Labo bage maksud ayat enda. Situhuna, si imaksud eme kalak si mulih-ulih ngadapi masalah tapi keke ka ia mulihi.

Perdiateken ayat-ayat sope ras kenca ayat e: “Ola bali ras kalak jahat si erpekat ngerampuk kalak bujur dingen ngerampas rumahna. Sabap aminna pe kalak bujur piga-piga kali guling tapi terus ia keke ka mulihi. Tapi kalak jahat kernep me ia erkiteken kena cilaka. Ola megah akapndu kune musuhndu kena cilaka, ola kam ersurak adi guling ia.”​—Kua. 24:15-17.

Lit si ngataken maka ayat 16 maksudna kalak si ndabuh perban ngelakoken dosa, tapi kenca si e keke ka ia mulihi alu ertobat. Itulis dua peminpin agama arah Inggris maka “e me si rusur iajarken pengkhotbah-pengkhotbah,” la soal mbarenda bage pe gundari. Iajarken kalak e maka “kalak si mehuli banci saja . . . ngelakoken dosa si serius tapi banci jadi keleng denga atena Dibata janah ertobat ia tiap ilakokenna dosa.” Penjelasen enda banci erban meriah ukur kalak si lalap ngelakoken dosa. Banci saja iakapna tetap denga nge iampuni Dibata ia aminna pe mulih-ulih ia erdosa.

Labo bage arusna penjelasen man ayat 16.

Kata “guling” bas ayat 16 ras 17 bas bahasa Heber banci lit piga-piga ertina. E banci ertina tuhu-tuhu guling bagi lembu si guling i bas dalan, kalak si guling arah atap nari, ntah pe batu si kitik si guling ku taneh. (Ul. 22:4, 8; Amos 9:9) Kata guling pe banci igunaken jadi gambaren. Contohna, lit ayat si ngataken, “Kalak si ngena ate [Jahwe], ikawali dingen itegu-teguNa geluhna. Guling pe ia la mekelek, sabap [Jahwe] kap si negu tanna.”​—Msm. 37:23, 24; Kua. 11:5; 13:17; 17:20.

Nina Profesor Edward H. Plumptre, “Kata Heber man kata [“guling”] la pernah maksudna ndabuh i bas dosa.” Emaka, sekalak pakar si deban njelasken inti arah ayat 16, nina, “Labo lit ertina ngelakoken si la mehuli man umat Dibata, perban kalak e tetap megenggeng, tapi kalak jahat la bage!”

Emaka, kata “guling” i bas Kuan-kuanen 24:16 labo ertina ngelakoken dosa, tapi guling i jenda ertina ngenanami masalah ntah pe kesusahen janah banci ngayak mulih-ulih. I bas doni si jahat enda, kalak benar banci ngenanami masalah kesehaten, ntah pe masalah si debanna, janah banci saja lalap ia itentang pemerentah. Tapi, tek ia maka pasti ia ipegegehi Dibata janah isampatiNa ia ngadapi kerinana. Cuba ukuri enda, ‘Enggo nge rusur kuidah umat Dibata berhasil ngadapi masalahna?’ Engkai maka kalak e banci berhasil? Pasti perban ‘isampati Dibata kalak e janah iteguNa sanga kalak e guling.’​—Msm. 41:1-3; 145:14-19.

La meriah ukur “kalak bujur” sanga idahna kalak si deban dat masalah. Tapi terpegegehi ia perban itehna maka ‘adi kalak erkemalangen man Dibata, kerina erdalan alu mehuli.’​—Peng. 8:11-13; Jop 31:3-6; Msm. 27:5, 6.