Sasittongna, dang i lapatan ni ayat i. Alai maksudna dison sasahalak na mulak-ulak manaon hasusaan alai toktong sabar jala setia.

Parrohahon ma ayat 15-17, “Unang mangonggop ho ale parjahat di inganan ni halak partigor, unang segai hapeahanna. Ai tung sura pe tinggang halak partigor i pola pitu hali, sai hehe do ibana muse, alai anggo halak parjahat i ompas do binahen ni hinamago. Unang martilla ni roha ho, molo tinggang musum, jala unang marolopolop roham molo ompas ibana.”​—Poda 24:15-17.

Adong do na mandok maksud ni ayat 16 on, i ma halak na mulak-ulak mangulahon dosa, dung i bertobat, jala boi ma muse marale-ale dohot Debata. Misalna dua pamimpin agama na sian Inggris mandok, “Songon i do na diajarhon akka parjamita sian najolo sahat tu saonari.” Didok nasida do muse, “Molo adong halak na burju na mulak-ulak mangulahon . . . dosa na balga, boi do toktong dihaholongi Debata ibana, asal ma sai bertobat ibana jala dihaholongi Debata.” Pasti las do roha ni halak na mangulahon dosa mambege ajaran on. Ai didok rohana do, molo tung pe mulak-ulak ibana mangulahon dosa, sai na sesaon ni Debata do dosana i.

Alai dang songon i arti ni ayat 16 on.

Hata Heber ni “tinggang” na adong di ayat 16 dohot 17 on, boi do godang lapatanna. Misalna boi do i dipakke tu sada lombu na tinggang, sasahalak na madabu sian atap, jala batu na dabu. (5 Mus. 22:4, 8; Am. 9:9) Alai boi do tong hata tinggang dison gabe sada gombaran. Misalna, “Jahowa do pahothon langkalangka ni baoa, jala dihalomohon do dalanna i. Tinggang pe ibana, ndada laos sarat, ai ditungkol Jahowa do tanganna”.​—Ps. 37:23, 24; Poda 11:5; 13:17; 17:20.

Jala Professor Edward H. Plumptre pe mandok songon on do, “Hata Heber ni ‘tinggang’ manang madabu dang hea dipakke lao mandok halak na madabu tu dosa.” Sarjana Alkitab na asing mandok, songon on do sasittongna lapatan ni ayat 16 i, “Dang adong gunana mambahen na jahat tu naposo ni Debata. Ai boi do nasida martahan manaon i. Alai anggo halak na jahat, dang boi!”

Jadi lapatan ni ayat 16 on dang halak na mulak-ulak mangulahon dosa, alai halak na mulak-ulak mangadopi hasusaan. Nang pe songon i toktong do ibana sabar manaon i jala setia. Saonari godang do naposo ni Debata na marsitaonon. Olo do alani sahit manang masalah na asing. Adong do muse na dianiaya pamaretta. Alai pos do roha ni nasida, urupan ni Debata do nasida. Ingot ma jo: Adong do naposo ni Debata na diboto hamu marhasil mangadopi godang hasusaan? Boasa boi ibana marhasil? Ala pos do rohana, “Jahowa do situngkol sude angka na naeng tinggang, jala sipahehe sude angka na tungki marroha”.​—Ps. 41:2-4; 145:14-19.

Dang las roha ni “partigor” mangida donganna susa. Alai pos do rohana “martua sogot halak na mangkabiari Debata”, ai dihabiari nasida do Debata.​—Pjm. 8:11-13; Job 31:3-6; Ps. 27:5, 6.