Aowa, ga go na moo Beibele goba dipuku tše dingwe tša histori di re botšago gore Bakriste ba be ba kolobeletšwa bahu.

Tsela yeo temana ye e fetoletšwego ka yona ka Dibeibeleng tše dintši e dira gore batho ba bangwe ba nagane gore mehleng ya Bakriste ba pele batho ba be ba kolobeletšwa bahu. Ka mohlala Beibele e nngwe e re: “Ge e ba ka nnete bahu ba ka se tsoge, batho bao ba reng ba kolobeletšwa bahu?”—Taba ye Botse.

Eupša ekwa gore diithuti tše dingwe tše pedi tša Beibele di reng ka temana ye. Dr. Gregory Lockwood o boletše gore ga go na bohlatse bjo bo lego gona ka Beibeleng goba ka dipukung tše dingwe tša histori bjo bo bontšhago gore “go na le batho bao ba kilego ba kolobeletšwa bahu.” Seithuti se sengwe gape sa Beibele e lego Moporofesara Gordon D. Fee o dumelelana le taba yeo. O ngwadile gore: “Ka Beibeleng goba ka dipukung tša histori ga go na mohlala wa kolobetšo ya mohuta wo. O boletše gore kolobetšo yeo ga go bolelwe selo ka yona ka Testamenteng e Mpsha e bile ga go na bohlatse bja gore Bakriste ba pele ba kile ba e dira, le gona ga go na bohlatse bja gore batho ba dikerekeng tšeo di ilego tša ba gona ka morago ga gore baapostola ba hlokofale ba be ba kolobeletšwa bahu.

Beibele e re Jesu o laetše balatedi ba gagwe gore ba ‘dire batho ba ditšhaba ka moka barutiwa, ba ba kolobetše le go ba ruta go boloka dilo tšohle tšeo a ba laetšego tšona.’ (Mat. 28:19, 20) Pele motho e be e ka ba morutiwa yo a kolobeditšwego, o be a swanetše go ithuta ka Jehofa le Morwa wa gagwe a dumele go bona le go ba kwa. Motho yo a bego a šetše a hlokofetše o be a ka se kgone go dira seo, e bile mokriste yo a phelago o be a ke se kgone go mo direla seo.—Mmo. 9:5, 10; Joh. 4:1; 1 Bakor. 1:14-16.

Bjale Paulo o be a e ra go re’ng?

Batho ba bangwe ba kua Korinthe ba be ba bolela gore bahu ba ke se tsošwe. (1 Bakor. 15:12) Paulo o ile a ba bontšha gore seo ba bego ba se bolela e be e se nnete. O dirile seo bjang? O ile a ba botša gore ‘letšatši le letšatši o be a lebeletšana le lehu.’ Ke nnete gore ge a be a bolela mantšu a o be a sa phela. Eupša le ge a be a welwa ke dikotsi o be a kgodišegile gore ge a ka hlokofala, o be a tla tsošetšwa go yo phela legodimong go swana le Jesu.—1 Bakor. 15:30-32, 42-44.

Bakriste ba tloditšwego ba kua Korinthe ba be ba swanetše go kwešiša gore taba ya gore ke batlotšwa e be e e ra gore ba be ba tlo welwa ke diteko letšatši le letšatši ke moka ba swanelwa ke go hwa pele ba ka tsošetšwa go yo phela legodimong. Ka gona ge Bakriste bao ba be ba ‘kolobeletšwa go Kriste Jesu,’ ba be ba ‘kolobeletšwa le lehung la gagwe.’ (Baroma 6:3) Se se ra gore ka go swana le Jesu ba be ba tla welwa ke diteko le go hwa e le gore ba tle ba kgone go yo tsošetšwa go yo phela legodimong.

Mengwaga ya ka godimo ga e mebedi ka morago ga gore Jesu a kolobetšwe ke Johane, o ile a botša baapostola ba gagwe gore: “Kolobetšo yeo ke kolobetšwago ka yona le tla kolobetšwa ka yona.” (Mar. 10:38, 39) Kolobetšo yeo Jesu a bolelago ka yona mo, e be e se ya go kolobetšwa ka meetseng. Jesu o be a e ra gore go botegela ga gagwe Modimo go be go tla dira gore mafelelong a bolawe. Paulo o ngwadile gore batlotšwa ba be ba tlo ‘tlaišega le Jesu e le gore ba tle ba kgone go tagafatšwa le yena’. (Baroma 8:16, 17; 2 Bakor. 4:17) Ka gona le bona ba be ba swanetše go hlokofala pele ba ka tsošetšwa go yo phela legodimong.

Ka gona, mantšu a Paulo a fetolelwa ka tsela e nepagetšego ka gore: “Go sego bjalo, bao ba kolobeletšwago gore e be bahu ba tla dira’ng? Ge e ba bahu le gatee ba ka se tsošwe, gona ke ka baka la’ng ba bile ba kolobeletšwa gore ba be bjalo?”