Lae, Bíblia no mós livru istória nunka fó sai katak ema Kristaun balu hetan batizmu atu troka ema neʼebé mate.

Dalan neʼebé Bíblia barak tradús Paulo nia liafuan neʼe halo ema balu hanoin katak iha Paulo nia tempu, ema hetan batizmu hodi troka ema neʼebé mate. Porezemplu, Tetun Dili Alkitab hatete: “Iha ema balu hakarak simu batizmu atu troka ema mate nebee mak seidauk sarani. Maibee se ema mate la moris fali, nusaa mak sira hakarak troka fali ema mate?”

Haree saida mak matenek-naʼin kona-ba Bíblia hatete. Dr Gregory Lockwood hatete katak la iha evidénsia iha Bíblia ka livru istória neʼebé hatudu katak ema hetan batizmu hodi troka ema neʼebé mate ona. Profesór Gordon D. Fee mós hakerek katak Bíblia ka livru istória la temi ezemplu kona-ba batizmu hanesan neʼe. Nia mós hatete katak Testamentu Foun nunka temi kona-ba neʼe no la iha evidénsia katak ema Kristaun iha tempu uluk ka igreja sira neʼebé harii depois apóstolu sira-nia tempu halo hanesan neʼe.

Bíblia hatete katak Jesus nia dixípulu sira presiza ‘hanorin ema husi nasaun hotu atu sai dixípulu, fó batizmu ba sira . . . , hanorin sira atu halo tuir mandamentu hotu’ neʼebé nia fó ona ba sira. (Mt 28:19, 20) Antes ema ida hetan batizmu, nia presiza aprende, fiar, no halo tuir Jeová no Ninia Oan-Mane. Ema neʼebé mate no iha rate laran labele halo ida-neʼe, no ema Kristaun neʼebé moris hela labele halo ida-neʼe hodi troka ema neʼebé mate.​—Ecle 9:5, 10; João 4:1; 1 Kor 1:14-16.

Entaun Paulo nia liafuan katak sá?

Ema Kristaun balu iha Korinto la fiar katak ema mate sei moris hiʼas fali. (1 Kor 15:12) Paulo hatudu katak sira-nia hanoin mak sala. Nia hatete katak ‘loroloron nia hasoru perigu mate’. Maski Paulo hasoru perigu, maibé nia fiar metin katak bainhira nia mate, nia sei hetan moris-hiʼas nuʼudar kriatura espíritu neʼebé kbiit boot hanesan ho Jesus.​—1 Kor 15:30-32, 42-44.

Ema Kristaun iha Korinto presiza komprende katak nuʼudar ema neʼebé iha esperansa atu bá lalehan, sira sei hasoru susar loroloron no mate ho laran-metin atu bele hetan moris-hiʼas ba lalehan. Bainhira sira “hetan batizmu iha Kristu Jesus”, sira mós “hetan batizmu iha nia mate”. (Rom 6:3) Neʼe katak sira presiza tahan susar loroloron no mate atu bele moris hiʼas ba lalehan.

Tinan rua depois Jesus hetan batizmu iha mota Jordaun, nia hatete ba ninia apóstolu naʼin-rua: “Imi sei hetan batizmu ho batizmu neʼebé haʼu atu hetan.” (Mc 10:38, 39) Iha eskritura neʼe, Jesus la koʼalia kona-ba hetan batizmu ho bee. Maibé ninia liafuan neʼe hatudu katak bainhira nia laran-metin ba Maromak, ikusmai nia sei mate. Paulo hakerek katak Kristu nia alin sira sei “hetan terus hamutuk ho Kristu, atu [sira] mós bele simu glória hamutuk ho nia”. (Rom 8:16, 17; 2 Kor 4:17) Entaun, sira mós presiza mate atu bele hetan moris-hiʼas ba lalehan.

Tan neʼe, Paulo nia liafuan bele tradús nuʼudar: “Se ema mate sira la moris hiʼas fali, saida mak sei akontese ba sira neʼebé hetan batizmu ho objetivu atu mate? Tanbasá mak sira hetan batizmu hanesan neʼe?”