Чок. Библияда-даа, төөгүде-даа ындыг бадыткалдар чок.

Библияның чамдык очулгаларындан бо шүлүктү номчуурга, сактырга, Павелдиң үезинде христианнар өлген улус дээш, азы оларның орнунга, сугга суктуруп турган. Чижээ, тыва Библияда бо шүлүк мынчаар дамчыттынган: «А оон башка өлгеннер дээш, сугга суктуруп турар улус чүге ынчап турарыл?»

Библия эртемденнериниң чүү дээнин көрүптээлиңер. Грегори Локвудтуң сөстеринден алырга, «чок апарган кижиниң орнунга сугга суктурар» деп үзел-бодалдың «Библияда-даа, төөгүде-даа үндезини чок». База бир Библия эртемдени Гордон Фи дөмей бодалды чугаалаан: «Өлген улус дээш сугга суктуруп турган таварылгаларны Библиядан-даа, төөгүден-даа көрбейн турар бис. Аңаа хамаарыштыр Чаа Чагыг-керээде чүнү-даа биживээн. Бирги вектиң христианнары-даа, элчиннерниң өлүмүнүң соонда тургустунган христиан чыышта-даа шак ынчаар кылып чораан деп кандыг-даа бадыткалдар чок».

Бурганның Сөзүнден алырга, Иисустуң эдерикчилери бүгү чоннардан өөреникчилерни белеткеп, сугга суп, Иисустуң айтыышкыннарын сагыыр кылдыр өөредир ужурлуг турган (Мф. 28:19, 20). Ынчалза-даа Иисустуң сугга суктурган өөреникчизи апаарының мурнунда, кижи баштай Иегованы болгаш Ооң Оглун билип алгаш, бүзүрелин сайзырадып, оларга дыңнангыр боор ужурлуг турган. Ынчалза-даа өлген кижи ол негелделерни күүседип шыдавас турган. Ол үеде чурттап чораан христианнар чок апарган кижиниң орнунга база ону кылып шыдавас турган (Эккл. 9:5, 10; Ин. 4:1; 1 Кор. 1:14—16).

Ынчаарга Павел чүнү чугаалаксааныл?

Чамдык коринфичилер өлген улус дирлип кээр дээрзинге бүзүревейн турган (1 Кор. 15:12). Павел ындыг үзел-бодалдар-биле чөпшээрешпейн турган. «А мен... хүннүң-не өлүмче уткуй чиге көөр-дүр мен» — деп, ол бижээн. Айыылдарга таваржып-даа чорааш, Павел Иисус ышкаш, дээрге дирлип кээр дээрзинге быжыг бүзүреп чораан (1 Кор. 15:30—32, 42—44).

Коринфиде христианнар мындыг чүүлдү билип алыр ужурлуг турган: дээрге шаңналын алырының мурнунда олар хүннүң-не янзы-бүрү шенелделерге таваржыр, а төнчүзүнде барып, өлүп каарлар. Олар Христос Иисус-биле харылзаазының демдээ кылдыр «сугга суктуруп тура», ооң өлүмүн үлежип турарын көргүзүп турар (Рим. 6:3). Өскээр чугаалаарга, олар Иисус ышкаш өлгеш, дээрже дирлип үнер ужурлуг турган.

Иисус сугга суктурган соонда ийи чыл хире эрткенде, бодунуң ийи өөреникчизинге мынча дээн: «Мээң хилинчекке суктурарым дег, силер база хилинчекке суктурар силер» (Мк. 10:38, 39). Ол сугга суктурарының дугайында чугаалаваан. Ооң чер кырынга Бурганга шынчы бараалгалы өлүм-биле төнер деп, Иисус баш удур чугаалаан. Павел чагдырган христианнарга олар Христостуң хилинчээн үлежип турар болза, ооң «өндүр-чаагайындан үлүг база алыр» деп бижээн (Рим. 8:16, 17; 2 Кор. 4:17). Оон алырга, чагдырган христианнар дээрге чурттаар дээш, черге өлүр ужурлуг.

Ынчап кээрге, Павелдиң сөстерин мынчаар очулдурар болза, шын боор: «А оон башка өлүр дээш, сугга суктуруп турар улус чүнү канчаар ужурлуг? Өлүглер шуут катап дирилбес чүве болза, олар өлүр дээш, чүге сугга суктурарыл?»