Heu deuˆ˗euˬ dawˬ tsuiꞈ maˇ maˇ ni naˇ, teu loꞈ˗ehˇ ehˇ mawꞈ˗eu maˬ ngeuˇ˗a. Heu deuˆ naˇ shaˬ zahˬ tiˬ jeˬ saˇ˗i tiˬ jeˬ˗ahˇ ya tahˬ puˬ˗eu miˇ neh coˬ˗iˇ˗euˬ kʼawꞈ, tuˇ laˇ nya˗awˇ kamˬ daˬ coeˇ˗eu deuˬ˗ahˇ ehˇ mawꞈ˗eu meh.

Aˬ dui heu nyiˬ deuˆ˗euˬ gaˇ kawˆ dawˬ tawˆ luꞈ˗ahˇ haw ma. Dawˬdaˬ 24:15-17-ahˇ “Yaw sui yaw dawˇ tsawˇ haˬ˗ahˇ tahˇ joe joe˗awˇ, nymˇ nymˇ lah˗ehˇ ceh geuꞈ˗eu lehˇ gʼeh˗eu nui ma maˬ dawˇ˗eu tsawˇ haˬ loꞈ˗ehˇ taˬ gʼeh. Yaw sui yaw dawˇ tsawˇ haˬ aˇ myaˆ poˆ coˬ˗iˇ kʼawꞈ paˇ tuˇ laˇ nya meh. Ehˇ kʼawꞈ, guˆ˗eu gaˆ˗eu jeˬ keuˆ le ngeh nui ma maˬ dawˇ˗eu tsawˇ haˬ luˬ˗iˇ seˇ˗iˇ˗eu meh. Nawˬ˗ahˇ muiˇ˗eu deuˬ kʼoeˇ taˆ guˆ˗eu gaˆ˗eu jeˬ keuˆ le ngeh laˬ kʼaˬ taˬ cehˇ. Aˬ yawꞈ sahˬ tiꞈ tiꞈ gaˇ laꞈ kʼawˆ taˬ tehˆ caw” lehˇ ehˇ˗eu meh.

Tiˬ gʼaˬ na aˇ deuˆ 16-ahˇ ehˇ taˬ˗euˬ jeˬ, iˬ baˇ mˇ˗euˬ kʼawꞈ noeˬ poˆ noeˬ paˇ˗euˬ miˇ neh, Miˬyehˇ nehˬ˗ehˇ cawˬ cawˬ˗eu jeˬ tiˬ poˆ paˇ muiˬ kʼoꞈ laˇ˗euˬ deuˬ˗ahˇ ehˇ mawꞈ˗eu meh lehˇ noeˬ˗eu meh. Yaw jeˬ ma jeˬ, Eˬgaˬlamˬ tsawˇ haˬ pyeuꞈ˗eu naˇ ha ma nyiˬ gʼaˬ, “Dzeuˇ yaꞈ ngeh maˬ ehˇ, nymˬ˗mˇ maˬ ehˇ, saˬ laˬ deuˬ Jaˇliꞈ heu nyiˬ deuˆ˗ahˇ heu loꞈ˗ehˇ dzawˇ taˬ˗euˬ meh” lehˇ boꞈ taˬ˗euˬ meh. Aˬ yawꞈ nyaꞈ “yaw sui yaw dawˇ tsawˇ haˬ huiˬ˗eu iˬ baˇ mˇ taꞈ˗ehˇ mˇ˗euˬ miˇ neh ga coeˬ kʼawꞈ, Miˬyehˇ˗ahˇ gaˬ˗eu jeˬ maˬ teˬ˗iˇ˗eu uˬ taꞈ yawˬ poˆ na luꞈ noeˬ poˆ noeˬ paˇ˗eu miˇ neh, Miˬyehˇ aˬ yawꞈ maꞈ˗ahˇ aˬ yawꞈ yaw oeˇ loꞈ˗ehˇ ha geuꞈ meh” lehˇ ehˇ˗eu meh. Iˬ baˇ mˇ mawꞈ˗eu nui ma˗ahˇ maˬ deuˆ ceh ceh mawꞈ˗eu tiˬ gʼaˬ na heu loꞈ˗ehˇ gʼeh˗eu nui noeˬ˗ahˇ ya leˇ˗eu meh. Aˬ jeˬ miˇ neh ehˇ naˇ aˬ yawꞈ maꞈ iˬ baˇ aˇ myaˆ poˆ mˇ˗euˬ kʼawꞈ, Miˬyehˇ aˬ yawꞈ maꞈ˗ahˇ iˬ baˇ pyehˬ nehˬ meh lehˇ noeˬ˗eu miˇ neh kʼawꞈ pyeuꞈ nya meh.

Ehˇ kʼawꞈ teu naˇ aˇ deuˆ 16-euˬ dawˬ tsuiꞈ maˇ maˇ maˬ ngeuˇ˗a.

