I andha, eno tie ngo gin ma giragora eni umito yero. Eweco iwi ng’atu m’upodho, niwacu m’unwang’ere ku peko; man eai kendo, niwacu eciro pekonegi.

Wakewec iwi lembe ma juyero i wang’ giragora mi Lembrieko 24:16, man ma judok juyero i ng’eye. Versene wacu kumae: “Kud ikan adhi, E ng’atu ma jadubo, kum kabedo pa ng’atu ma pwe; Kud i nyoth ka mi yom pare: Kum ng’atu ma pwe podho wang’ abiro, man eai kendo; Ento jung’ielo judubo ku ruvwa. Anyong’a kud unegi kinde ma jadegini upodho, Man kud iyi anyong’a uneg adundeni kinde ma jung’iele.”​—Rie. 24:15-17.

Ju moko paru nia versene mir 16 uweco pi ng’atu m’upodho i dubo man m’udok uyewo dubo pare, uketho winjiri pare ku Mungu udok kendo ber kakare. Jupadhri moko ario mi ng’om mir Angleterre gikiewo nia “juponji ma con ku ma kawoni ceke gitio ku versene” i ayi ma kumeno. Jupadhrine gimedo nia nimakere ku paru maeno, “ng’atu ma cu copo podho . . . i dubo ma pek, re ecopo bayu ngo mer m’emaru ko Mungu, tek kubang’ podho m’epodho ko i dubo, ecukuyewo dubo parene.” Paru maeno copo nyang’u ng’atu m’ubenyego ngo i kum awanya pare ma rac mi timo dubo. Ecopo paru nia kadok etim dubo wang’ adi de, Mungu bitimo ire kisa.

Eno tie ngo gin ma verse mir 16 umito yero.

Wec mi dhu juebrania ma juloko nia ‘nipodho’ ma juweco pire i verse mir 16 kud 17, jucopo tio kude i ayi ma tung’ tung’. Ecopo nyutho podho ma dhiang’ m’uyeyo ter podho ko i wang’ayo, ma ng’atini podho ko ku wi ot, kunoke ma nying’ nganu podho ko i ng’om. (Poi. 22:4, 8; Amo. 9:9) Jucopo tio ku wec maeno i ayi mi lapor bende. Ku lapor, buku mi Zaburi 37:23, 24 uwacu nia “Yehova ketho woth mi dhanu cungo; man anyong’a nege i yo pare. Kadok epodho, jubiredhe piny ma gwei ungo; kum Yehova ting’e ku cinge.”​—Rie. 11:5; 13:17; 17:20.

Professeur moko (mi théologie) uwacu kumae: “Wec mi dhu juebrania ma juloko nia ‘nipodho’ jutio kude ngo nyanok de pi niweco iwi podho i dubo.” Jararieko mange ke ucoko dhu wec ma nwang’ere i verse mir 16 kumae: “Etie mananu nisendo jurutic pa Mungu, pilembe gibivoyo pare kwa, tung’ ku judubo!”

Pieno, Lembrieko 24:16 uweco ngo iwi “podho” ma ng’atini podho ko i kura ma rac mi dubo, ento ebeweco iwi peko ma ng’atini copo nwang’ere ko kadok wang’ udul. I ng’om ma tin ma rac, won bedopwe copo nwang’ere ku peko mi remokum kunoke mi lembe mange. Ecopo nwang’ere kadok ku ragedo ma gavmenti ubenyayu i kume pi yioyic pare. Ento eketho genogen pare iwi Mungu, kum eng’eyo nia Mungu bikonye nivoyo pekone. ‘Nyo ibed ineno ngo nia wang’ ma pol lembe bewotho ber ni jurutic pa Mungu?’ Pirang’o? Pilembe “Yehova jengo dhanu ceke m’upodho man eting’o dhanu ceke m’ugung’ piny.”​—Zab. 41:1-3; 145:14-19.

Anyong’a nego ngo “ng’atu ma pwe” ka jumange gibenwang’iri ku peko. Ento ebedo ku genogen nia “lembe bibedo ber ni ju ma lworo Mungu, [kum] lworo negogi i wang’e.”​—Ekl. 8:11-13; Yob 31:3-6; Zab. 27:5, 6.