Im-him. A Bibeleni kumbe ka matimu, a ku na ntxhumu xi kombisaka leswaku vakriste a va ni xihena lexo.

Ndlela leyi ndzrimana leyi yi ndzruluteliwiki ha yone, yi yentxa leswaku vhanu va pimisa leswaku a masikwini ya Pawulo a ku ni xihena xa leswaku vhanu va babatiseliwa vafi. Hi xikombiso, a Bibele dra Kuxwenga dzri li: ‘Loko kunene a vafi va nga ha pfuki, xana ha yini ku ni lava va babatiseliwaka vone?’

Xiya leswi swidondzri swibidzri swa Bibele swi swi hlayiki. Dotori Gregory Lockwood a hlaye leswaku ka matimu ya vhanu kumbe a Bibeleni, a ku kone lomu ku khaneliwaka hi ku va vhanu va babatiseliwa lava fiki. Prisori wa univhersidade, Gordon D. Fee a hlaye leswi fanaka, a te: “A matin’wini ya vhanu kumbe a Bibeleni, a ku kone lomu ku khaneliwaka hi muxaka lowo. A matsralweni ya xigriki a ku na mbangu lomu ku khaneliwaka hi mhaka leyi. Nakone a ku na ntxhumu lowu hi tiyisekisaka leswaku babatiso dzra muxaka lowo a dzri yentxiwa hi vakriste va ku sungula kumbe hi wukhongoti byin’wana lebyi humeleliki ntsrhaku ka dzana dzra ku sungula.”

A Bibele dzri hlaya leswaku vakriste va ku sungula a va fanela ku ‘yentxa vadondzrisiwa va matiko hinkwawu va va babatisa . . . , ni ku va dondzrisa ku bekisa hinkwaswu’ leswi a va leletiki swone. (Mt 28:19, 20, TLM) Akuva mhunu a va mudondzrisiwa lweyi a babatisiwiki, ku sungula a fanela ku dondzra hi Yehovha ni N’wanakwe, a pfumela ku vone ni ku va yingiseta. Mhunu lweyi a fiki a nge swi yentxi leswo. Nakone mukriste lweyi a hanyaka a nge mu yentxeli leswo.​—Ekl 9:5, 10; Yh 4:1; 1Ko 1:14-16.

I yini leswi Pawulo a a djula ku swi hlaya?

Van’wana a Korinte a va nga kholwi leswaku vafi a va ta pfuxiwa. (1Ko 15:12) Pawulo a dzringise ku va komba leswaku mavonela wolawo a ma hoxekile. A hlaye leswaku a ‘a [lwisana] ni lifu masiku hinkwawu’. Handle ka ku ganaganeka, Pawulo a a nga fanga. Nambi leswi a tlhanganiki ni swikazratu swinyingi, a a dumba leswaku ntsrhaku ka loko a file a a ta pfuxiwa akuva a hanya a matilweni ku fana na Yesu.​—1Ko 15:30-32, 42-44.

Va le Korinte a va fanela ku twisisa leswaku ku va mhunu a va mutotiwa, a swi tlhamuxela leswaku a a ta tlhangana ni swikazratu swinyingi ni ku tlhela a fa na a nge si ya a tilweni. Ku va mhunu ‘a babatisiwa ku Kriste’ a swi patsra ku va a ‘babatiseliwe ku feni kwakwe’. (Ro 6:3) Babatiso ledzri Pawulo a khaneliki ha dzrone dzri tlhamuxela leswaku ku fana na Yesu, vakriste lava totiwiki a va ta langusana ni mindzringo va za va fa. Ntsrhaku, a va ta pfuxeliwa ku ya hanya a matilweni.

Ntsrhaku ka malembe mabidzri na Yesu a babatisiwile, a byele vadondzrisiwa vabidzri a ku: ‘Na dzro babatiso ledzri ni babatisiwaka ha dzrone, n’wi ta babatisiwa ha dzrone na n’wine.’ (Mr 10:38, 39) Yesu a a nga khanele hi babatiso dzra mati. A a djula ku hlaya leswaku hi ku va a dumbeka ka Xikwembu Nkulukumba, a a ta fa. Pawulo a hlaye leswaku loko vatotiwa va ‘yingela ku vaviseka kun’we na Kriste a va ta phatimisiwa kun’we na Kriste’. (Ro 8:16, 17; 2Ko 4:17) Leswo a swi djula ku hlaya leswaku na vone a va fanela ku fa akuva ntsrhaku va pfuxeliwa ku ya hanya a tilweni.

Ntsrhaku ka loko hi bule hi hinkwaswu leswi, mazritu ya Pawulo ma nga ndzruluteliwa hi ndlela leyi: “Loko swi li tanu, xana va ta yentxa yini lava babatisiwiki na va nge ti pfuxiwa? Loko lava fiki va nge ti pfuxiwa, ha yini vhanu va babatisiwa loko ku li leswaku a va nge ti pfuxiwa?”