Nakai fai mena pihia ne talahau he Tohi Tapu po ke fakamauaga tuai.

Ko e puhala ne fakaliliu e kupu tohi nei he tau Tohi Tapu loga kua takitaki e falu ke manatu ko e papatiso ke lata mo lautolu ne mamate ne taute he vahā ha Paulo. Ma e fakatai, falu Tohi Tapu ne talahau: “Kaeke mogonei ke nakai fai liu tu mai, ko e heigoa ka taute e lautolu ia kua papatiso ke lata ma e tau tagata mamate?”

Ka e mailoga e talahauaga he tokoua e pulotu ke he Tohi Tapu. Ko Dr. Gregory Lockwood ne pehē kua nakai fai fakamooliaga he Tohi Tapu po ke fakamauaga tuai kua papatiso ha tagata ke lata ma e tagata mate. Ko e Porofesa ko Gordon D. Fee ne tohi pihia foki: “Kua nakai fai fakataiaga he Tohi Tapu po ke fakamauaga tuai ke he puhala papatiso pihia. Ti nakai talahau foki he M[aveheaga] F[ou] na taute pihia he tau Kerisiano fakamua atu po ke he ha lotu ne fakatū he magaaho fakamui he mole e mamate he tau aposetolo.”

Pehē e Tohi Tapu ko e tau tutaki ha Iesu kua lata ke “o atu . . . ke eke e tau motu oti kana mo tutaki, ti papatiso atu a lautolu . . . ti fakaako atu . . . kia omaoma ke he tau mena oti” ne poaki atu e ia. (Mata. 28:19, 20) Ato eke e tagata mo tutaki papatiso, lata a ia ke fakaako, talitonu, mo e omaoma ki a Iehova mo e Haana Tama. Ko e tagata kua fitā he mate mo e haia he tukuaga ka nakai taute e mena ia; po ke maeke e Kerisiano moui ke taute ai ma e tagata kua mate.​—Fakama. 9:5, 10; Ioane 4:1; 1 Kori. 1:14-16.

Ti ko e heigoa e kakano he tala ha Paulo?

Falu Korinito ne talahau to nakai liu tutū mai a lautolu ne mamate. (1 Kori. 15:12) Totoko e Paulo e manatu ia. Fakakite e ia kua fehagai a ia mo e ‘mate ke he taha aho mo e taha aho.’ Ka e moui agaia a ia. Pete he lauia mo e tau hagahagakelea, mauokafua a ia ka mole e mate to fakaliu tu mai a ia ke he moui he lagi, tuga ni a Iesu.​—1 Kori. 15:30-32, 42-44.

Lata e tau Korinito ke mailoga, ke eke mo tau Kerisiano fakauku kua kakano to fehagai a lautolu mo e tau kamatamata he tau aho takitaha mo e mamate ato fakaliu tu mai a lautolu. He “papatiso ai kia Keriso Iesu” kua putoia e ‘papatiso ke he hana matulei.’ (Roma 6:3) Kakano e mena nei ke tuga a Iesu to lauia a lautolu ke he tau kamatamata ti mamate ke maeke ke fakaliu tu mai ke he lagi.

Molea e ua e tau he mole e papatiso ha Iesu ke he vai, tala age e ia ke he ua e aposetolo haana: “Katoa mo e papatisoaga ke papatiso ai au, to papatiso ai foki a mua.” (Mare. 10:38, 39) Nakai papatiso mogoia a Iesu ke he vai. Kakano a ia ko e fakatumau haana ke mahani fakamooli to takitaki atu ke he mate haana. Tohi e Paulo ko lautolu ne fakauku to liga “mamahi a [l]autolu fakalataha mo ia kia fakamonuina foki a [l]autolu fakalataha mo ia.” (Roma 8:16, 17; 2 Kori. 4:17) Ti to mamate foki a lautolu ke maeke ke fakaliu tu mai ke he lagi.

Ko e mena ia, kua hakotika e talahauaga ha Paulo: “Ka nakai pihia to eke fefe a lautolu kua papatiso ha ko lautolu kua mamate, kaeke kua moli nakai tuai tutu mai a lautolu kua mamate? ti ko e ha kia kua papatiso ai a lautolu ha ko lautolu kua mamate?”