Ndo sha, gushigo nu fundo dimoshi mu Biblia nga mikanda iko ikulu yana gumonesa egi ndaga ya luholo elu yakalegewe.

Luholo abalumuine verse eyi mu Biblia jiavula yana gutuma athu avula ha gutangiza egi mu tangua dia Phaula, athu akhalele mubatijiwa mukunda nu athu a gufua. Ha gufezegesa, Biblia jiko jiana guzuela egi: “Gula gufuzumuga gushigo guene, mukunda natshi athu adi mubatijiwa mukunda nu athu a gufua?”

Uvi tutadilenu ndaga enya ndunge mbadi adi muzuela. Dr. Gregory Lockwood udi muzuela egi: “Gushigo nga nu gijiyishilo gimoshi mu Biblia nga mu mikanda iko ikulu gidi mumonesa egi gudi nu athu akhalele mubatijiwa mukunda nu athu a gufua.” Luholo lumoshi nji, Professeur Gordon Donald Fee wasonegele egi: “Gushigo nga nu mukanda umoshi ukulu nga verse imoshi ya Biblia idi muzuelela gubatijiwa gua luholo elu. Gikotelo gihe-gihe nji gianago guzuelela ndaga eyi; gushigo nga gijiyishilo gimoshi gidi mumonesa egi Aklisto a mu siekle ya thomo akalegele ndaga eyi. Mangumba nga ikombelelo iko inyi yazogele matangua azonda gungima dia gufua gua apostolo akalegelego ndaga ya luholo elu.”

Biblia yana guzuela egi Yesu wawambelele alandudi enji egi: “Ndenu gudi athu a ifutshi yagasue, muaabuise alandudi ami, muaabatize . . . , muaalongese ha gutumagele ndaga jiagasue ngamiwambelele.” (Mat. 28:19, 20) Gutuama egi muthu abatijiwe ha gubua mulandudi, udi naye gulonguga ha gujiya Yehowa nu Mun’enji, udi naye guatumagela nu gumonesa gutshigina guenji gudi ene. Muthu wa gufua yonu udi mu malumba gajiyilego gutshita ndaga eji; Muklisto udi nu monyo gajiyilego nji gutshita ndaga eji mukunda nu muthu wa gufua.—Mulo. 9:5, 10; Yone 4:1; 1 Kol. 1:14-16.

Na itshi Phaula atshiginyile diago guzuela?

Enya gu Kolinto ako akhalele musha giphapha (maya) egi athu mbaashigo mufuzumuga. (1 Kol. 15:12) Phaula waamonesele egi matangi awo akhalele abola. Waalezele egi: ‘Wakhalele mutagana nu gufua lusugu nu lusugu.’ Idi yadiago egi muene wakhalele yowu genji nu monyo. Wakhalele mutagana nu ingonza yavula, uvi wakhalele nu gutshigina egi gula wafua mbawudi mufuzumuga nu muila wa mu nyuma, gifua Yesu.—1 Kol. 15:30-32, 42-44.

Enya gu Kolinto akhalele naye gukotelesa egi, gukhala Muklisto wambiwe maji mu nyuma guakotelesa egi adi naye gutagana nu malamba lusugu nu lusugu, nu adi naye gufua gutuama egi afuzumuge. “Gubatijiwa mu Klisto Yesu” guakotelesa nji egi “gubatijiwa mu gufua guenji.” (Lomo 6:3) Idi mumonesa egi ene nji akhalele naye gumona malamba gifua Yesu, nu akhalele naye nji gufua ha gufuzumuga ha guya mu dilu.

Ha batijiwe Yesu mu meya, gungima dia ivo mbadi wawambelele apostolo enji mbadi egi: ‘Gubatiza ngudi mubatijiwa ame, guene enue nji mbamubatijiwa.’ (Mako 10:38, 39) Yesu akhalelego muzuelela gubatijiwa gua mu meya. Guzuela guenji gudi mukotelesa egi gusala ya gujinginyina gudi Nzambi guakhalele naye gumubatela gufua. Phaula wasonegele egi Aklisto ambiwe maji mu nyuma adi naye ‘gumona n’enji lamba hamoshi hagula [mbaa] tumbuishiwe nji n’enji hamoshi.’ (Lomo 8:16, 17; 2 Kol. 4:17) Hene, ene nji akhalele naye gufua ha gufuzumuga ha guya mu dilu.

Hene, mbimbi jia Phaula jiajiya gubalumuiwa luholo elu: “Luko, itshi mbayikalagala athu adi mubatijiwa gula adi naye gufua? Gula athu mbaashigo mufuzumuga, mukunda natshi giwa adi naye gubatijiwa luholo elu?”