Yayi, palije mu Baibolo panji mu mabuku ghambiri apo tikuŵerenga kuti Ŵakhristu ŵakabatizikanga chifukwa cha ŵanthu awo ŵali kufwa.

Umo ŵali kung’anamulira vesi ili mu Mabaibolo ghanandi vikupangiska ŵanthu ŵanyake kughanaghana kuti mu nyengo ya Ŵakhristu ŵakwambilira ŵanthu ŵakabatizikanga chifukwa cha ŵakufwa. Mwachiyelezgero, mu Baibolo linyake ŵali kulemba kuti: “Usange ndimo kuliri nadi kuti ŵakufwa ŵalive kuwuskika, chifukwa ntchichi ŵakubapatizikira chifukwa cha iwo?”—Tumbuka Bible.

Kweni wonani ivyo ŵakusanda Baibolo ŵaŵiri ŵali kuyowoya. Dr. Gregory Lockwood wakayowoya kuti palije ukaboni mu Baibolo panji mu mabuku ghambiri wakuti munthu munyake wakabatizika mu malo gha munthu wakufwa. Mwakuyana waka, Purofesa Gordon D. Fee, wakalemba kuti: “Palije ukaboni mu mabuku ghambiri panji mu Baibolo wakuyowoya za ubatizo uwu. Tesitamenti Lasono likuyowoyapo yayi vya ubatizo uwu. Kweniso palije ukaboni wakuti Ŵakhristu ŵakwambilira panji mipingo yinyake iyo yikapangika ŵapositole ŵati ŵafwa, ŵakachitanga ubatizo uwu.”

Baibolo likuti waka ŵalondezgi ŵa Yesu ŵakeneranga ‘kuzgora ŵanthu ŵa mitundu yose kuŵa ŵasambiri, kuŵabatiza na kuŵasambizga kusungilira vinthu vyose’ ivyo Yesu wakaŵaphalira. (Mat. 28:19, 20) Pambere munthu wandaŵe msambiri wakubatizika, wakeneranga kusambira, kugomezga na kupulikira Yehova na Mwana wake. Munthu uyo wali kufwa ndipo wali mu dindi, wangachita yayi ivi panji Mkhristu uyo ngwamoyo kuchita ivi m’malo mwa iyo.—Muph. 9:5, 10; Yoh. 4:1; 1 Kor. 1:14-16.

Ipo kasi Paulosi wakang’anamurangachi?

Ŵakhristu ŵanyake ku Korinte ŵakatenge ŵakufwa ŵazamuwuka yayi. (1 Kor. 15:12) Kweni Paulosi wakaŵasuska kuti uwu ukaŵa utesi. Wakaŵasuska wuli? Wakaŵalongosolera kuti wakaŵa pangozi ndipo nyifwa yikamuŵendanga zuŵa lililose. Kweni wakagomezganga kuti para wafwa wazamuwuskikira ku umoyo wakuchanya nga umo vikaŵira na Yesu.—1 Kor. 15:30-32, 42-44.

Ŵakorinte ŵakeneranga kumanya kuti pakuŵa Ŵakhristu ŵakuphakazgika ŵasanganenge na masuzgo zuŵa lililose ndipo ŵafwenge kweni pamanyuma ŵazamuwuskika. Ntheura apo ‘ŵakabatizika mwa Khristu Yesu, ŵakabatizikaso mu nyifwa yake.’ (Rom. 6:3) Ivi vikang’anamuranga kuti nga ni Yesu, nawo ŵakeneranga kusangana na masuzgo na kufwa kuti ŵawuskikire kuchanya.

Pati pajumpha vyaka viŵiri Yesu wati wabatizika mu maji, wakaphalira ŵapositole ŵake ŵaŵiri kuti: “Ubatizo uwo nkhubatizika nawo, namwe mubatizikenge.” (Mrk. 10:38, 39) Apa Yesu wakang’anamuranga kubatizika na maji yayi. Kweni wakang’anamuranga kuti wafwenge chifukwa cha kuŵa wakugomezgeka kwa Chiuta. Paulosi wakalemba kuti ŵakuphakazgika ‘ŵazamusuzgika pamoza nayo kuti ŵazakapokereso uchindami pamoza.’ (Rom. 8:16, 17; 2 Kor. 4:17) Ntheura nawoso ŵakwenera kufwa kuti ŵawuskikire kuchanya.

Ntheura mazgu gha Paulosi ghakwenelera kulembeka kuti: “Usange ndimo viliri, kasi ŵachitenge wuli awo ŵakubatizika na khumbo lakuti ŵaŵe ŵakufwa? Usange ŵazamuwuskika yayi, chifukwa wuli iwo ŵakubatizika na khumbo lakuti ŵafwe?”