Moʼoj. Muʼyuk bu ta jtatik ta Vivlia mi jaʼuk ta yan livroetik mi oy toʼox jech chichʼ pasel.

Ta epal Vivliae, li versikulo liʼe chakʼ ta aʼiel ti oy toʼox buchʼutik chichʼik voʼ ta sventa li buchʼutik chamemik li ta skʼakʼalil Pabloe. Jech kʼuchaʼal liʼe: li Xchʼul Cʼop Jtotic Dios, ta skʼop Chenalhó xi chale: «Ti meleluc muʼyuc chchaʼcuxi animaetique [...]. ¿Cʼu yuʼun chichʼic voʼ ta sventa bochʼo chcham ti jechuque?».

Pe jkʼeltik kʼusi la stsʼibaik chaʼvoʼ ti chchanbeik skʼoplal Vivliae. Li Gregory Lockwood laj yal ti «kʼalal oy buchʼu chichʼ voʼ ta sventa li buchʼu chamem xae» jaʼ «jtos ichʼvoʼ ti muʼyuk bu ta tael ta jlikuk livro mi jech toʼox chichʼ pasel li ta voʼnee xchiʼuk mi jaʼuk jech chal li Vivliae». Xi la stsʼiba li Gordon Fee eke: «Kʼalal chichʼ kʼelbel kʼu toʼox yelan xkuxlejalik li ta voʼnee xchiʼuk kʼalal chichʼ chanel li Vivliae, muʼyuk bu ta tael ti oy toʼox jech jtosuk ichʼvoʼ kʼuchaʼal taje. Muʼyuk bu jech chal xtok li ta Achʼ Testamentoe; muʼyuk toʼox bu jech tspasik li yan relijionetik ta voʼnee mi jaʼuk jech tspasik li srelijion yajtsʼaklomtak Kristo ta voʼnee».

Xi laj yal Jesus ta Mateo 28:19 xchiʼuk 20: «Batanik, bat pasik ta jchankʼop li krixchanoetik ta skotol jteklumetike, akʼbeik yichʼ voʼ [...], chanubtasik ta xchʼunel skotol li kʼusitik laj kalboxuke». Sventa xuʼ xichʼ voʼ li jun krixchanoe, skʼan xchan ta sventa Jeova xchiʼuk Jesus, skʼan xakʼ xchʼunel yoʼonton ta stojolalik xchiʼuk xakʼ ta xkuxlejal li kʼusitik chchane. Pe li buchʼu chamem xae mu xa xuʼ jech spas, mi jaʼuk buchʼu xuʼ jech spas ta stojolal (Ekl. 9:5, 10; Juan 4:1; 1 Kor. 1:14-16).

Vaʼun chaʼa ¿kʼusi la skʼan laj yal Pablo li ta 1 Korintios 15:29?

Li ta tsobobbail ta Korintoe, oy toʼox buchʼutik mu xchʼunik ta sventa li chaʼkuxesele (1 Kor. 15:12). Pe li Pabloe xi la stukʼibtasane: «Jutuk xa mu chicham jujun kʼakʼal». Akʼo mi ep ta velta jutuk xa mu cham li jtakbol Pabloe, xchʼunoj ti xuʼ xichʼ chaʼkuxesel jech kʼuchaʼal li Jesuse (1 Kor. 15:30-32, 42-44).

Li jkorintoetike skʼan xaʼibeik smelolal ti chilik onoʼox ep ta tos prevaetik jujun kʼakʼale xchiʼuk ti skʼan xchamik sventa xichʼik chaʼkuxesele. Jech oxal, li ichʼvoʼ ta stojolal Kristo Jesuse jaʼ skʼan xal ichʼvoʼ ta sventa li slajelale (Rom. 6:3). Taje jaʼ smelolal ti baʼyel tsnuptanik preva xchiʼuk chchamik yoʼ to muʼyuk chichʼik chaʼkuxesel sventa xbatik ta vinajele, jech kʼuchaʼal la snuptan li Jesuse.

Kʼalal mas xa ox ta chib jabil yechʼel ti laj yichʼ voʼ li Jesuse, xi laj yalbe chaʼvoʼ yajtakbole: «Chavichʼik voʼ li ta ichʼvoʼ jech kʼuchaʼal chkichʼ voʼe» (Mar. 10:38, 39). Li va’ orae mu’yuk yakal chich’ vo’ li Jesuse, li kʼusi la skʼan laj yale jaʼ ti xuʼ xijcham-o ta skoj ti tukʼ chkakʼ jbatik ta stojolal Diose. Li Pabloe laj yal ti koʼol chil svokolik xchiʼuk Kristo li buchʼutik tʼujbil chbatik ta vinajel sventa koʼoluk xichʼ mukʼibtasbel skʼoplalike (Rom. 8:16, 17; 2 Kor. 4:17). Jaʼ xkaltik, baʼyel skʼan xchamik yoʼ xichʼik chaʼkuxesel sventa xbatik ta vinajele.

Jech oxal, li kʼusi laj yal Pablo ta 1 Korintios 15:29 xuʼ xi yelan jelubtastik leke: «Jaʼ yuʼun, ¿kʼusi stu mi jaʼ noʼox sventa chchamik li buchʼutik chichʼik voʼe? Yuʼun mi muʼyuk chichʼik chaʼkuxesel li buchʼutik chamemik xae, ¿kʼu yuʼun chichʼik voʼ ek sventa teuk tsakal skʼoplalik xchiʼuk li buchʼutik muʼyuk tstaik chaʼkuxesele?».