Awe. Kutawa iwaliko ilili lyonsinye mu Baibolo nanti ilyasi ilili lyonsinye lino likalanda ukuti awina Klistu wa kali wabatizizwangako awantu wanji wano wafwa.

Vino ama Baibolo yamwi yalanda pe lyo-o iwaliko avino vyalenga wamwi walola ngati ivya musango wo-o vyacitikanga mu mpindi zya watumwa. Ku cakulolelako, e Baibolo yimwi ikalanda ukuti: “Ndi awafwe wasizyulupuka ku mfwa nga fwandi acani cino wakubatizizwa kwa kwe woliwo?”—New International Version.

Vyo-o vino ya-a ama Baibolo yalandapo vyapusana na vino wamwi wawili wano wasambilila pa vya mu Baibolo walandapo. Wumwi uwizina lya kuti Dr. Gregory Lockwood walanzile ukuti, kutawa uwusinincizyo uwuli wonsinye mwe Baibolo nanti mu malyasi ya kali wuno wukalanjizya ukuti awapuma wabatizizwangako awafwe. Wonye avino ne Professor Gordon D. Fee walanzile. Walenvile ukuti: “Kutawa iwaliko ilili lyonsinye mu Baibolo nanti ilyasi ilili lyonsinye ilya kali lino likalanda ukuti kwalinji ulubatizyo lwa musango wo-o. Swinya nanti amu Mawaliko ya ciGriki nye mutawamo ulubatizyo lwa musango wo-o. Kutawa uwusinincizyo uwuli wonsinye wuno wukalanjizya ukuti akuno lwalinji mu mpindi ya watumwa nanti mu macalici yano wizile awapanga pa nsizi ya watumwa.”

E Baibolo ikati e Yesu wawuzizye awasambilizi wakwe ukuti “yanji mukasambilizye imyiko yonsi muleke wawe awasambilizi wane, muwawabatizya. Muwawasambilizya wasunga vyonsi vino namisunda mwemwe.” (Mat. 28:19, 20) Pano umuntu atani abatizwe nu kuwa umusambi, wazipizile ukusambilila pe Yehova nu mwana wakwe, ukuwa suwila nu kuwivwila. Lelo umuntu umufwe atange acite vyo-o swinya nu mupumanye atange amucitile vyo-o.—Ekawi. 9:5, 10; Yoha. 4:1; 1 Kor. 1:14-16.

Nomba lyo acani cino Paulo wasulanga?

Awa mu Korinte wamwi wakananga ukuti awafwe watalizyulupuka. (1 Kor. 15:12) E Paulo wawalanjizizye ukuti co-o icisambilizyo calinji aca wufi. Uzye wacisile wuli? Walanzile ukuti ‘nkasunkanya imfwa cila wanda.’ Lelo cisakula ukuti pano walandanga ya-a amazwi lyo amufwe lyo acili amupumanye. Cino walandangapo aca kuti asa mulandu ni ntazi zino zyange zimuletele imfwa zino wapitangamo, wasuwizile ukuti walinji nu kuzyulupuka nu kuwa icelewulwa ca ku muzimu. Wulyanye vino calinji nakwe Yesu.—1 Kor. 15:30-32, 42-44.

Awina Klistu awapakwe wazipizile ukupita mu ntazi nu kufwa pano watani wazyulupuke. “Ukubatizizwa mwa kwe Klistu Yesu” mwasanzizyemo nu “kubatizizwa mu mfwa yakwe.” (Roma. 6:3) Co-o cikusula ukuti walinji nu kupita mu ntazi nu kufwa pano watani wazyulupuke nu kuya kwi kwi yulu. Wulyanye vino calinji na kwe Yesu.

E Yesu wanenile awatumwa wakwe wawili amazwi amacindame sana. Walanzile ya-a amazwi lyo papita ni myaka ukucila pe yiwili ukufumulila pano wabatizizwe mu minzi. Wawanenile ukuti: “Ibatizyo lino nkubatizwa mulibatizwa.” (Mar. 10:38, 39) Pano Yesu walandanga ya-a amazwi lyo atakubatizwa mu minzi. Lelo wasulanga ukuti wucisinka wakwe walinji nu kumukomesya. E Paulo walenvile ukuti awapakwe “walinji nu kuyimba ponga ne Klistu pa kuti wize wacindamikwe nawe ponga.” (Roma. 8:16, 17; 2 Kor. 4:17) Fwandi nawonye pa kuti waye kwi yulu wazipizile ukufwa.

Nga akukonkavye ya-a amazwi yano umutumwa Paulo walanzile yafwile ukupiliwulwa ukuti: “Nga asa wowo lyo walicita wuli wano wakubatizizwa ukufwa? Nga ca kuti awafwe watalitela wazyulupuke lyo amulandu ci wuno wakubatizizwa ulubatizyo lwa musango wowo?”