Lako, Mande, lako etena kɛmɔtshi lá Bible kana kel’enkanda ɛmɔtshi w’ɛkɔndɔ, k’ɛnyɛ djɛ Akristo walongolaki batisimo lá wapɔ w’anto wavɔ.

Wopo w’iyakadjimola vɛrsɛ djɛnɛ lá nkadjimwelo efula djela Bible, ntshindaka anto amɔtshi dj’iwɔ nkanela ambɔ batisimo kelá wapɔ w’anto wambovɔ k’ananghemaki l’etsho wɛ Poolo. Ndjɔmbɔmba, ekadjimwelo kɛ Bible k’ekila nkadjimolaka vɛrse djɛnɛ ante: ‘Ntsha anto wambovɔ wapangokfundɔ okoma wɔkɔna wabatizamelawɔ?’

Koko, kolenda kɛnɛ ketepelisa andjewi ipe yɛ Bible yɛnɛ. Dr. Gregory Lockwood atepelaka ante: “Lako ekete kɛnyɛ lá Bible kana l’ɛkɔndɔ” ente anto “amɔtshi walongolelaki anto wambovɔ batisimo.” Wopo wɔk’ɔmɔ ndeke, wetsha welá inivɛrsite Gordon D. Fee afunaka ante: “Lako kaanga ndjɔmbɔmba kɛmɔtshi kelá Bible k’ɛnyɛ djɛ batisimo djɛ nghɔsɔ djanangemaki. Daka djɛ bango mpatepela nkambo djɛsɔ, wopo wɔ batisimo djɛ nghɔsɔ djetananghema me Akristo wel’ɛtɛndɔ kɛ ntondo kana lá nkɛlɛsiya djenanghemisa ndambo daambi m’ɔkɔngɔ wa nyɔyi k’apɔstɔlɔ.”

Bible ntepelaka ante ambeki wa Yeso ‘wangokfumba anto ambeki l’ewila enkfumɔ, wangabatizɛ . . . , wangalakanyɛ djɛ nɛmɛyɛ akambo ankfumɔ’ w’indashimela. (Mat. 28:19, 20) Lá ntondo k’onto nkoma ombeki wombolongola batisimo, nde ladjɛ ndjeka akambo walendana la Yehova nya Wɔnande Yeso, ndjala la djawo tewɔ edjinge ndaalɛmɛyɛ. Onto womboshiyɛka mvɔ edjinge wolekɔ l’anketa apakoke nangha nkambo djɛsɔ, kaanga Okristo wolekɔ la lowiko apakoke nanghela kanga lombovɔ nkambo djɛsɔ.​—Los. 9:5, 10; Dj. 4:1; 1 Kɔ. 1:14-16.

Iya, kɛkɔnge kɛkɔpisa Poolo ntepela?

Ase Kɔrɛtɔ amɔtshi watawolaki ambɔ anto wambovɔ wangokfundɔ. (1 Kɔ. 15:12) Poolo awɛnyɛka ante nkambo ntshɔ ndekɔ ongolo. Wopo wɔkɔnge? Nde ɛnyɛka ante ‘nfu inkfumɔ nde ahandaki nyɔyi.’ Nsɔsɔlɔ nde ayalaki ngo la lowiko. Koko kaanga ndahadaka nyɔyi yɛsɔ, nde ayalaki ngo la eshikikelo ante kaanga nde kovɔka, nde angokfundɔ m’ɔkɔngɔ wɔ nyɔyi kɛnde entengo etongami kɛ nyuma kɛ nkfulu, wopo wokfundwisa Yeso.​—1 Kɔ. 15:30-32, 42-44.

Ase Kɔrɛtɔ wayalaka ladjɛ ndjewa ambɔ ndjala Okristo wombokfutama avuta, nsakisolaka ante wangopomana l’ekakasano wɛ loshi la loshi, edjinge wangovɔ lá ntondo k’iwɔ ndokfundɔ. ‘Mbatizama lá Kristo Yeso’ nsakisolaka ‘mbatizama lá nyɔyi kɛnde.’ (Ɔrɔ. 6:3) Nkambo djɛsɔ nsakisolaka djɛ, entengo Yeso, iwɔ mpombanaka l’ekakasano edjinge mvɔka, ko ndokfundɔ.

Ɛnɔnyi ndekana epe m’ɔkɔngɔ wɔ Yeso ndongola batisimo djɛnde lá washi, nde ashimelaka apɔstɔlɔ wande ape ante: ‘Nyongolongola batisimo dj’ɔkɔpami ndongola.’ (Mar. 10:38, 39) Yeso atalongola batisimo kelá washi lá mbala kɛsɔ. Nde akɔpaka ntepela ante, ntshikala la nkɔmano te Ndjambe angɔtɔla tá nyɔyi. Poolo afunaka ante: Akristo w’ankfutami ‘wangosowa esanga lande dj’iwɔ ndowa wumo esanga lande.’ (Ɔrɔ. 8:16, 17; 2 Kɔ. 4:17) Djɛkondeke, ngole iwɔ wayalaka ladjɛ mvɔ ko ndonkfundɔ djɛ ntɔsɛna l’olongo.

Djɛkondeke, etepela wɛ Poolo nkoka nkadjimwama nghɔnɛ ente: ‘Kɛkɔnge kengokomela wanɛ walongola batisimo l’ikanyi y’iwɔ mvɔ? Iya ntsha edjo wapangokfundɔ, ladjikɛnge olongolawɔ batisimo l’ikanyi y’iwɔ mvɔ?’