Hooye, Piipiliya naari miyaha saachu hinnooniherya wi Akristu yaakhalano yookhovelela yeela.

Mukhalelo yoorepa ela etaphuleliwaaya mu Apiipiliya akina ennaweeriha achu akina wuupuwela wi mmahiku a Paulo yaakhalamo yookhovelela ya opatiso ntakhara achu ookhwa. Ntoko yootakiherya: Piipiliya, Nova Versão Internacional oni “Ovinya wookhwani waahiriwo eni yeere hai yaale anapatisiwa wa nthowa na achu ookhwa?”

Nyenya moone yeeyo alipa oomutholathola Piipiliya eeli aloncaaya. Totore a Teologia Gregory Lockwood, olonce wi opatiso ntakhara achu akhwile waahaala okhala mukhalelo wa opatiso yoowo waahaala osuweliwa wi honarweela mmiyaha saachu naari Mpiipiliyani. Mmukhalelo woolikana, muhusiha Esikola ya vasulu Gordon D. Fee oorepa: “Hayiivovo yawooniherya mmiyaha saachu naari Mpiipiliyani enaloca sa opatiso yoola. Nlakano na Hiihano hannaloca tho sa yeela. Hayiivovo yawooniherya yawi Akristu oopacerya yaaneerano naari ikerexa ikina saakhumelenle iyaakha nsana ohoolo waya.”

Piipiliya onnaloca echu oomuchara a Yesu yaaphwanelaaya weera ariki: “mwaapakeke oohuserya aka munaapatisa . . . , munaahusiha ochariha soothene koorummaakaani.” (Mat. 28:19, 20) Muchu ahaakumve okhala oohuserya oopatisiwa, onaphwanela ohuserya vooloca sa Yehova ni Mwanawe, oweemererya ni owiiwelela. Muchu okhwile ni avithiwa hanawerya weerano eyo, nave Mukristu okhanle hanawerya weerano eyo ntakhara yaawo.—Ekle. 9:5, 10; Yoh. 4:1; 1 Kor. 1:14-16.

Vano, tiheeni Paulo aachuneiye oloca?

Achu akina o Korinto hiyeemererya wi achu ookhwa yahaala oviihiwa mookhwani. (1 Kor. 15:12) Paulo aahiwooniherya wi moonelo owo waari woonanara. Owo aalonce wi aanoona ‘okhwa nihiku nnihiku.’ Mwawooneya, Paulo nlelo iha ari mukumi. Naamwi aakumanano makacamiho oohiyanahiyana owo aanaroromela wi akhwa, aahaala oviihiwa mookhwani ntoko munepa woowerya, hiiha ntoko yeeren’yaaya ni Yesu.— 1 Kor. 15:30-32, 42-44.

Achu o Korinto, yaaphwanela wiiwexexa wi okhala oothanliwa ni munepa waweela, waataphulela ohoolela makacamiho nihiku nnihiku ni okhwa ehaakumve oviihiwa mookhwani. “Opatisiwa mwa Yesu Kristu” onavolowela opatisiwa mu “okhwa wawe.” (Aro. 6:3) Paulo aachuna oloca wi hiiha ntoko Yesu, Akristu oothanliwa ni munepa waweela yaahaala opatisiwa naari wiivoliiherya mu okumi yoowo waahaala okumiherya okhwa. Nave voocharela yaahaala oviihiwa mookhwani wi yakhaleno okumi woomunepani.

Ivinrevo iyaakha piili ohoolo waya Yesu amanle opatisiwa mmaahini, owo aahiloca wa arummwa awe apiili ariki: “Munanwerya opatisiwa ni opatiso kineeraaka kipatisiweno. (Mar. 10:38, 39) Yesu haapatisiwe wanaawiili mmaahini. Owo aachuna oloca wi nthowa na okhala oororomeleya wa Muluku, aahaala okhwa. Paulo oorepa wi oothanliwa ni munepa waweela ‘yaahaala ohaawa ni Kristu wi ecicimihiwe vamoha ni yoowo.’ (Aro. 8:16, 17; 2 Kor. 4:17) Eyo yaataphulela wi awo yaaphwanela okhwa eviihiwe mookhwani, wi yakhale wirimu.

Mwawiiwanana ni soothene seiha, masu a Paulo, ananwerya otaphuleliwa mookwakwaleya mmukhalelo ola: “Yaahiri hiiha, yaale anapatisiwa ni yoolakelela ya okhwa, eni yeere eheeni? Waakhanle wi chiryene alipa ookhwa heni eviihiwe mookhwani, vano, ntakhara heeni awo anapatisiwaaya ni yoolakelela yeela?”