Iyehe, eBiblia kutse ebitabu bye historiya sibikanirye okw’ikoleka ly’omwatsi oyo ko n’ahake.

Eribindulwa ly’omulondo oyo omo syo Biblia nyilebe lyabirileka abandi bandu ibalengekania bati eribatisibwa omo lusi omo rina ry’abaholi, lyanabya rikakoleka omo mughulu wa Paulo. Eky’erileberyako: “Abaholi bamabya isibelubukibawa n’ahake, busanaki abandu bakabatisibawa busana n’abaholi kwehi?”​—New International Version.

Aliwe, talebaya ebyo abasi emyatsi y’eBiblia bakabugha. Omughuma wa kubo yo Gregory Lockwood mwabugha ati, sihali kiminyisyo omo Biblia kutse omo mukania w’emyatsi ya kera ow’akakanganaya ngoko omundu mulebe mwabatisibwa omo mwanya w’omundu oyo wabirihola. Omo nzira ngumerera eyo, omughalima Gordon D. Fee naye mwahandika ati: “Sihali ekyakoleka embere mw’ekyerileberyako, omo myatsi eyalaba. EBiblia siyirikanaya oko lubatiso olo. N’ekitabu ky’Erilaghana Lihya nakyo sikikanirye ekyosi-kyosi oko lubatiso olo; sihali n’eritegheko n’erighuma erikanibweko omo bindi bisomo byosi kutse omo kisomo kyosi-kyosi ekikakwama emitsye y’ekisomo ky’eKikristo omo maghana w’emyaka eyabya yikwamire.”

EBiblia ikabugha yiti Yesu mwalayira abigha biwe ati “muyire abiga oko bihanda byosi, mubatisayebo . . . , mukangirirayebo bakole ebyosi ebyo nabiribahana”. (Mat. 28:19, 20) Embere omundu abye mwigha oyubatisibwe, angakangiriribwa eryowa Yehova na Mughala wiwe, n’eribikirirya. Omundu oyo wabirihola syangatoka erikola emyatsi eyo; n’oMukristo oyuliho sy’angatoka erimukolerayo.​—Omug. 9:5, 10; Yoa. 4:1; 1 Kor. 1:14-16.

Nikwa, Paulo abya akabugha atiki?

Abanya Korinto balebe ibakabugha bati sihendisyabya erilubukibwa ly’abaholi. (1 Kor. 15:12) Paulo mwabakangania ngoko amalengekania wabo ni wamabehi. Mwabugha ati ‘ali omo bwiko emigulu yosi.’ Kwenene, abya inyakineho. Aliwe nomw’anabya akalola omo bwiko, abya ayiketere ati enyuma sy’erihola angalubukibwe m’omundu oyuli n’obutoki ng’abamalaika, nga Yesu.​—1 Kor. 15:30-32, 42-44.

Abanya Korinto babya batolere eriminya ngoko eribya Bakristo abahirirwe kw’amaghuta kikendibaletera erilengwako mughulu wosi n’erihola embere sy’erilubukibwa. Eribya bandu “ababatisibawa erimatikana na Kristo” likaghenda haghuma ‘n’eribatisibwa erimatana n’oluholo luwe.’ (Rom. 6:3) Olubatiso lw’ekisosekanio olo ni bughambu, ngoko byahikira Yesu, nabo bangahikirwe n’erilengwako n’erihola busana n’erisyalubukibwa n’eriya elubula.

Enyuma sy’emyaka ibiri Yesu abibatisibwa omo lusi, mwabwira ababiri b’oko bakwenda biwe ati: “Mwasyabatisibwa omo lubatiso olo ngabatisibawamo.” (Mar. 10:38, 39) Hano Yesu syabya akabugha okw’ibatisibwa ly’omo lusi. Abya akabugha oko butaleghula bwiwe obwangamukolirye oko luholo. Paulo mwahandika ati abahirirwe kw’amaghuta ‘abakaghalawa haghuma na Kristo, basyasangira olukengerwa luwe.’ (Rom. 8:16, 17; 2 Kor. 4:17) Ni bughambu nabo bangaholire kandi n’erilubukibwa oko ngebe y’elubula.

Kwesi, ebinywa bya Paulo byangabindulwa bitya: ‘Abaholi bamabya isibendisyalubukibwa, bikasyabya biti oko bakabatisibawa olubatiso l’omo luholo? Abaholi bamabya isibendisyalubukibwa, neryo busanaki bakabatisibawa olubatiso ol’omuhanda oyo?’