Чынынча айтса бу ӱлгерде «јыгылары» дегени ол кижиниҥ «уур-кӱчтерге табартканын» темдектейт. А «турары» дегени «кӱчтерди ӧдӱп чыгарын» темдектейт.

Бу ӱлгердиҥ контекстин кӧрӱп ийектер: «Калју кижи чилеп чындык кижиниҥ айыл-јуртын кетешпе, оныҥ амыраар јерин јайратпа. Нениҥ учун дезе чындык кижи јети де катап јыгылза, туруп келер, а калју улус тӱбектиҥ ӧйинде јыгылар. Ӧштӱӱҥ јыгылып калза, сӱӱнбе, ол бӱдӱрилип калза, јӱрегиҥ сениҥ сӱӱнбезин» (Укаа 24:15—17).

Кезик улус 16-чы ӱлгер кинчек эдип, је оноҥ јаманын алынып, ойто Кудайдыҥ јарадузын алынган кижи керегинде айдылган деп санангылайт. Британияныҥ эки абызы: «Алдындагы ла эмдиги ӧйдиҥ јарлыкчылары бу ӱлгерди шак ла анайып јартагылап јат» — деп бичиген. Анайда ок бу абыстар бу оҥдомол аайынча: «Јакшы кижи јыгылар, ӧскӧртӧ айтса уур кинчек эдердеҥ айабас. Је андый да болзо, ол Кудайга качан да сӱӱжин јылыйтпас. Ол эткен керектери учун јаманын алынып, туруп келер» — деп бичиген. Бу јартамал кинчегиле тартышпай турган кижиге јараардаҥ айабас. Кижи канча да кире кинчек этсе, Кудай оныҥ јаманын тӱҥей ле таштаар деп актанар болор.

Је 16-чы ӱлгерде ӧскӧ неме керегинде айдылат.

16 ла 17 ӱлгерлерде «јыгылар» деп кӧчӱрилген еврей сӧстиҥ учуры башка-башка болор аргалу. Бир учуры та нениҥ де, та кемниҥ де чыннаҥ ла јыгылганын кӧргӱзет. Темдектезе, јолдо бука јыгылып калган, та кем де крышанаҥ јыгылган эмезе јерге таш келип тӱшкен (Јаҥ. т. 22:4, 8; Ам. 9:9). Анайда ок бу сӧстиҥ ӧскӧ учуры бар. Темдектезе бу ӱлгерде: «Иегова оныҥ јолыла барып јаткан кижиниҥ алтамдарын бек эдет. Ол бӱдӱрилзе де јыгылбас, нениҥ учун дезе, Иегова оныҥ колынаҥ тудып алган» (Сар. 37:23, 24; Укаа 11:5; 13:17; 17:20).

Теологияныҥ профессоры Эдвард Пламптре мынайып айткан: «„Јыгылар“ деп кӧчӱрилген еврей сӧс „кинчек эдерин“ качан да темдектебей јат». Бу ӱлгер керегинде база бир библеист мынайып айткан: «Кудайдыҥ албатызына удура эдилген керектер калас болор, нениҥ учун дезе олор аргадалар. Калју улус јоголтылып калар!»

Айдарда, Укаа сӧстӧр 24:16-дагы «јыгылар» деген глагол кинчек эдип јыгыларын эмес, а чындык кижиниҥ јӱрӱминде болуп турган уур-кӱчтерди темдектейт. Бу калју телекейде Кудайдыҥ ишчизи јаман ооруга, истежӱлерге, ӧскӧ дӧ уур-кӱчтерге табартардаҥ айабас. Је андый да болзо, ол кижи бу кӱчтерди ӧдӱп чыгарга Кудай ого болужар деп, бир де алаҥзыбас аргалу. Кудайдыҥ ишчилери нениҥ учун ченелтелерди јеҥил ӧдӱп турган? Нениҥ учун дезе «Иегова јыгылып јаткандарга болужып јат, ал-санаага тӱшкендерди кӧдӱрип јат» (Сар. 41:1—3; 145:14—19).

Чындык кижи ӧскӧ улустыҥ шыразына сӱӱнбей јат. Оны мындый сӧстӧр токунадат: «Кудайдаҥ айап турган улус алкыш алар, не дезе, олор оноҥ айап јӱрген» (Эккл. 8:11—13; Иов 31:3—6; Сар. 27:5, 6).