Aha’a, tsy izay. Tsy misy tantara magnamaregne izay ty amy Baiboly ao ndra amy ty boke hafa.

Fa nagnino ro misy ndaty mieretseretse tie nisy Kristiana tamy ty andro i Paoly natao badisa mba ho solo o ndaty fa nimateo? Noho ty fomba nandikagne o andine’e iohoe amy ty Baiboly maro. Izao ohatse ty nandikà ty Baiboly ila’e aze: “Naho tsy hovelomegne areke ty mate, le nagnino o ndaty atao badisa reo ro atao badisa mba ho solo o mateo?”

Mareho ty raha nirehafe ty ndaty manam-pahaizagne miomba ty Baiboly retoa. Hoe ty Profesora atao tihoe Gregory Lockwood: “Tsy misy porofo ty amy Baiboly ao tie nisy ndaty natao badisa mba ho solo o ndaty fa nimateo. Tsy misy tantara magnamaregne izay ka.” Hoe ka ty Profesora atao tihoe Gordon D. Fee: “Ndra o Baibolio ndra ty boke hafa, le tsy mirehake tie nisy ndaty natao badisa hoe izay. Tena tsy misy firehafagne miomba izay ndra kidikidy ty amy Testamenta Vaovao ao. Tsy misy porofo ka ty ao tie natao badisa hoe izay ty Kristiana tamy ty taonjato voaloha’e. Ndra ty fivavahagne nisy tafara kede ty nimateza o apostolio aza tsy nanao hoe izay.”

Rehafe ty Baiboly fa nandily o mpanonjohy ty lia’eo ty Jesosy tie: “Anò mpianatse ze ndaty amy ty tane toy iaby, le anò badisa iareo, ... Ampianaro iareo mba hiambegne ze raha nandiliako anareo.” (Mat. 28:19, 20) Aseho io fa mila mianatse naho mino vaho mankatò i Jehovah naho i Ana-dahi’ey ty ndaty raike vaho izay azo atao badisa. Faie tsy afake manao izay o ndaty fa nimateo sady tsy afake manao izay hoahy iareo ka o ndaty mbe velogneo.​—Mpito. 9:5, 10; Jaona 4:1; 1 Kor. 1:14-16.

Ino areke ty tea i Paoly ho rehafegne?

Nisy Korintiana ila’e nirehake fa tsy hisy ze o famelomagne ty mate zao. (1 Kor. 15:12) Faie niporofoe i Paoly tamy iareo fa tena hisy zay. Amy ty fomba akore? Nirehafe’e tamy iareo fa misy loza atahoragne hahafate aze isan’andro. Faie natoky reke fa ndra tie mate aza, le hovelomegne indraike sady hiaigne an-dagnitse agne, manahake i Jesosy.​—1 Kor. 15:30-32, 42-44.

Mila taka o Korintianao fa ze Kristiana voahosotse, le hiatreke raha sarotse isan’andro sady ho mate hey ka vaho izay hovelomegne. Ty anto’e, naho fa iareo “natao badisa ho amy i Kristy”, le “natao badisa ho amy ty fahafateza’e” ka. (Rom. 6:3) Midika zay fa hiatreke raha sarotse naho fahafatezagne manahake i Jesosy o Kristiana voahosotseo. Afara izay iareo vaho hovelomegne mba hiaigne an-dagnitse agne.

Taogne tsiampeampe tafara ty nanoagne badisa i Jesosy, le nirehake tamy ty apostoli’e roe reke tie: “Hatao badisa amy i badisa fa anoagne ahy badisay nareo.” (Mar 10:38, 39) Tsy natao badisa tagnate rano ty Jesosy tafara io. I badisa’e amy i fahafatezagney ty tea’e ho rehafegne. Midika zay tie hiafara amy ty famonoagne aze ty tsy fivaliha’e aman’Andrianagnahare. Nanoratse tamo o voahosotseo ty Paoly tie ‘hiarake hijale amy i Kristy iareo mba homeagne voninahitse miarake ama’e ka.’ (Rom. 8:16, 17; 2 Kor. 4:17) Tsy maintsy mate hey areke iareo vaho izay ho afake hovelomegne mba hiaigne an-dagnitse agne.

Hoe izao areke ty fomba mete soa toko’e handikagne o reha i Paoly iohoe: “Naho tsy izay, le inogne ty soa ho azo i aze atao badisa mba ho mate reo? Naho toe tsy hovelomegne indraike vata’e o mateo, nagnino iareo ro atao badisa ka mba ho mate?”