Хејр, ајәнин мәнасы бу дејил. Бу ајәдә инсанын ард-арда проблемләрлә үзләшмәси вә она дөзмәси нәзәрдә тутулур.

Ҝәлин ајәнин контекстинә бахаг: «Салеһин еви јанында хаинҹәсинә пусгу гурма, онун јурдуну виран гојма. Салеһ једди дәфә јыхылар, јенә галхар, шәр адамы исә мүсибәт бирдәфәлик јыхар. Дүшмәнин јыхыланда севинмә, о бүдрәјәндә үрәјин шадланмасын» (Мәс. 24:15—17).

Бәзиләри һесаб едир ки, 16-ҹы ајә инсанын дөнә-дөнә ҝүнаһ етсә дә, Аллаһын ону бағышламасына аиддир. Ики Британија дин хадими јазыр ки, «һәм гәдимдә, һәм дә мүасир дөврдә ваизләр бу ајәни» мәһз бу ҹүр изаһ едирдиләр. Онларын тәбиринҹә, бу ҹүр изаһ о демәкдир ки, «јахшы инсан... ҹидди ҝүнаһлар ишләсә дә, Аллаһа мәһәббәти ки итмәјиб, һәр дәфә төвбә едәндә, санки јенидән галхыр». Бу ҹүр изаһат ҝүнаһындан әл чәкмәк истәмәјән инсана хош ҝәлә биләр. О елә дүшүнә биләр ки, дәфәләрлә ҝүнаһ ишләсә дә, Аллаһ ону һәмишә бағышлајаҹаг.

Амма 16-ҹы ајәнин әсл мәнасы бу дејил.

16 вә 17-ҹи ајәләрдәки «јыхылмаг» фели ибрани дилиндә мүхтәлиф вәзијјәтләрдә истифадә олуна биләр. Бу сөз һәрфи мәнада ишләнир. Мәсәлән, өкүзүн јолда јыхылмасы, киминсә дамдан јыхылмасы, гүлләләрин јыхылмасы (Ган. 22:4, 8; Әшј. 30:25). Һәмчинин бу сөзүн нөвбәти ајәдәки кими, мәҹази мәнасы да вар: «Мәни зәрблә итәләдиләр ки, јыхылым, амма Јеһова дадыма јетишди» (Зәб. 118:13; Мәс. 11:5, 14; 17:20).

Лакин ҝөрүн профессор Едвард Пламптри нә дејир: «Ибрани дилиндә “јыхылмаг” сөзү һеч вахт ҝүнаһа аид ишләнмәјиб». Буна ҝөрә дә башга бир алим 16-ҹы ајәни белә изаһ едир: «Аллаһын халгы илә пис рәфтар етмәк, мәнасыздыр, бош јерәдир. Чүнки онлар сағ галаҹаг, шәр инсанлар исә јох!»

Бүтүн бунлар ҝөстәрир ки, Мәсәлләр 24:16 ајәсиндәки «јыхылмаг» сөзү инсанын ҝүнаһ ишләмәсинә аид дејил. Бурада инсанын дәфәләрлә чәтинликләрлә үзләшмәсиндән сөһбәт ҝедир. Јашадығымыз бу шәр дүнјада салеһ инсанын сағламлығында проблемләр олур вә ја диҝәр чәтинликләрлә үзләшир. Һәтта о, дөвләт тәрәфиндән амансыз тәгибләрә туш ҝәлир. Лакин о етибар едә биләр ки, Аллаһ она дајаг олаҹаг вә бунлара таб ҝәтирмәјә она көмәк едәҹәк. Дүшүнүн: «Мәҝәр вәзијјәтин Аллаһын хидмәтчиләринин хејринә гуртардығына аз шаһид олмусунуз?» Биз нөвбәти сөзләрә әминик: «Јеһова јыхыланлара дајаг олур, гәдди әјиләнләри ајаға галдырыр» (Зәб. 41:1—3; 145:14—19).

Салеһ инсанын үрәјинә раһатлыг верән башгаларынын башына бәлаларын ҝәлмәси дејил. Әксинә, онун үрәјинә тәсәлли верән одур ки, «Аллаһдан горханлар хејир тапаҹаг, чүнки онлар Аллаһдан горхурлар» (Ваиз 8:11—13; Әјј. 31:3—6; Зәб. 27:5, 6).