‘Ikai, ‘oku ‘ikai ke fakahaa‘i ‘i he Tohi Tapú pe ko e hisitōliá na‘e fai ha me‘a pehē.

Ko e anga hono liliu ‘o e veesi ko ení ‘i he ngaahi Tohi Tapu lahi kuo taki atu ai ‘a e ni‘ihi ke nau fakakaukau ko e papitaiso ‘i he vaí ma‘á e kau maté na‘e fakahoko ia ‘i he taimi ‘o Paulá. Ko e fakatātaá: “Kapau ‘oku ‘ikai ‘aupito ha fokotu‘u ‘o e pekia, pea koe‘uma‘ā honau papitaiso ma‘anautolu?”​—Paaki Fo‘ou.

Kae kehe, fakatokanga‘i ‘a e fakamatala ‘a ha ongo mataotao Tohi Tapu. Na‘e pehē ‘e Dr. Gregory Lockwood ko e fakakaukau fekau‘aki mo e fakahoko ‘o e papitaisó “ma‘á e tokotaha kuo maté ko ha founga ia ‘o e papitaisó, ‘a ia ‘oku fakapapau‘i na‘e ‘ikai hā ia ‘i he hisitōliá pe Tohi Tapú.” ‘I he tu‘unga meimei tatau, na‘e tohi ‘e Palōfesa Gordon D. Fee: “‘Oku ‘ikai ha fakamo‘oni fakahisitōlia pe fakatohitapu ki ha papitaiso pehē. ‘Oku ‘ikai ‘aupito ha lave ia ‘a e F[uakava] F[o‘oú] fekau‘aki mo ia; ‘oku ‘ikai ke ‘ilo‘i hano ngāue‘aki ia ‘i he ngaahi siasi kehé pe ‘i ha komiunitī ‘o e kau Kalisitiane ‘ofotokisī ‘i he laui senituli ki mui ai.”

‘Oku pehē ‘i he Tohi Tapú ko e kau muimui ‘o Sīsuú ke nau “ngaohi ko e kau ākonga ‘a e kakai ‘o e ngaahi pule‘anga kotoa pē, ‘o papitaiso kinautolu . . . , pea ako‘i kinautolu ke nau tauhi ‘a e ngaahi me‘a kotoa pē” na‘á ne fekau‘i maí. (Māt. 28:19, 20) Ki mu‘a ke hoko ha taha ko ha ākonga ‘osi papitaiso, na‘e fiema‘u ke ne ako, tui pea talangofua kia Sihova mo Hono ‘Aló. Ko ha tokotaha na‘e ‘osi mate pea ‘i he fa‘itoká he‘ikai lava ke ne fai ia; pe ko e lava ke fai ia ma‘ana ‘e ha Kalisitiane ‘oku kei mo‘ui.​—Tml. 9:5, 10; Sione 4:1; 1 Kol. 1:14-16.

Ko e hā leva na‘e ‘uhinga ki ai ‘a Paulá?

Ko e ni‘ihi ‘o e kau Kolinitoó na‘a nau faka‘ikai‘i ‘e toe fokotu‘u hake ‘a e kau maté. (1 Kol. 15:12) Na‘e faka‘ikai‘i ‘e Paula ‘a e vakai ko iá. Na‘á ne pehē na‘á ne “fehangahangai faka‘aho pē mo e maté.” Ko e mo‘oni, na‘á ne kei mo‘ui pē. Ka neongo ‘ene hokosia ‘a e ngaahi faingata‘á, na‘á ne tuipau hili ‘a e maté ‘e fokotu‘u hake ia ko ha laumālie mālohi, hangē ko Sīsuú.​—1 Kol. 15:30-32, 42-44.

Na‘e fiema‘u ki he kau Kolinitoó ke nau ‘ilo‘i ko e hoko ko e kau Kalisitiane paní na‘e ‘uhinga iá te nau fehangahangai faka‘aho mo e ngaahi ‘ahi‘ahi pea mate ki mu‘a ke fokotu‘u hake kinautolú. Ko e hoko ‘o “papitaiso ‘ia Kalaisi Sīsuú” na‘e kau ki ai ‘a e “papitaiso ki he‘ene pekiá.” (Loma 6:3) Ko ‘enau papitaiso fakaefakatātaá ‘e taki atu ia ki he‘enau mate pea toetu‘u hake ki hēvaní.

Laka hake ‘i he ta‘u ‘e ua hili ‘a e papitaiso ‘a Sīsū ‘i he vaí, na‘á ne tala ange ki ha toko ua ‘o ‘ene kau ‘apositoló: “Ko e papitaiso ‘oku ou papitaiso aí, te mo papitaiso ai.” (Mk. 10:38, 39) Na‘e ‘ikai ko e toki papitaiso ia ‘a Sīsū ‘i he vaí. Na‘á ne ‘uhingá ko ‘ene ‘alunga hokohoko ‘o e anga-tonú ‘e taki atu ki he‘ene pekiá tonu. Na‘e tohi ‘e Paula ko e fa‘ahinga paní te nau “faingata‘a‘ia fakataha mo ia koe‘uhi ke [nau] hoko foki ai ‘o fakalāngilangi‘i fakataha mo ia.” (Loma 8:16, 17; 2 Kol. 4:17) Ko ia ko kinautolu foki kuo pau ke nau mate ke fokotu‘u hake ki he mo‘ui ‘i hēvaní.

Ko ia, ko e lea ‘a Paulá ‘oku totonu pē hono liliu pehení: “Ko ia ai, ko e hā ‘e fai ‘e he fa‘ahinga ko ia ‘oku papitaiso ki he maté? Kapau he‘ikai teitei fokotu‘u hake ‘a e maté, ko e hā leva ‘oku nau papitaiso ai pē ki he maté?”