Jeʼ taj. Ni pa ri Biblia ni pa ri e wuj re historia kqʼalajin wi che xbʼan wariʼ.

Pa kʼi Biblias, wajun versículo kuya ubʼixik che pa ri utiempo ri Pablo e kʼo winaq che kkibʼan kiqasanjaʼ rumal re jun winaq che kaminaq chik. Jun kʼutbʼal, ri Nueva Traducción Viviente kubʼij wariʼ: «We ri kaminaqibʼ kekʼastajisax taj, ¿jas upatan kkibʼan kiqasanjaʼ ri e winaq rumal ke ri kaminaqibʼ?».

Are kʼu, chqilaʼ ri xkitzʼibʼaj kebʼ comentaristas bíblicos. Ri teólogo Gregory Lockwood xubʼij che ri chomanik che ri winaq kubʼan uqasanjaʼ «rumal re jun winaq che kaminaq chik» are «jun qasanjaʼ che jalan ubʼanik kʼo ta kriqitaj wi ni pa ri historia ni pa ri Biblia». Kjunamataj rukʼ wariʼ, ri profesor Gordon Fee xutzʼibʼaj: «Kʼo ta kubʼij pa ri historia o pa ri Biblia che kʼo jun qasanjaʼ junam rukʼ wariʼ. Ri NT [Nuevo Testamento] kʼo ta kubʼij chrij wariʼ; kʼo ta kbʼanow wariʼ pa ri nikʼaj chi iglesias, ni pa ri kojonem cristiana ortodoxa».

Junam che kubʼij ri Biblia, Jesús xubʼij: «Chibʼanaʼ tijoxelabʼ chke ri winaq pa konojel ri tinamit cho ri uwach ulew. Chibʼanaʼ kibautismo [...]. Cheʼitijoj che unimaxik ronojel jas ri xixintaq wi» (Mat. 28:19, 20). Rumal laʼ, rech jun winaq kubʼan uqasanjaʼ, rajawaxik kkʼojiʼ retaʼmanik chrij ri Jehová y ri Jesús, kkojon chkij y keʼunimaj. Y qas qʼalaj che jun winaq kaminaq chik y muqum chik kkun taj kubʼan uqasanjaʼ xuqujeʼ kuya taj che jun cristiano kʼaslik kubʼan uqasanjaʼ rumal re jun winaq che kaminaq chik (Ecl. 9:5, 10; Juan 4:1; 1 Cor. 1:14-16).

Rumal laʼ, ¿jas xraj xubʼij Pablo pa 1 Corintios 15:29?

Pa ri congregación re Corinto, e jujun kekojon ta chrij ri kʼastajibʼal (1 Cor. 15:12). ¿Jas xubʼan Pablo che kitoʼik? Areʼ xubʼij chke: «Qʼij chi qʼij kinkamik». Kʼa kʼasal na chiʼ xubʼij wariʼ, are kʼu paneʼ xuqʼaxej kʼi kʼaxkʼolil xukubʼsaj ukʼuʼx che are chiʼ kkʼastajisaxik kux jun uxlabʼal che kʼo nim uchuqʼabʼ, junam rukʼ ri Jesús (1 Cor. 15:30-32, 42-44).

Ri cristianos re Corinto rajawaxik riʼ kkichʼobʼo che, rumal che e chaʼom kebʼe pa ri kaj, kkiriq na kʼi kʼax ronojel qʼij y kekam na rech kekʼastajisaxik. Rumal laʼ Pablo xubʼij: «Xbʼan ri qabautismo [pa ri Cristo Jesús]» kraj kubʼij «[e] junatajinaq chik rukʼ ri Cristo Jesús pa ri ukamikal» (Rom. 6:3). Wajun qasanjaʼ che xa jun etal kraj kubʼij che, junam rukʼ ri Jesús, kkiriq na kʼax y kekam na rech kekʼastajisaxik y kebʼe pa ri kaj.

Are chiʼ qʼaxinaq chi kebʼ junabʼ che Jesús ubʼanom uqasanjaʼ pa joron, xubʼij wariʼ chke e kebʼ rapóstoles: «E ri qasnaʼ che kinkʼam na ri in, kikʼam na ri ix» (Mar. 10:38, 39, Ri Tyoxlaj Wuj). Ri e tzij riʼ kraj ta kubʼij che Jesús tajin kubʼan uqasanjaʼ. Ri xraj xubʼij ri Jesús rukʼ wariʼ are che we jun cristiano rukʼ sukʼilal kupatanij ri Dios kuriq na ri kamikal. Pablo xutzʼibʼaj che ri e chaʼom kebʼe pa ri kaj kkiriq na kʼax rukʼ ri Cristo rech xuqujeʼ kkiriq na ri nimalaj juluwem o gloria rukʼ pa ri kaj (Rom. 8:16, 17; 2 Cor. 4:17). Wariʼ kraj kubʼij che e areʼ xuqujeʼ rajawaxik kekam na nabʼe rech kekʼastajisax pa ri kaj.

Rumal laʼ, ri tzij che xubʼij Pablo kojkunik kqabʼij pa nikʼaj chi tzij, junam rukʼ wariʼ: «We man jeriʼ, ri kkijunamaj kibʼ kukʼ ri kaminaqibʼ, ¿jasche kkibʼano? We ri kaminaqibʼ man kekʼastaj taj, ¿jasche kbʼan wajun qasanjaʼ riʼ?».