Maʼatech. Mix le Biblia mix uláakʼ libroʼob ku tsʼáaikoʼob naʼatbil wa ku beetaʼal kaʼach le jeʼeloʼ.

Tiʼ yaʼab Bibliaʼobeʼ le versículoaʼ ku tsʼáaik naʼatbil yaan máaxoʼobeʼ ku yokjaʼob tu lugar le máaxoʼob tsʼoʼok u kíimloʼoboʼ. Jeʼex le Quiliʼich Biblia ich Mayaoʼ ku yaʼalik: «Yaan tsʼeʼetsʼek ku yokjaʼob tu yoʼolal le kimenoʼoboʼ. ¿Baʼaxten ku beetkoʼob lelaʼ? Wa le kimenoʼob maʼ tu kaʼa púut kuxtaloʼoboʼ, ¿baʼax tiaʼal ku yokjaʼob tu yoʼolaloʼob?».

Chéen baʼaleʼ koʼox ilik baʼax tu yaʼalaj jujuntúul máakoʼob jach u xokmoʼob baʼax u kʼáat u yaʼal u tʼaaniloʼob le Bibliaoʼ. Juntúul tiʼ letiʼobeʼ Gregory Lockwood, letiʼeʼ tu yaʼaleʼ mix baʼal eʼesik wa anchaj máax okjaʼanaj tu yoʼolal juntúul máak tsʼoʼok u kíimil, mix le Biblia aʼalik wa yaan máax beetoʼ. Óoliʼ letiʼe baʼax xan tu yaʼalaj le profesor Gordon Feeoʼ. Letiʼeʼ tu yaʼaleʼ minaʼan baʼax eʼesik wa yanchaj máax okjaʼanaj tu lugar juntúul máak tsʼoʼok u kíimil. Tu yaʼaleʼ le Tsʼíiboʼob ich Griegooʼ maʼatech u yaʼalikoʼob wa yaan máax okjaʼanaj beyoʼ. Tu yaʼalaj xaneʼ mix baʼal eʼesik wa le clase okjaʼaʼ káaj u beetaʼal tumen le cristianoʼob teʼ yáax siglooʼ mix tumen le iglesiaʼob formarnajoʼob le maʼ úuch kíimik le apóstoloʼoboʼ.

Le Bibliaoʼ ku yaʼalikeʼ Jesúseʼ tu yaʼalaj: «Xeeneʼex tu yiknal u kajnáaliloʼob tuláakal le kaajoʼoboʼ ka a kaʼanseʼexoʼob utiaʼal ka taalakoʼob tin paach. Tsʼáaʼex u yokjaʼob [...]. Yéetel kaʼanseʼexoʼob u tsʼoʼokbesoʼob tuláakal le baʼaxoʼob tsʼoʼok in waʼalikteʼexoʼ» (Mat. 28:19, 20). Lelaʼ ku yeʼesikeʼ utiaʼal u yokjaʼ juntúul máakeʼ táanileʼ unaj u kaanbal tu yoʼolal Jéeoba yéetel Jesús, u creertik le baʼax ku kanik tu yoʼolaloʼoboʼ yéetel u beetik baʼax ku yaʼalikoʼob. Chéen baʼaleʼ juntúul máak tsʼoʼok u kíimileʼ maʼ tu páajtal u beetik le baʼax tu yaʼalaj Jesúsoʼ yéetel mix máak uláakʼ jeʼel u páajtal u beetik tu lugareʼ (Ecl. 9:5, 10; Juan 4:1; 1 Cor. 1:14-16).

¿Bix túun unaj u naʼataʼal le baʼax tu yaʼalaj Pablo tiʼ 1 Corintios 15:29?

Teʼ múuchʼulil yaan Corintooʼ yaan máaxoʼob maʼ tu creerkoʼob kaʼach wa yaan u kaʼa kuxkíintaʼal le kimenoʼoboʼ (1 Cor. 15:12). ¿Baʼax aʼalaʼabtiʼob tumen Pablo? Tu yaʼalajtiʼob: «Teneʼ sáamsamal in baʼateʼel yéetel le kíimiloʼ». Letiʼeʼ tu yaʼaleʼ kex u yojel jeʼel u kíimil yoʼolal le baʼaxoʼob ku aktáantikoʼ, jach ku creertik xan yaan u kaʼa kuxkíintaʼal teʼ kaʼan jeʼex úuchik u kaʼa kuxkíintaʼal Jesúsoʼ (1 Cor. 15:30-32, 42-44).

Le sukuʼunoʼob yanoʼob Corintooʼ kʼaʼabéet kaʼach u naʼatkoʼobeʼ deporsi yaan u aktáantkoʼob nukuch pruebaʼob yéetel u kíimloʼob utiaʼal u kaʼa kuxkíintaʼaloʼob teʼ kaʼanoʼ. Le ka okjaʼanajoʼobeʼ tu ‹nupubaʼob tiʼ Cristo›, lelaʼ u kʼáat u yaʼaleʼ ‹okjaʼanajoʼob utiaʼal ka kíimkoʼob jeʼex úuchik u kíimil› Cristooʼ (Rom. 6:3). Le máaxoʼob ku yokjaʼob utiaʼal ka kíimkoʼob jeʼex úuchik u kíimil Cristooʼ kʼaʼabéet u aktáantkoʼob nukuch pruebaʼob yéetel u kíimloʼob táanil tiʼ u kaʼa kuxkíintaʼaloʼob teʼ kaʼanoʼ.

Le tsʼoʼok u máan dos años okjaʼanakoʼ Jesúseʼ tu yaʼalaj tiʼ kaʼatúul tiʼ u discípuloʼob: «Le okjaʼ ku tsʼaʼabaltenoʼ yaan xan u tsʼaʼabalteʼex» (Mar. 10:38, 39). Le ka tu yaʼalaj Jesús lelaʼ maʼ táan u tsʼaʼabal u yokjaʼiʼ. Le baʼax tu yaʼaloʼ u kʼáat u yaʼaleʼ le máaxoʼob kun binoʼob teʼ kaʼanoʼ deporsi kʼaʼabéet u kíimloʼob utiaʼal u yeʼeskoʼob chúukaʼan u yóoloʼob. Pabloeʼ tu yaʼalajtiʼobeʼ utiaʼal u kʼamkoʼob junpʼéel puesto jeʼex le yaan tiʼ Cristooʼ kʼaʼabéet xan u muʼyajoʼob jeʼex úuchik u muʼyaj letiʼoʼ (Rom. 8:16, 17; 2 Cor. 4:17). Le ka tu yaʼalaj Pablo unaj u muʼyajoʼob jeʼex Cristoeʼ tu tsʼáaj naʼatbil tu kaʼatéen de ke le yéeyaʼanoʼoboʼ unaj u kíimloʼob utiaʼal u kaʼa kuxtaloʼob teʼ kaʼanoʼ.

Bey túunoʼ le baʼax tu yaʼalaj Pablooʼ bey unaj u traducirtaʼalaʼ: «Tsʼoʼoleʼ wa maʼ kun kaʼa kuxkíintbil le kimenoʼoboʼ, ¿baʼax túun ken u beet le máaxoʼob ku yokjaʼob utiaʼal kíimiloʼ? ¿Baʼaxten ku yokjaʼob xan utiaʼal ka táakpajkoʼob ichil le máaxoʼob kimenoʼoboʼ?».