Akchwali, dat da noh weh da vers meen. Wen da vers taak bowt “di raichos persn weh jrap dong,” ih di rifaa tu sombadi weh kip aan di fays prablemz bot ih get op agen; ih noh giv op.

Mek wi luk pahn di vers dehn bifoa an afta Proverbs 24:16. Vers 15 seh: “Noh bee wikid ahn lay-wayt wahn raichos persn da ih hows; noh dischrai di plays weh ih liv.” Vers 16 seh: “Bikaaz eevn if di raichos persn jrap dong sevn taimz, ih wahn get op agen. Bot kalamiti wahn mek di wikid persn stombl.” Ahn vers 17 seh: “Noh bee hapi wen yu enimi jrap dong, ahn noh bee hapi wen ih stombl needa.”—Prov. 24:15-17.

Som peepl tink dat vers 16 di taak bowt wahn persn weh sin bot feel sari fi weh ih du, mek chaynjiz, ahn den ga wahn gud rilayshanship wid Gaad agen. Ahn too rilijos leedaz fahn Britain mi rait dat wahn lata prees, fahn eena di paas an eevn op tu tudeh, eksplayn dis vers da way deh tu. Di rilijos leedaz mi aalso seh dat dis eksplanayshan mi meen dat Gaad mi wahn kantinyu fi bee pleez wid wahn gud persn weh kantinyu fi lov Hihn eevn doa ih mi komit wahn seeryos sin an ih mi ripent. Wahn persn weh noh waahn stap sin mait laik dis eksplanayshan. Ih mait tink tu ihself dat eevn if ih kip aan di komit di saym sin oava ahn oava agen, Gaad wahn aalwayz fergiv ahn.

Bot dat da noh weh vers 16 meen.

Wahn lata wayz deh fi yooz di Heebroo werd weh wi chranslayt az “jrap dong” weh deh eena vers 16 ahn 17. Ih ku ga wahn literal meenin. Eena di Baibl wi fain sohn egzampl: wahn bul jrap dong pahn di road, sombadi jrap dong fahn wahn roof, er wahn stoan jrap dong pahn di grong. (Deut. 22:4, 8; Amos 9:9) Bot da Heebroo werd ku aalso ga wahn difrent meenin. Fi egzampl: “Jehoava gaid di step a wahn man wen Hihn pleez wid di way ih di liv. If ih stombl, ih noh wahn jrap dong, bikaaz Jehoava wahn hoal ahn bai ih han.”—Ps. 37:23, 24; Prov. 11:5; 13:17; 17:20.

Bot noatis weh Profesa Edward H. Plumptre seh: “Di Heebroo werd fi [“jrap dong”] wahn neva meen sin.” Soh wahn nada persn weh stodi Baibl hischri mi eksplayn vers 16 dis way; ih seh: “Ih noh mek sens fi chreet Gaad peepl eena wahn kruwil way, bikaaz dehn wahn aalwayz ga sokses, bot di wikid peepl noh wahn ga sokses!”

Soh wen Proverbs 24:16 taak bowt wahn persn weh “jrap dong,” ih noh di rifaa tu wahn persn weh kip aan di komit wahn sin. Bot ih di rifaa tu wahn persn weh ekspeeryens prablemz er kalamiti, ahn sohntaim eevn oava ahn oava agen. An eena dis wikid werl weh wi liv eena, wahn raichos persn mait haftu fays helt prablemz er ada kaina prablemz. Ahn di govament mait eevn persikyoot ahn sayka ih fayt. Bot wahn raichos persn ku ga ful kanfidens dat Jehoava wahn sopoat ahn, help ahn fi bayr op, ahn help ahn fi ga sokses. Aks yuself, ‘Ai noh si dat tingz yoozhwali werk owt gud fi Gaad peepl?ʼ Wai? Bikaaz wi ga proof dat “Jehoava sopoat aala di wan dehn weh di luk fi jrap dong an ih rayz op evribadi weh di bak wahn hevi berdn.”—Ps. 41:1-3; 145:14-19.

“Di raichos persn” noh hapi bikaaz adaz di ga prablemz. Insted, ih hapi bikaaz ih noa dat tingz “wahn werk owt gud fi di wan dehn weh fyaa di chroo Gaad, bikaaz dehn fyaa hihn.”—Eccl. 8:11-13; Job 31:3-6; Ps. 27:5, 6.