Oó, pai ho rogo Ziazia Kekeapai yo watadu rogo abuku nga ga apangbanga nayugo gupai nga aKristano anaazio bapatiza kuba agu aboro naaima kpiko te.

Gu gene i nasa gi veresi re ngbaha rogo dungu aBaibiri ima sa kura aboro i naaberã gupai nga aboro anaazio bapatiza azio kuba kpikpi aboro ti regbo agu aKristano naadu mbata. Ni kpiapai, kura aBaibiri naya: “Awere ka zingabekpio adunga ya, ginipai agu aboro i abapatiza yo kuba kpikpi aboro nika mangaha?”—New International Version.

Ono tie, oni bingo agu afugo nga ga kura wene abawirikipai ue tipa Ziazia Kekeapai. Dr. Gregory Lockwood ape gupai nga gopai ho rogo Ziazia Kekeapai yo watadu rogo apangbanga yo nayugo gupai nga boro azi bapatiza kuba kpikpi boro te. Gu kura wene bawirikipai tipa sa Ziazia Kekeapai nga, Professor Gordon D. Fee aima ida kuti gupai re. Ko ake gupai nga kpiapai ho nga ga gi ngbatunga bapatiza re rogo Ziazia Kekeapai yo watadu rogo abuku apangbanga yo te. Ko ape gupai nga pai ho du wa gure rogo Vovo Ndika yo te, na gopai ho a nayugo gupai nga boro dagba agu aKristano yo naadu mbata watadu rogo ai agu akanisa i akusihe ngbutuko tifuo kpi amokedi gipai re adu tipa ni te.”

Ziazia Kekeapai nape gupai nga si adu nga apefuo Yesu “sa arikaaboro dunduko ni abawiriki, ki nibapatizi yo . . . , ki nirugu yo a i niká kuti agu apai dunduko” ko aruguyo kutini. (Mt. 28:19, 20) Mbata fu boro da ni gu bawiriki naima zio bapatiza, si aaida ni wirikipai tipa aYekova na Wiriko, ki idi kutiyo, na kini gi sangbayo. Gu boro naaima kpi na kidu murö yo aarengbanga ka manga gupai re te; na rakiraki Kristano ho ka mangi gipai re funi te.—Batu. 9:5, 10; Yo. 4:1; 1 Kor. 1:14-16.

Ginipai tie Pauro aaida ka gumbaha?

Kura aKorindo aape gupai nga i azingisanga kpikpi aboro te. (1 Kor. 15:12) Pauro aima yugo gupai fuyo nga gu berãpai re aarunga te. Ngba gini gene? Ko ape gupai fuyo nga ko ‘anaakpi na aˈuru dũ.’ Rengo ngaha nga, ko adu kindi ni ungako. Ono wa ko avura kaa gbiatiko na kereapai, ko aima du na kido nga tingbafuo kpiko, i nika zingisako ni toro ku ngbangbaturũ yo kina wai a i azingisi Yesu.—1 Kor. 15:30-32, 42-44.

Si aaida aKorindo rugutiyo na gupai tipa mbedimbedi aKristano nga, i nikaa gbiatiyo agbia na akpakarapai na ki kpiki mbata fu i zingisi yo be kpio. Sidu, ho i abapatiza yo ni “ku rogo Kristo Yesu yo,” i aima ‘bapatizi yo ku rogo kpioko yo’ a. (Rom. 6:3) Gere nayugo gupai nga wakina Yesu, si adu nga i nika gbiatiyo agbia na fudifudiapai na ki kpi tipa gupai nga i zingisi yo be kpio.

Agarã naima susa ue tingbafuo zio Yesu bapatiza ime yo, ko ape gupai fu kura gako amokedi ue nga: “Gu bapatiza i nabapatizi re na ni i abapatizi roni na ni.” (Mk. 10:38, 39) Gu bapatiza Yesu aafura tipaha herẽ aangianga gu bapatiza nga ga ime te. Gupai ko aaida ka gumbaha nga, padu ko ni ruruko fu Mbori nika ye na kpio kutiko. Pauro ake gupai nga mbedimbedi aKristano nika ‘hi pai na ko tipa gupai nga i mongo du ni taasitaasi yo a na ko.’ (Rom. 8:16, 17; 2 Kor. 4:17) Gere aayugo gupai nga wakina Yesu, i nika gbiatiyo agbia na arungosiro na ki kpi tipa i zingisiyo ku ngbangbaturũ yo.

Na ngbanya kuti gipai re, ani ima rengba ka ya afugo Pauro ni kina ruruhe ho si aya ni: “Ka si adu nga wo ya agu yo i abapatizi yo ku ba agu yo naima kpi i amanga wãi? Ka ngia i azingisa nga kangba aboro wa sa te, i nabapatizi yo ku ba yo tipagine tie?