Lang ai na imaksud bani ayat on. Sasintongni ayat on patorangkon pasal sasada halak na bahat sitarononni. Hassi pe margantih soluk parsoalanni, tapi totap do ia martahan.

Ase lambin iarusi hita ayat ai, basa hita ma humbani ayat 15 ronsi ayat 17. Ijai ihatahon, “Ulang ma onggopi . . . rumah ni halak parpintor, ulang ma parseda iananni! Ai pitu hali pe tompas halak parpintor, jongjong do ia use, tapi anggo halak parjahat, targompang do lanjar magou. Ulang ho marsombuh-sombuh, anggo targompang munsuhmu, anjaha ulang megah uhurmu mangidah partompasni.”​—Pod. 24:15-17.

Dong na marpandapot anggo ayat 16 ai mangartihon pasal sasada halak na mangkorjahon dousa tapi ujungni mambahen hamubahon. Umpamani, dong dua pamimpin ugama hun Inggris mangkatahon “humbani na hinan ronsi sonari, ai do homa na iajarhon halak sanggah marambilan”. Nini sidea use “ra do adong halak na bujur na . . . mangkorjahon dousa na banggal, tapi totap do holong uhurni hubani Naibata. Anjaha marusaha do sidea mambahen hamubahon dobkonsi mardousa”. Tontu gabe sonang ma halak na gati mangkorjahon dousa manangar ajaran ai. Ra do sidea marpingkir hassi pe marulak-ulak sidea mangkorjahon dousa, totap do isasap Naibata dousa ni sidea.

Tapi sedo ai na imaksud bani ayat 16 ai.

Bani bahasa Ibrani atap Heber, hata “tompas” atap “targompang” bani ayat 16 pakon 17 bahat do artini ai. Boi do ai mangartihon lombu na targompang i dalan, sada halak na madabuh hun datas ni rumahni, atap omei na porngis da madabuh hu tanoh. (5 Mus. 22:4, 8; Ams. 9:9) Leganni ai, hata ai pe boi do homa igunahon gabe limbaga. Umpamani dong ayat na mangkatahon sonon, “Jahowa do sibobai langkah ni dalahi, anjaha itumpak do dalan ni na hinarosuhkon-Ni. Targompang pe ia, seng lanjar gayap, ai Jahowa do na manungkol tanganni.”​—Ps. 37:23, 24; Pod. 11:5; 13:17; 17:20.

Dong homa Professor Edward H. Plumptre na mangkatahon, “Hata Heber bani hata [“tompas”] ai, lang ongga mangartihon madabuh hubagas dousa.” Halani ai dong sada pakar ni Bibel na patorangkon aha do sasintongni artini ayat ai. Nini do, “Soya-soya do anggo adong na mambahen na jahat hubani juakjuak ni Naibata, halani boi do sidea totap martahan. Tapi anggo halak na jahat lang boi martahan!”

Jadi, hata “tompas” bani Podah 24:16 sedo mangartihon madabuh hubagas dousa. Tapi hata ai mangartihon bahat ni sitaronon na iahapkon hita. I dunia na jahat on, dong do juakjuak ni Naibata na marsitaronon halani borit-boritan, atap pe halani na leganni. Dong do homa na iparburu pamarentah. Tapi porsaya do sidea sai iurupi Jahowa do sidea ase boi totap martahan. Tontu gati do ididah nasiam bahat do juakjuak ni Naibata na totap martahan hassi pe bahat sitarononni. Mase sidea boi martahan? Halani “Jahowa do manatang ganup halak na [laho] jurgang, anjaha ipajongjong do halak na dob ipatunduk”.​—Ps. 41:2-4; 145:14-19.

Sedo gabe malas uhur ni halak “parpintor” sanggah mangidah dong na marsitaronon. Tapi tarapoh do uhurni halani mambotoh “sai na martuah do halak sihabiari Naibata, halani marhabiaran sidea i lobei-Ni.”​—Par. 8:11-13; Job 31:3-6; Ps. 27:5, 6.