Aˇ deuˆ 16 hawˇ˗eu 17˗ahˇ “coˬ˗iˇ” lehˇ ehˇ˗eu Heˬbyehˇ˗ahˇ dawˬ tsuiꞈ gʼawˬ mya jeˬ jaˆ˗eu meh. Dawˬ heu dawˬ coeˬ dzeh˗eu, maˬ ngeuˇ naˇ maˇ diˇ ga ka˗euˬ gaˇ ehˇ mawꞈ˗eu kʼawꞈ pyeuꞈ nya meh. Yaw jeˬ ma jeˬ, mawˇ neˇ coeˬ dzeh˗eu, tsawˇ haˬ nymˇ mˬ˗ahˇ neh ga˗eu. (Dawˬmehˬmehˬ˗eu 22:4, 8; Aˬmoˆ 9:9) Dawˬ heu dawˬ dawˬ tsuiꞈ nui jeˬ lehˇ paˇ jaˆ˗a siˬ. Yaw jeˬ ma jeˬ, Ja ceuˬ 37:23, 24-ahˇ “Tsawˇ haˬ zaˬ ciˬ˗eu kuiˇ toꞈ˗aˬ, Sahˬpaˬ Miˬyehˇ laꞈ˗ahˇ jaˆ˗awˇ, aˬ yawꞈ nui ma tsaˬ˗eu gʼaˬ˗ahˇ, ziꞈ dah ni laˆ ziꞈ nehˬ˗eu meh. Aˬ yawꞈ ya coˬ˗iˇ˗eu baw kʼawꞈ, moꞈ jaˆ˗ehˇ maˬ ya ga˗iˇ ni, Sahˬpaˬ Miˬyehˇ tsahˇ tuˇ tehꞈ˗a” lehˇ ehˇ taˬ˗euˬ meh.—Dawˬdaˬ 11:5; 13:17; 17:20.

Dawˬ heu dawˬ˗euˬ dawˬ tsuiꞈ gʼawˬ mya jeˬ lehˇ jaˆ kʼawꞈ, dzaw goˇ taˬ˗euˬ Eˇgʼeuˬ Eˇ˗cuˬ Paˇ˗lamˇteuˬ “Heˬbyehˇ˗euˬ dawˬ heu dawˬ˗ahˇ iˬ baˇ mˇ˗eu jeˬ˗ahˇ tiˬ jawˇ˗iˬ maˬ zmˬ haw˗aˬ” lehˇ ehˇ˗eu meh. Teu miˇ neh zaˬ siˬ nui gahˇ ahˇ˗eu dzaˇ˗i tiˬ gʼaˬ aˇ deuˆ 16-ahˇ “Miˬyehˇ˗euˬ tsawˇ haˬ deuˬ˗ahˇ yaw doeˇ jahˇ nehˬ˗eu tiˬ jeˬ˗iˬ gaˇ dahˇ maˬ tsoeˬ˗a. Aˬ yawꞈ maꞈ˗ahˇ aˬ jeˬ jahˇ neh kʼawꞈ, aˬ yawꞈ maꞈ ya buˬ˗iˇ˗eu laꞈ kʼoeˇ tehꞈ meh. Ehˇ kʼawꞈ nui ma maˬ dawˇ˗eu tsawˇ haˬ teu loꞈ˗ehˇ maˬ gʼeh˗a” lehˇ ehˇ˗eu meh.

Teu miˇ neh heu dawˬ tawˆ luꞈ˗ahˇ haw ngeh, Dawˬdaˬ 24:16 iˬ baˇ mˇ˗eu jeˬ˗ahˇ ehˇ mawꞈ˗eu maˬ ngeuˇ˗eu, shaˬ zahˬ tiˬ jeˬ shaˇ˗i tiˬ jeˬ˗ahˇ ya tahˬ puˬ gaˇ ehˇ mawꞈ˗eu meh. Haiˬ˗eu miˇ tsaˬ heu siˬ˗ahˇ yaw sui yaw dawˇ tsawˇ haˬ deuˬ, naˇ˗eu gawˇ˗eu jeˬ˗ahˇ maˬ ehˇ, shaˬ zahˬ nui jeˬ˗ahˇ maˬ ehˇ, ya tahˬ puˬ˗eu kʼawꞈ pyeuꞈ nya˗awˇ, miˇ kʼahˬ˗euˬ sahˬ paˬ sahˬ ma deuˬ neh bi kʼehˬ˗eu kʼawꞈ pyeuꞈ nya meh. Ehˇ kʼawꞈ aˬ yawꞈ maꞈ Miˬyehˇ aˬ yawꞈ maꞈ˗ahˇ shaˬ˗eu zahˬ˗eu jeˬ˗ahˇ kamˬ daˬ coeˇ ni caw ba nehˬ meh lehˇ nui ma taˬ˗eu meh. Miˬyehˇ˗euˬ tsawˇ haˬ deuˬ shaˬ zahˬ˗ahˇ ya tahˬ puˬ kʼawꞈ yaw muiˬ˗ehˇ dzeuˇ˗iˇ nya˗euˬ gaˇ nawˇ aˇ myaˆ poˆ mawˇ haw deˬ lehˇ shaˇ noeˬ haw sheˇ. Aˬ dui Yeˬhawˇbaˬ “Noeˬ shaˬ noeˬ zahˬ˗eu tsawˇ haˬ deuˬ˗ahˇ aˬ yawꞈ ngehˬ gʼeh nehˬ˗awˇ, coˬ˗iˇ˗euˬ tsawˇ haˬ˗ahˇ ciˬ tuˇ nehˬ˗eu meh” lehˇ jah˗eu ma.—Ja ceuˬ 41:1-3; 145:14-19.

Aˬ dui neh aˇ deuˆ 17-ahˇ ya mawˇ˗euˬ loꞈ˗ehˇ “yaw sui yaw dawˇ tsawˇ haˬ” aˬ cawˬ shaˬ gaˇ ya mawˇ ngeh laˬ kʼaˬ maˬ cehˇ˗a. Aˬ yawꞈ maꞈ “Miˬyehˇ˗euˬ ehˇ dawˬ naˇ haˬ˗eu tsawˇ haˬ dehꞈ dzaˬ laˇ tehꞈ˗a” lehˇ ya siˬ˗euˬ miˇ neh gʼaˬ za˗eu meh.—Dawˬtsoˆ 8:11-13; Yawˇbaˆ 31:3-6; Ja ceuˬ 27:5, 6.