Danga’. Dariy bang u Bible ara u babyoren chepin e girdi’ ni gad ra beeg riy ni un taufenag e piin Kristiano ni fan ngak e piin kar m’ad.

Rogon ni kan pilyeg e re thin ney u lan yu ken e Bible e rayog ni nge k’aring boch e girdi’ ni ngar lemnaged nnap’an e ngiyal’ ni immoy Paul riy ma bay boch e girdi’ ni un taufenagrad ni fan ngak e piin kar m’ad. Bod ni, bay boch e Bible ni kan pilyeg e re thin ney riy ni be gaar: “Faanra ba riyul’ ni bod rogon ni yad be yog ni piin ni kar m’ad e dab ni fasegrad ko yam’, me ere mang fan ni kan taufenagrad ni fan ngak e piin ni kar m’ad?”​—Bible ni Thothup.

Machane mu tay fanam i yan ko n’en ni yog l’agruw e pumoon ni boor ban’en u murung’agen e Bible ni yow manang. Reb ko gal pumoon nem ni ka nog Dr. Gregory Lockwood ngak e yog ndariy e mich riy u Bible ara u chepin e girdi’ ni bay be’ nni taufenag ni fan ngak be’ ni ke yim’. Ku bay bagayow ni ka nog Gordon D. Fee ngak nreb e sensey u reb e skul nib tolang nib m’agan’ ko n’en ni yog e re pumoon ney. I yoloy ndariy murung’agen e mit ney e taufe u lan e Bible ara u lan chepin e girdi’. I yog ndariy murung’agen e re n’ey u lan e Bin nib Beech e M’ag, maku dariy e mich riy ni i rin’ e tin som’on e Kristiano e re n’ey, ara un rin’ u lan e pi galesiya ni sum nde n’uw nap’an nga tomuren ni yim’ e pi apostal.

Be yog e Bible ni pi gachalpen Jesus e nga ‘ranod ngak girdien e pi nam u gubin yang ngar pingeged yad ngar manged pi gachalpen, mi yad taufenagrad . . . , mi yad fil ngorad rogon ni nguur folgad u gubin e tin’ ni yog Jesus ngorad ni ngar rin’ed. (Matt. 28:19, 20) U m’on ni nge mang be’ reb i gachalpen Jesus ni kan taufenag, mab t’uf ni nge fil murung’agen Jehovah nge Fak, me mich u wan’, me fol rorow. Ere be’ ni ke yim’ e dabiyog ni nge rin’ e re n’ey. Ku dabiyog rok reb e Kristiano ni nge rin’ e re n’ey ni fan ngak facha’ ni ke yim’.​—Ekl. 9:5, 10; John 4:1; 1 Kor. 1:14-16.

Ere mang e be yip’ Paul fan?

Immoy boch e girdi’ u Korinth ni u rogned ndariy e fos ko yam’. (1 Kor. 15:12) Ere dag Paul ngorad nde puluw e n’en yad be yog. Ni uw rogon? I yog ngorad ni ‘gubin e rran ni be yan u thatharen e riya’.’ Yugu aram rogon ni be buch boch ban’en rok ni be tay e yafos rok nga thatharen e riya’, machane ba pagan’ ngay nu tomuren nra yim’ ma yira faseg nge yan nga tharmiy ni bod rogon Jesus.​—1 Kor. 15:30-32, 42-44.

Thingari nang piyu Korinth ni pi Kristiano ni kan dugliyrad e ra ur mada’naged e skeng ni gubin e rran, maku yad ra yim’ u m’on ni ngan fasegrad ko yam’. Ere nap’an ‘nni taufenagrad ni aram e kar taab girdi’gad Kristus Jesus,’ maku aram e kan ‘taufenagrad ni kar uned ko yam’ ni tay.’ (Rom. 6:3) Re n’ey e be yip’ fan ni yad ra mada’nag e skeng, maku yad ra yim’ ya nge yag nni fasegrad nga ranod nga tharmiy ni bod rogon e n’en ni buch rok Jesus.

Ba pag l’agruw e duw nga tomuren nni taufenag Jesus ko ran me yog ngak l’agruw e apostal rok ni gaar: “Min taufenagmew ni bod rogon nthingar ntaufenigeg.” (Mark 10:38, 39) Gathi yibe taufenag Jesus ko ran e ngiyal’ nem. Ya be yip’ Jesus fan ni yul’yul’ nra tay ngak Got e aram e n’en nra fek i yan ko yam’. I yoloy Paul ni piin kan dugliyrad e yad ra ‘un ko gafgow ni tay Kristus, ma ka yad ra un ko flaab rok.’ (Rom. 8:16, 17; 2 Kor. 4:17) Ere thingar ra m’ad ya nge yag nni fasegrad nga ranod nga tharmiy.

Aram fan nib puluw ni ngan pilyeg e re thin nem ni yog Paul ni ngan gaar: “Faanra dab ni faseg e piin kar m’ad, me ere uw rogon e piin kan taufenagrad kar uned ko yam’? Faanra dab ni faseg e piin kar m’ad, me ere mang fan ni kar uned ko mit ney e taufe?”