Miyuk. Mini ja Biblia cha mini ja libroʼik bʼa loʼil wa xchiktes ta wa xtax ja skʼulajel jaw.

Bʼa jitsan sutubʼalik ja bʼa Biblia, ja bʼa bersikulo it wa xchiktes ja bʼa styempo ja Pablo ay matik wa xyiʼaje jaʼ yuj bʼa matik chamyeta. Jun sjejel, ja Nueva Traducción Viviente wa xyala jachuk: «Ta ja matik chamyeta mixa oj sakʼwuke, ¿jas yuj wa xyiʼaj jaʼ ja kristyano yuja bʼa matik chamyeta?».

Pe la kiltik ja jas stsʼijbʼane chawane matik wa xyalawe sbʼaja Biblia. Ja Gregory Lockwood paklanum bʼa Biblia yala ke ja pensar bʼa jun kristyano oj yi jaʼ «bʼa slokʼol yuj june bʼa chamta» kechani bʼa «jun modo yijel jaʼ, bʼa jastalni wa xbʼobʼ naxuk, mini ay bʼa wa syaka sbʼaj mini bʼa loʼilik cha mini ja bʼa Biblia». Juntikxtani, ja profesor Gordon Fee stsʼijbʼan: «Mini wa xtax bʼa jun loʼil cha mini ja bʼa Biblia ja bʼa tikʼe yijel jaʼ jaw. Ja NT [Nuevo Testamento] wa x-ajyi yuja bʼa tuk, tsʼikani jach chʼabʼan ja bʼa jaw; mini jun skʼulajel jachuk naʼubʼal sbʼaj ja bʼa tuk iglesyaʼik cha mini ja bʼa iglesya ortodoxa bʼa wa xyalawe snochumanik bʼa Kristo ja bʼa sigloʼik mojan ti nochanik».

Jastalni wa xyala ja bʼa Biblia, ja Jesús yala: «[Awik] och jnebumanil ja cristiano jumasa. Ti xa cʼulanex bautizara [...]. Jeahuic ba oj scʼuuque spetzanil ja jmandari» (Mat. 28:19, 20). Ja yuj, bʼa jun kristyano, oj kʼot jun nebʼuman bʼa yiʼonejxa jaʼ tʼilani oj snebʼ sbʼaja Jyoba sok ja Jesús, skʼuʼajel bʼa yenle sok ajyel kʼuʼabʼal. Sok chikani lek june maʼ chamelxa sok mukubʼalxa mixani xbʼobʼ skʼuluk, cha mini xbʼobʼ kʼulajukyi ja maʼ chamta yuj june maʼ sakʼanto (Ecl. 9:5, 10; Juan 4:1; 1 Cor. 1:14-16).

Anto, ¿jasa kʼan yal ja Pablo ja bʼa 1 Corintios 15:29?

Jujuntik ja bʼa kongregasyon bʼa Corinto, jujuntik mi skʼuʼane ja bʼa sakʼwelal (1 Cor. 15:12). ¿Jastal tojiye yuj ja Pablo? Ja yeʼn yala yabʼye: «Kʼakʼu kʼakʼu wa xtʼaspun ja chamelali». Meran, sakʼantoni ay: pe anima wa stʼaspun jastik bʼa xiwela sbʼaj, wani skʼuʼan lek tsaʼan ja yajni xchami ojni ajuk sakʼwuk jastal ikʼ ason bʼa jel yip, jastalni ja Jesús (1 Cor. 15:30-32, 42-44).

Ja corintioʼiki tʼilani oj yabʼye stojol, yuja kʼotele nochumanik bʼa Kristo bʼa tsaʼubʼale oj wajuke bʼa satkʼinal, ojni stʼaspuke prebaʼik kada kʼakʼu sok oj chamuke bʼajtanto oj bʼobʼ ajuk sakʼwuke. Ja yeʼnle ja «oj yiʼe jaʼ bʼa Kristo Jesús» wa stojolan oj «yiʼe jaʼ ja bʼa xchamelal» (Rom. 6:3, TNM). Ja oj yiʼe jaʼ it bʼa kechanta wa senyaʼani tini chʼikan, jastalni ja Jesús, tʼilani oj ekʼ sbʼaje prebaʼik sok bʼajtanto oj chamuke bʼa oj ajuk sakʼwuke bʼa oj ajyuke sakʼan ja bʼa satkʼinal.

Ekʼ mas ja chabʼ jabʼil tsaʼan yajni yiʼaj jaʼ, ja Jesús yala yabʼ chawane ja bʼa sjekabʼanum: «Oja wiʼex ja tikʼe yijel jaʼ jastalni wan ajelki ja keʼni» (Mar. 10:38, 39, TNM). Meran, Ja Jesús mini wan mukjelkoʼ bʼa yoj jaʼ ja bʼa jutsʼin jaw. Ja jasa kʼan yali, ja jas oj ijukjan yile yuja toj oj ajyuke jani ja chamelali. Ja Pablo stsʼijbʼan ja matik tsaʼubʼale ojni yiʼe wokol yuja Kristo bʼa jachuk oj ajukyile stoyjele jastalni ja Jesús (Rom. 8:16, 17; 2 Cor. 4:17). Wa xkʼan alxuk, cha tʼilani bʼajtanto oj chamuke bʼa oj ajuk sakʼwuke bʼa oj ajyuke sakʼan ja bʼa satkʼinal.

Ja yuj, ja jas yala ja Pablo wani xbʼobʼ sutxuk bʼa jun modo stojol jastal it: «Lekbʼi mi jachukuki, ¿jasa slekilal oj ajukyile ja matik wa xyiʼaje jaʼ bʼa kechan oj chamuke? Ta mi oj sakʼwuke ja matik chamelexa, ¿jas yuj wa xyiʼaje jaʼ bʼa jach oj ekʼ sbʼaje?».