Batili, Bibele ni litaba za kwamulaho halibonisi kuli Bakreste nebaezanga cwalo.

Moitolokezwi timana yeo mwa Libibele zeñata kutahisize kuli batu babañwi banahane kuli batu bane bapila mwa linako za Paulusi nebakolobezwanga bakeñisa babashwile. Ka mutala, mwa Libibele zeñwi, timana yeo itolokilwe kuli: “Cwale, haiba babashwile habana kuzusiwa, kiñi sebakolobelezwa bakeñisa bona?”

Niteñi, mulemuhe zene babulezi licaziba bababeli ba litaba za Bibele. Caziba yabizwa Gregory Lockwood naabulezi kuli “hakuna bupaki bwa mwa Bibele kamba litaba za kwamulaho bobubonisa kuli batu nebakolobezwanga bakeñisa babashwile.” Caziba yabizwa Gordon D. Fee naañozi kuli: “Hakuna bupaki mwa Bibele kamba litaba za kwamulaho bobuyemela muhupulo wo wa kuli batu nebakolobezwanga bakeñisa babashwile. Naabulezi kuli kolobezo yecwalo haifumanehi feela mwa Testamente Yenca mi hakuna bupaki bobubonisa kuli Bakreste ba kwa makalelo kamba batu bane baswalisana ni likeleke zenetomilwe hamulaho feela wa kushwa kwa baapositola nebaezanga kolobezo yecwalo.”

Bibele ibulela kuli balateleli ba Jesu nebaswanela ‘kuluta batu ba macaba kaufela kuba balutiwa, kubakolobeza . . . , kubaluta kumamela lika kaufela’ zanaa balaezi. (Mat. 28:19, 20) Pili mutu asikaba kale mulutiwa yakolobelizwe, naatokwa kuziba Jehova ni Mwanaa hae, kulumela ku bona, ni kumamela litaelo zabona. Mutu yanaashwile, yanaali mwa libita naasike akona kueza cwalo; mi Mukreste yapila naasike akona kueza lika zeo mwa sibaka sahae.—Muek. 9:5, 10; Joa. 4:1; 1 Makor. 1:14-16.

Kono cwale Paulusi naatalusañi?

Batu babañwi bane bapila mwa Korinte nebasa lumeli kuli zuho ya bafu neikaba teñi. (1 Makor. 15:12) Paulusi naabatusize kulemuha kuli taba yene balumela yeo nesi ya niti. Naabulezi kuli ‘zazi ni zazi naatalimana ni lifu.’ Kono hanaabulezi litaba zeo, Paulusi naasapila. Nihaike kuli Paulusi zazi ni zazi naakopani ni likozi zenebeile bupilo bwahae mwa lubeta, naanani buikolwiso bwa kuli hanaaka shwa, naakazusiwa ni kuyo pila kwa lihalimu inzaa nani mubili wa moya sina Jesu.—1 Makor. 15:30-32, 42-44.

Bakreste ba kwa Korinte nebatokwa kuutwisisa kuli ka kuba Bakreste babatozizwe, nebaka kopana ni miliko zazi ni zazi mi nebatokwa kuzwelapili kusepahala kuisa lifu, pili basika zusiwa kale kuyo pila kwa lihalimu. Kacwalo, hane “bakolobelizwe ku Kreste Jesu,” hape ‘nebakolobelizwe ka lifu lahae.’ (Maro. 6:3) Taba yeo italusa kuli sina Jesu, ni bona nebaka kopana ni miliko, mi nebaka shwa ilikuli bazusiwe ni kuyo pila kwa lihalimu.

Hamulaho wa lilimo zefitelela zepeli kuzwa fakolobelezwa Jesu mwa mezi, naabulelezi baapositola bahae bababeli kuli: ‘Mukakolobezwa ka kolobezo yenikolobezwa ka yona.’ (Mare. 10:38, 39) Ka kubulela cwalo, Jesu naasatalusi kolobezo ya mwa mezi. Kono naatalusa kuli hanaaka zwelapili kusepahala ku Mulimu, naakabulaiwa. Paulusi naañozi kuli babatozizwe nebaka ‘nyanda hamoho ni [Jesu] kuli ni bona bakone kukanyiswa hamoho ni yena.’ (Maro. 8:16, 17; 2 Makor. 4:17) Kacwalo, ni bona nebaka shwa kuli bazusiwe ni kuyo pila kwa lihalimu.

Manzwi anaabulezi Paulusi akona kutolokiwa cwana ka kunepahala kuli: “Hakusicwalo, bakaezañi babasweli kukolobelezwa kuli babe babashwile? Haiba bafu habana kuzuswa nikamuta, kiñi hape sebakolobelezwa kuli babe cwalo?”