Hawe, Bibeli ndi ehistoli kapi ya likida asi yininke oyo ngava yi rugana.

Monkedi omu va toroka velise ezi moNobibeli dimwe kwa ninkisa vamwe va gazare asi vantu wopomazuva gaPaurusa ngava va kuhu mokukwatera mo vafe. Pasihonena, Bibeli zimwe kwa tanta asi: “Nsene asi kwato evhumbuko, yisinke ngava rugana ava ava kuhwire mokukwatera mo vafe?”—New International Version.

Koneka eyi va uyunga ko valirongi vavali woBibeli. Dr Gregory Lockwood kwa tanta asi: “Kapi kwa kara maumbangi moBibeli ndi mehistoli aga aga likida asi vantu ngava va kuhu mokukwatera mo vafe.” Ntani Profesora Gordon D Fee nage kwa tjanga asi: “Kapi kwa kara maumbangi moBibeli ndi mehistoli asi yiko lya kere ekuho lyangoso. Etestamende lyepe kapi lya kwatesa ko egano eli, ntani kapi pwa kara umbangi ou au likida asi ngava yi rugana Vakriste wokuhova ndi nongereka dimwe edi va totere po konyima zonomfa dovapositoli.”

Bibeli kutanta asi vasikuli vaJesus va hepa kuza ‘konomuhoko nadinye, va ka di ninke di kare varongwa, nokukadikuhwa . . . , va di ronge, di limburukwe nayinye eyi’ ga va rekera. (Mat. 28:19, 20) Komeho muntu a gwane ekuho, ga hepa kudiva Jehova naJesus nokukara nepuro mwawo ntani nokuvalimburukwa. Muntu gokufa kapi tayi vhuru kuyirugana oyo, nampili Mukriste gomuzuni nage kapi ta vhuru kuyiruganena po mufe.—Muud. 9:5, 10; Joh. 4:1; 1 Kol. 1:14-16.

Yisinke nye ga tembe Paurusa?

Vakolinte vamwe kapi va yi pulire asi vafe ngava va pindura koufe. (1 Kol. 15:12) Paurusa kwa va likidire asi mepuko va kere. Age kwa tumbwire asi ‘nkenye ezuva mosimpagwa sonomfa ga kere.’ Nampili ngoso, age simpe muzuni ga kere. Nye nampili ngomu nga ligwanekere noyimpagwa, age ga kere nehuguvaro asi konyima zonomfa dendi ngava mu vhumbwira keparu lyemeguru, ngwendi Jesus.—1 Kol. 15:30-32, 42-44.

Vakolinte va hepere kudiva asi kukara mugwavekwa kutanta asi ngava ligwanekera nomaudigu gokulisiga-siga ntani nokufa komeho va va vhumbure. “Ava va kuhwira mwaJesus Kristusa” kwa kwatera mo ‘kuvakuhwira monomfa dendi.’ (Rom. 6:3) Ekuho eli lyopasifanekeso kutanta asi ngwendi Jesus nawo ngava ligwanekera nomaudigu nokufa ntani nokuvavhumbwira keparu lyemeguru.

Konyima zonomvhura mbali zapa Jesus va mu kuhwire, age kwa tanterere vapositoli vendi vavali asi: “Li kare ekuho eli nava kuhwisa nge, none yilyo ngava mu kuhwisa.” (Mar. 10:38, 39) Jesus kapi ga tembe kekuho lyomema eli va mu kuhwire. Nye age kwa tembe asi kulimburukwa Karunga ngayi twaredesa konomfa. Paurusa kwa tjenge asi: “Nsene tu mu nyandesa ko Kristusa momahepeko ngava ka tu yererepeka hena kumwe nendi.” (Rom. 8:16, 17; 2 Kol. 4:17) Nawo va hepere kufa yipo va va vhumbwire keparu lyemeguru.

Nonkango daPaurusa kuvhura kuditoroka ngesi asi: “Nsene asi vafe kapi ngava va pindura koufe, ngapi nye kuhamena ava ava kuhwire monomfa? Nsene asi vafe kapi ngava va pindura, morwasinke nye ava gwanene ekuho olyo?”