Cheqas janiw uka toqet parlkiti. Jan ukasti maynejj kutin kutin kunayman problemanakana, jan walinakan uñjaskasas mayamp saytʼasiskaki uka toqetwa parlaski.

Proverbios 24:16 texto nayrasa, jan ukajj uka texto qhepat kunsa qhanañchi uk uñjañäni. Akham siwa: ‘Jucharar jaqe, jan amtamti cheqap sarnaqer jaqe contra jan wali lurañanaka, janiraki utaparusa jan walinakjja luramti; cheqap sarnaqer jaqejj paqallq kutis tinkchinejja, saytʼasiskakiniwa, ukampis jucharar jaqejj jan waltʼañapanjja qʼalawa aynachtʼani. Kunapachatejj uñisirimajj tinkkani, ukhamarak lanktʼaskani ukkhajja, jan kusisimti’ sasa (Prov. 24:15-17, TNM).

‘Proverbios 24:16 textojja, maynejj juchar purtʼasi, ukampis juchapat arrepentisi, Diosampejj wasitat sum apasjje uka jaqetwa parlaski’ sasaw yaqhepajj amuyapjje. Inglaterra markan religión pʼeqtʼiri pä chachanakajja, akham sapjjänwa: ‘Nayra tiempon Diosat parlirinakasa, jichha tiempon Diosat parlirinakasa, uka textot ukhamwa qhanañchapjjarakïna’ sasa. “Mä suma jaqejj jachʼa juchanakar purtʼaskasasa, Diosarojj munasiskakiwa, janiw aynachtʼkiti, sapa kuti jucha lurasaw arrepentisi” ukwa uka textojj sañ muni sasaw uka pä chachanakajj sapjjarakïna. Ukham amuyañajja, jan wali lurañanakap jan jaytañ muniri jaqetakejj wali askïspawa. ‘Juchar mä akatjamat purtʼasï ukhajja, Diosajj perdonaskitaniwa’ sasaw amuyasispa.

Ukampis Proverbios 24:16 textojj janiw uk sañ munkiti.

Versículos 16, 17 ukanjja, ‘tinkuña’ siski uka arojja hebreo arun waljanakatakiw apnaqasispa. * Cheqpach tinkuñatwa parlaspa, sañäni thakin mä vacajj tinku jan ukajj liwisi, terrasat maynejj jalaqti, jan ukajj mä trigojj oraqer jalaqti ukanakatakiw apnaqasispa (Deut. 22:4, 8; Amós 9:9). Uka arojja, yaqha toqet amuytʼañatakiw apnaqasirakispa. Sañäni akatakiw apnaqasispa: “Tatitojj jaqen sarnaqäwinakap sarayaski, jupar kusisiyir thakiruw ucharaki, lanktasin ukasa, janiw tinkkaniti, Tatituw amparapat wayjjäsiski” sasa (Sal. 37:23, 24; Prov. 11:5; 13:17; 17:20).

Edward H. Plumptre sat profesorajj uka arut akham sänwa: “Hebreo arut ‘tinkuña’ sasin jaqokipatäki uka arojja, janipuniw ‘juchan tinkuña’ toqet parlañatakejj apnaqañäkiti” sasa. Ukatwa uka toqet yatjjatir yaqha chachajja, Proverbios 24:16 textot akham qhanañcharaki: “Diosan markapar tʼaqesiyañajj inamayakïspawa, mayni pachpakiw jan waltʼayasispa, jupanakajj janiw aynachtʼapkiti, ukampis jan wali jaqenakasti aynachtʼapjjewa” sasa.

Ukhamajja, Proverbios 24:16 textojj janiw juchan ‘tinkuñata’ parlkiti, jan ukasti maynejj kunayman problemanakana, jan walinakan kutin kutin uñjaski uka toqetwa parlaski. Aka jan wali pachanjja, cheqap sarnaqer mä jaqejj usuntaspawa jan ukajj yaqha jan walinwa uñjasispa. Diosar servitapatjja, marka apnaqerinakampi jan waltʼayañatak arknaqataw uñjasispa. Ukampis Diosaw uka jan waltʼäwinakar saykatañatakisa jan aynachtʼañatakis yanaptʼani, ukat janiw pächaskiti. Cheqas Diosan servirinakapajj janiw aynachtʼapkapuniti, uk walja kutiw uñjtanjja. ¿Kunatsa? ‘Jehová Diosaw tinkurinakarojj katjjäsiski chʼamañchaskaraki’ (Sal. 41:1-3; 145:14-19).

Ukhamajja, ‘cheqap sarnaqer’ mä jaqejj janiw mayninakar tʼaqesiri uñjasin kusisitäkiti. Jan ukasti, “khitinakatejj Diosar jachʼañchapki, ukhamarak ajjsarapki ukanakajj sumaki jakasipjjatapa” yatisaw wal kusisi (Ecl. 8:11-13; Job 31:3-6; Sal. 27:5, 6).