Ve. Ya ke ve na plase na Biblia to na balivre ya Istware yina ke na lakisá ti, bakristo ya siekle ya ntete vandá kuzwa bateme samu na ba yina kufwá.

Faso ba traduire verse yayi na Babablia ya nkaka, ke na nata bantu na kukanisa ti, bakristo ya ntete vandá zwá bateme samu na ba yina kufwá. Na kifwani, Babiblia ya nkaka ke zonzá: “Ntangu yayi si bantu ya kufwa ke vumbuka ve, samu na yinki ba ke na zwá bateme samu na ba yina kufwá?”

Na yawu, beto kuwa mambu yina zonzá bantu zole yina ke salá bakomentere na mambu ya Biblia. Dr. Gregory Lockwood zonzá ti, ya ke ve na kima na Biblia mpe na istware yina ke na lakisá ti, muntu kuzwá bateme na plase ya muntu ya nkaka yina kufwá. Faso mosi mpe, Profesere Gordon D. Fee soniká ti, ya ke ve na ekzample na Biblia to na istware, yina ke na zonzilá babateme ya faso yayi. Yandi zonzá ti, ya ke ve na verse na Nouveau testament yina ke na lakisá ti, bakristo ya siekle ya ntete salak’ yawu. Ya vandá salama mpe ve na kati ya ba-eglize yina butamá mwa ntangu fioti na manima ya lufwa ya ba-apotre.

Yesu lombá na badisiple ya yandi na ‘kukumisa bantu ya bayinsi nyonso bilandi ya yandi, na kupesa bawu bateme [. . .], na kulonga bawu na kusadilá mambu nyonso’ yina yandi zonzaka. (Mat. 28:19, 20) Avant muntu kuzwa bateme, yandi zola zaba kutula kiminu mpe kuwa Yehova na nwana ya yandi. Kasi muntu yina me kufwa lenda sala ve mambu nyonso yayi. Dyaka, ba yina ke moyo lenda sala ve yawu samu na yandi.—Lon. 9:5, 10; Yoane 4:1; 1 Ko. 1:14-16.

Na yawu, yinki Paul zola zonza na verse yayi?

Bantu ya nkaka na bwala ya Korinto vanda zonza ti bantu ya kufwa ke vumbuka ve. (1 Ko. 15:12) Paul lakisá bawu ti faso ya kukanisa yina vandá yimbi. Yandi zonzá ti bilumbu nyonso yandi vandá na mantwala ya lufwa samu na kisalu ya predikasion. Kasi yandi vandá kontinye kusala yawu samu yandi zabá ti, ata yandi kufwa, Nzambi ke vumbula yandi.—1 Ko. 15:30-32, 42-44.

Bakristo ya Korinte vandá na nsatu ya kuzaba ti, kukuma disiple ya Yesu zola zonza kukutana na mambu ya mpasi mpe lufwa avant Nzambi vumbula bawu samu na kukwenda na zulu. Na yawu, ntangu ba kuzwá ‘bateme na Yesu Kristo,’ ba kuzwá mpe ‘bateme na lufwa ya yandi.’ (Rom. 6:3) Ya zola zonza ti faso Yesu, ba zolá lutisa bantangu ya mpasi mpe kufwa avant ba kwenda na zulu.

Bamvula zole na manima ya bateme ya yandi, Yesu zonzá mambu yayi na ba-apotre ya yandi zole: ‘Beno ke kuzwá bateme yina mu ke na zwá.’ (Mrk. 10:38, 39) Ntangu Yesu zonzá mambu yayi, yandi kuzwa deja bateme depuis ntama. Na yawu, na verse yayi, yandi vandá zonza ti kukangama ya yandi na Nzambi zola nata yandi tii na lufwa. Paul soniká ti bakristo yina ke kwenda na zulu ‘zola tala mpasi bawu nyonso, na yawu ba lenda kuzwa nkembo mpe bawu nyonso.’ (Rom. 8:16, 17; 2 Ko. 4:17) Ya ke na lakisá ti ba zolá kufwa mpe na manima kuvumbuka na lufwa samu na kukwenda na zulu.

Mambu yina zonzá apotre Paul, beto lenda balula yawu na faso yayi: “Si bantu ya kufwa ke vumbuka ve, samu na yinki ba ke zwá bateme na kati ya lufwa? Si bantu ya kufwa ke vumbuka ve, samu na yinki ba ke na zwá bateme yina ba me zaba ti ba ke kufwa?”