛɛ wanaa cho yiŋɔɔ le piɔmndo sɔlaa wa nɔ yɛ niko? Te wanaa vi wa a miiŋgu yoomu le, mɛɛ le yɛɛ nda cho yɛ yiŋɔɔ suu koŋ sɔlaa?”