Le linarün katei mama ligía labusenrunbei bérusu le lariñagun. Layanuhaña bérusu le hawagu ha agagibudagubaña luma lénrengunga súnwandan ani awanda hamuti ani iñuragua hagía lídangiñe.

Ariha waméi le lariñagubei bérusu le lubaragiñebei luma le lárigiñebei Ariñawagúni 24:16. Ariñagati: “Maransehabá lagübüri saminaü habá gürigia ha harumabaña, madügün buguyame günringuaü tidan muna to ñein lubéi haganawa, ladüga íbini héiguadun sedü wéiyaasu, hásaarayaba sedü wéiyaasu, ánhaña ha salufuribaña hábürühaba lidan günringuaü. Magundaarabá, mefeduhan buguyame lau léiguadun bágani” (Ari. 24:15-17).

Añahein ariñagutiña layanuhaña lan bérusu 16 luagu aban gürigia le afigouhabei, asaküriha ligía ani gayaraagili lan gamadagua lan luma Bungiu. Ariñagatiña bián tábutigu relihión ingülaterana, “afuranguagüda hamuti lan apurichihatiña lánina binadu dan hama apurichihatiña uguñebaña weyu bérusu le” ítara. Ariñagatiña giñe tábutigu relihión ha, anhein ítaraliña lubéi, “gayara lan léiguadun aban gürigia buiti lidoun aban figóu wéiriti ani maweiyasunbei lan eferidirei línsiñehabu Bungiu, ani gayara lan liñuragun lungua súnwandan anhein asaküriha”. Másiñati hínsiñebei lan laganbún le lun aban gürigia le mabusenrunti láfaagun lun lígiruni figóu, ladüga háfuga samina lan gayara lan lafigouhan súnwandan ani feruduna lubéi lan Bungiu.

Mama le labusenrubei bérusu 16 lariñagun.

Dimurei ebüréu le ásügürawagüdübei kei “éiguada” lidan bérusu 16 luma 17 gayaraati gibe lan lila. Gayaraati aban lan éiguaduni múarugun mini lubéi. Kéiburi, léiguadun aban bulu bágasu lidan üma, léiguadun aban gürigia tábulugugiñe muna o léiguadun aban dübü múarugun (2 Lur. 22:4, 8; Amos. 9:9). Gama lumoun gayaraati mini lan amu katei, kei burí lidan kesi le: “Adundeha lumuti Aburemei héibugun gürigia, ru laña lidoun üma le aubei lagundaara; íbini ánhaña éiguada, meredebaña ítara héiguañu, ladüga ragüñuliani Aburemei háhabu” (Sal. 37:23, 24; Ari. 11:5; 17:20).

Ariñagatu aban líburu to gíriboun Comentario bíblico Beacon, dimurei lan ebüréu le ásügürawagüdübei kei éiguada “mayusurúnti lun layanuhóun luagu leiguadún lidoun figóu”. Ligía lafuranguagüdübalin aban sásaamu bérusu 16 ítara: “Meseriwínti hamuga houserúniwa lumutuniña Bungiu wuriba, lugundun súnwandan hiñuragun houngua, gama lumoun ánhaña wuribatiña ábürühatiña”.

Mama layanuhaña Ariñawagúni 24:16 luagu “leiguadún” lidoun figóu. Layanuhaña bérusu le luagu lagagibudagun aban gürigia luma lénrengunga súnwandan. Lidan lagumuhóun dan wuribati le, másiñati lagagibudaguba lan aban gürigia buiti luma luriban átuadi o luma amu burí lénrengunga, íbini héibaahani gumadimatiña ladüga lafiñen. Ani gayaraati lachoururuni líderagubei lan Bungiu agagibudagua luma lénrengunga luma lun liñuragun lungua lídangiñe lénrengunga. Ma inarüni arihatiwa lan súnwandan lan lasalirun katei buidu houn lubúeingu Bungiu? Kati uagu? Ladüga chóurugüda tumuti Bíbülia woun: “Góunigi lumutiña Aburemei ha éiguadubaña, saragüdalaña ha méreeñabaña” (Sal. 41:1-3; 145:14-19).

Ligíati, magundaaruntiña gürigia ha richaguabaña dan le harihin hasufurirun amu. Lubaragiñe lira gúndaarügütiña lidan hasubudiruni “buidu lan lidin houn ha inebehabubaña lun Bungiu” (Apur. 8:11-13; Hob. 31:3-6; Sal. 27:5, 6).