Ni te Biblia ni te yantik libroetik ya yakʼik ta naʼel te ay jich la yichʼ pasel te nameye.

Ay bayal Bibliaetik te ya yal ta bersikulo ini te aylaj machʼatik la yichʼik jaʼ ta stojol te machʼatik lajemikix ta skʼajkʼalel te Pabloe. Jich bitʼil te Nueva Traducción Viviente jich ya yal: «Teme ma xchaʼkuxajik te machʼatik lajemikixe, ¿bin yuʼun te ants winiketik ya yichʼik jaʼ ta stojol te machʼatik lajemikixe?».

Pero kiltik te bin la yalik chaʼtul winiketik te ya yilbeyik skʼoplal te Bibliae. Te Gregory Lockwood la yal te ma jtabeytik skʼoplal ta Biblia ni ta yantikxan libroetik te ay machʼatik la yichʼik jaʼ «ta stojol te machʼatik lajemikixe». Jaʼnix jich te maestro Gordon Fee jich la yal: «Ma jtabeytik skʼoplal ta Biblia ni ta yantikxan libroetik te ay la yichʼ pasel te ichʼjaʼ-abi. Te Nuevo Testamento ma xyalbey skʼoplal; maʼyuk jich la spasik te sbabial jchʼuunjeletik o te ants winiketik te kuxinik kʼalal lajemix-a te jpuk-kʼopetike».

Te Jesús jich la yal: «Ha yuʼun bahanic, otsesahic ta jnopojel spisil te nacionetic, acʼticlambeyahic yichʼic haʼ [...] soc acʼticlambeya snopic te ya me schʼuhunic spasel spisil bintic la jpasex ta mandar» (Mat. 28:19, 20). Swenta ay machʼa ya xkʼot ta jnopojel, nail ya skʼan ya snaʼbey sba sok te ya schʼuunbey smantal te Jehová sok te Jesús sok te ayuk schʼuunel yoʼtan ta stojolik. Ma xjuʼ jich ya spas te machʼa lajemixe ni jaʼuk te machʼa kuxul te jich ya spas ta stojol te machʼa lajemixe (Ecl. 9:5, 10; Juan 4:1; 1 Cor. 1:14-16).

Jich yuʼun, ¿bin la skʼan la yal te Pablo ta 1 Corintios 15:29?

Ay jchʼuunjeletik ta Corinto te ma schʼuunik te ay chaʼkuxajele (1 Cor. 15:12). ¿Bin-utʼil la yakʼ ta naʼel te Pablo te aynix-a te chaʼkuxajele? Jich la yal: «Jujun cʼahcʼal quechelon ta lajel». Manchukme la sitintay bayal wokolil te Pablo, schʼuunej yoʼtan te ya yichʼ chaʼkuxajtesel swenta ya xkuxin ta chʼulchan jich bitʼil te Jesuse (1 Cor. 15:30-32, 42-44).

Ta swenta te tsabilik yuʼun ya xbajtik ta chʼulchan te korintoetike, ya skʼan ya xkʼot ta yoʼtanik-a te nail ya xkʼax prueba ta stojolik sok te ya xlajik swenta ya staik te chaʼkuxajele. Melel te kʼalal la yichʼik «jaʼ ta swenta te Cristo», jaʼnix jich la yichʼik «jaʼ ta swenta te slajele» (Rom. 6:3, TNM). Te ichʼjaʼ ta swenta te laj te Jesuse, jaʼ smakojbey skʼoplal te ya skʼan ya xkʼax prueba ta stojolik sok te nail ya xlajik yuʼun ya xbajtik ta chʼulchan.

Kʼalal ayix cheb jaʼbil yichʼel jaʼ-a te Jesuse, jich la yalbey te chaʼtul jnopojeletik yuʼune: «¿Ya bal xjuʼ awuʼunik te jich ya awichʼik jaʼ te bitʼilon to?» (Mar. 10:38, 39, Te Achʼ Testamento Yuʼun Te Kajwaltik Jesukristoe). Te Jesús maba yak ta yichʼel jaʼ-a te kʼalal jich la yale. Jaʼ yak ta yalbeyel skʼoplal te ya staik lajel teme jun yoʼtan ya yakʼ sbaik ta stojol te Diose. Te Pablo la yal te jaʼnix jich pajal ya xkʼax swokolik jich bitʼil Cristo te machʼatik tsabilike, sok te pajal ya yichʼ yutsilalik soke (Rom. 8:16, 17; 2 Cor. 4:17). Jaʼ-abi ya skʼan ya yal te nail ya xlajik yuʼun patil ya xchaʼkuxajik swenta ya xkuxinik ta chʼulchan.

Jaʼ yuʼun-abi, te bin la yal te Pablo ya xjuʼ te jich ya yichʼ kʼasesel ini: «Teme maʼyuk chaʼkuxajel, ¿bin ya smaliyikix-a te machʼatik la yichʼik jaʼ swenta lajel? Teme ma xchaʼkuxajik te machʼatik lajemikixe, ¿bin yuʼun ya yichʼik jaʼ ta swenta-abi?».