Nò. Ni Beibel ni buki históriko ta indiká ku e kristiannan tabatin kustumber di batisá pa hende ku a muri.

Den hopi Beibel, e versíkulo ei ta pone algun hende pensa ku den tempu di Pablo e kristiannan tabata batisá pa hende ku a muri. Por ehèmpel, Beibel na papiamentu koriente ta bisa: “Ta ki nodi tin pa nan [batisá pa esnan ku a muri kaba], si en bèrdat defuntu no ta lanta fo’i morto?”

Pero, ripará loke dos eksperto riba tereno di Beibel a bisa. Dr. Gregory Lockwood a bisa ku no tin prueba den Beibel ni den historia ku hende tabata batisá pa hende ku a muri. Profesor Gordon D. Fee ta di akuerdo. El a skirbi ku no tin ehèmpel den Beibel òf den historia tokante e tipo di boutismo ei. El a bisa ku Tèstamènt Nobo no ta menshoná esei. Ademas, no tin prueba ku e kristiannan di promé siglo ni niun iglesia ku a lanta siglonan despues a hasi esei.

Beibel ta bisa ku Hesus su siguidónan mester a “hasi hende di tur nashon . . . disipel, i batisá nan . . . i siña nan kumpli ku tur loke” el a manda nan. (Mat. 28:19, 20) Pa un hende bira un disipel batisá, e mester siña tokante Yehova i Su Yu, kere den nan i obedesé nan. Un hende ku ya a muri no por hasi esei. Anto un kristian ku ta na bida no por hasi esei p’e tampoko.—Ekl. 9:5, 10; Huan 4:1; 1 Kor. 1:14-16.

Awèl, kiko Pablo tabata ke men anto?

Algun kristian na Korinto no tabata kere den resurekshon. (1 Kor. 15:12) Kon Pablo a korigí nan? El a bisa nan: “Tur dia mi ta haña mi kara kara ku morto.” Pero apesar ku e tabata pasa den vários peliger, e tabatin sigur ku, despues ku e muri, lo e ser resusitá pa biba den shelu meskos ku Hesus.—1 Kor. 15:30-32, 42-44.

E korintionan mester a komprondé ku komo kristian ungí, tur dia nan lo a haña nan ku prueba i ku nan mester a muri fiel pa nan por a ser resusitá pa biba den shelu. Ku otro palabra, “batisá den union ku Kristu Hesus,” a nifiká “batisá den union ku su morto.” (Rom. 6:3) E boutismo simbóliko ei a enserá ku, meskos ku Hesus, nan lo a pasa den prueba i lo a muri promé ku nan ser resusitá pa biba den shelu.

Vários aña despues ku Hesus a batisá den awa, el a bisa dos di su apòstelnan: “Boso lo ser batisá ku e boutismo ku kua mi ta ser batisá.” (Mar. 10:38, 39) Pues, loke e tabata ke bisa ta ku su fieldat na Dios lo a resultá den su morto. Pablo a skirbi ku e ungínan lo a “sufri huntu [ku Hesus], pa [nan] por ser glorifiká tambe huntu kuné.” (Rom. 8:16, 17; 2 Kor. 4:17) Ke men, nan tambe mester a muri pa nan ser resusitá pa biba den shelu.

A base di tur esei, Pablo su palabranan por ser tradusí korektamente asin’akí: “Kiko di esnan ku ta risibí e boutismo den morto? Si e mortonan lo no ser lantá, pakiko nan ta risibí e tipo di boutismo akí anto?”