Ka. Nion Biblia nion libros de historia xkijtouaj tla yeuejkaui ijkon nochiuaya.

Ipan miyek Biblias, yejuin tlaxelojli kiteasikamachiltia ika ijkuak nemiya Pablo, miyekej noapolaktiayaj inpampa akin yomijkej. Ipan Biblia Porciones del Antiguo Testamento y El Nuevo Testamento en náhuatl de Guerrero kijtoua: “Tla on mikatsitsimej xyoliskej niman xnokuiteuaskej, ¿tline tej, sekimej impampa nokuatekiyaj?”.

San ika, matikitakan tlenon kijtouaj omemej ixtlamatkej. Gregory Lockwood okijto ika, nion tlen yeuejkaui onochiuj nion tlen Biblia kijtoua, xkiteititia tla yeuejkaui yakaj noapolaktiaya ipampa yakaj akin yomijka. Niman ixtlamatki Gordon Fee okijkuilo: “Xitlaj techititia tla yeuejkaui noapolaktiayaj ipampa yejuin, niman Biblia noijki xkiteititia yejuin”. Noijki kijtoua ika ipan Nuevo Testamento xkanaj noteneua tla yeuejkaui noapolaktiayaj inpampa akin yomijkej, niman ika xtlaj kiteititia tla ijkon okichiujkej inomachtijkauan Cristo akin onenkej ipan kachtopa siglo noso tla ijkon okichiujkej seki tlaneltokiltin tlen onochijchiujkej sakin ika omijkej apóstoles.

Biblia kijtoua ika Jesús okimijli inomachtijkauan: “Xkinmachtikan tlaltikpakchanejkej ipan nochi kalpamej, xkinapolaktikan [...,] xkinmachtikan makitlakamatikan nochi tlajtlamach tlen yonimechnauati” (Mat. 28:19, 20, TNM). Yejuin techititia ika tla yakaj kineki noapolaktis, kachtopa kipiya ika nomachtis itech Jehová niman Jesús, noijki noneki intech tlaneltokas niman kintlakamatis. Yakaj akin yomik xuelis noapolaktis, pampa yejua xuelis tlaneltokas itech toTajtsin niman Jesús. Yejua ika, noijki xakaj uelis noapolaktis ipampa se tlaltikpakchane akin yomik (Ecl. 9:5, 10; Juan 4:1, TNM; 1 Cor. 1:14-16, TNM).

Kuakon, ¿tlenon okijtosnek Pablo ipan 1 Corintios 15:29?

Ipan tlanechikojli tlen onkatka Corinto, sekimej tokniuan xtlaneltokayaj itech yoliuilistli (1 Cor. 15:12). ¿Kenon okimititi Pablo ika nonekiya kipatlaskej ken tlanemiliayaj? Yejua okimijli: “Mojmostla nechmiktisnekij”. Melauak, yejua ok yoltoya, san ika, kixnamikiya miyek tlemach tlen ouijtika. Maski ijkon, yejua kineltokaya ika tla mikiya, Jehová kiyolitiskia ken se espíritu melak kojtik, ijkon ken Jesús (1 Cor. 15:30-32, 42-44).

Tokniuan tlapejpeniltin akin chantiyaj Corinto kipiaya ika kasikamatiskej ika nonekiya kixnamikiskej tlen ouijtika niman mikiskej achto kinyolitiskej. Ijkuak Pablo okijto ika kinapolaktiayaj ipan Cristo Jesús, kijtosnekiya ika kinapolaktiayaj ipan imikilis Cristo (Rom. 6:3, TNM). Yejuin techititia ika, ijkon ken Jesús, yejuamej kixnamikiskiaj tlen xkuajli niman mikiskiaj achto kinyolitiskej ne iluikak.

Ijkuak yopanoka ipantsin ome xiuitl ika yonoapolaktijka Jesús, yejua okimijli omemej iapóstoles ika kinapolaktiskiaj ijkon ken yejua kiapolaktijtoyaj (Mar. 10:38, 39, TNM). Yemelak, ijkuak okiteneuj yejuin, yejua xkipolaktijtoyaj ijtik atl. Jesús kinekiya kiteititis ika, pampa yolmelajkanemiskia itech iTajtsin, oksekimej kimiktiskiaj. Pablo okijto ika tlapejpeniltin tlajyouiskiaj ijkon ken Jesús para ijkon noijki kiseliskej “on ueyilistli” tlen yejua kipiya (Rom. 8:16, 17; 2 Cor. 4:17). Yejuin kijtosneki ika yejuamej noijki nonekiskia mikiskej achto yoliuiskej ne iluikak.

Ipampa nochi yejuin, tlen Pablo okijto ipan 1 Corintios 15:29 uelis ijkin notlajtolkuepas: “Tla xijkon yeskia, ¿tlenon kichiuaskej akin noapolaktiaj pampa hasta kinektokej mikiskej? Tla akin yomijkej xkinyolitiskej, ¿tleka yejuamej noapolaktiaj ipampa yejuin?”.