Amo. Ipan Biblia uan ipan sekinok amochtli kiijtoua amo momajtoyaj kichiuaj nopa.

Kej motlajtolkueptok ni versículo ipan miak Biblias, kichiua ma moiljuikaj kema itstoyaj achtoui Cristo itokilijkauaj, se keskij moatsonpoliuiltiyayaj ika inintoka katli ya miktoyaj. Se neskayotl, sekinok Biblias kej ni kitlajtolkueptokej: “Tlaj katli miktokej amo moyolkuisej, ¿kenke sekij moatsonpoliuiltiaj ika maseualmej tlen ya miktokej?”.

Ma tikitakaj tlen kiijtojkej omej ixtlamatinij. Se ixtlamatketl tlen itoka Gregory Lockwood kiijtok yon ipan Biblia yon ipan sekinok amochtli kiijtoua tlaj “se akajya moatsonpoliuiltik ika itoka se katli ya miktok”. Yeka, “tlaj kiampa kichijtoskiaj amo sanse kiijtoskia ika tlen Biblia kiijtoua uan sekinok amochtli”. Nojkia, Gordon Fee katli tlauel momachtia Biblia kiijtok: “Amo onka yon se tlamantli ipan Biblia yon ipan seyok amochtli kampa kiijtoua tlaj “se akajya moatsonpoliuiltik ika itoka se katli ya miktok”. Ya kiijtoua ipan Nuevo Testamento amo uala yon se tlajtoli tlen kiampa kiijtoua. Nojkia amo onka yon se tlamantli kampa kinextia tlaj se Cristo itokilijkaj kiijkuilok, yon ipan se iglesia amo kema kiampa kiijtojkej tlen pejki kema ayokmo itstoyaj apóstoles.

Ipan Biblia Jesús kiijtok: “Xijchiuakaj ma elikaj notokilijkauaj maseualmej tlen nochi altepemej, xikinatsonpoliuiltikaj [...], xikinmachtikaj ma kineltokakaj nochi tlen niinmechnauatijtok” (Mateo 28:19, 20, TNM). Yeka, tlaj se maseuali kinekiyaya mochiuas Cristo itokilijkaj uan moatsonpoliuiltis, monekiyaya kiixmatis Jehová uan Jesús, kinneltokas uan kintlepanitas. Uan se katli ya miktok, ya kitlalpachojtokej uan amo ueliskia kichiuas nochi nopa tlamantli, uan se Cristo itokilijkaj amo ueliskia kipaleuis se katli ya miktok (Ecl. 9:5, 10; Juan 4:1; 1 Cor. 1:14-16).

Uajka, ¿tlake kinejki kiijtos Pablo ipan ni versículo?

Se keskij toikniuaj tlen Corinto amo kineltokayayaj moyolkuisej katli miktokej (1 Cor. 15:12). ¿Kenijkatsa kinpaleuik Pablo? Kiniljuik: “Mojmostla eltok keja asi nopa hora para nimikis”. Maske nojua itstoya ipan Tlaltipaktli uan kiixnamikiyaya tlaouijkayotl, ya nochipa motemachiyaya tlaj mikiskia moyolkuiskia uan yaskia iluikak, kej Jesús (1 Cor. 15:30-32, 42-44).

Toikniuaj tlen Corinto monekiyaya kikuamachilisej pampa kintlapejpenijtoyaj yasej iluikak, kipiaskiaj miak tlaouijkayotl uan achtoui mikiskiaj uan teipa moyolkuiskiaj. Kema “moatsonpoliuiltijkej ipan Cristo itoka” kiijtosneki nojkia “moatsonpoliuiltijkej ipan imikilis” (Rom. 6:3 TNM). Ni kiijtosneki kipiaskiaj tlaouijkayotl kej Jesús kipixki uan teipa mikiskiaj uan kiampa ueliskiaj yasej iluikak.

Kema Jesús moatsonpoliuiltijtoya kipano ome xiuitl, kiniljuik omej itokilijkauaj: “Nelia intlaijiyouisej keja na. Uan nelia inkipanosej miak kuesoli keja na nijpanos” (Mar. 10:38, 39). Jesús kinejki kiijtos techmakixtiskia pampa amo kitlauelkajki iTata. Pablo kiijtok katli kintlapejpenijtokej yasej iluikak tlaijiyouiskiaj iuaya Jesús uan kiampa nojkia kiseliskiaj tlateochiualistli (Rom. 8:16, 17; 2 Cor. 4:17). Ni kiijtosneki inijuantij nojkia monekiyaya mikisej uan kiampa ueliskiaj yasej iluikak.

Tlen Pablo kiijtok ueliskia motlajtolkuepas kej ni: “Tlaj amo kiampa eliskia, ¿tlake kichiuasej katli moatsonpoliuiltiaj tlaj kimatij mikisej? Tlaj katli miktokej amo moyolkuisej, ¿uajka kenke inijuantij nojkia moatsonpoliuiltiaj?”.