Sa tinuod lang, dili nâ maoy gipasabot sa teksto. Nagtumong ni sa usa ka tawo nga balikbalik nga nakasinatig mga problema o kalisdanan pero mibangon o nakalahutay.

Tagda ang konteksto niini: “Ayaw pangatang duol sa balay sa tawong matarong tungod sa daotang motibo; ayaw daota ang iyang puy-anan. Kay ang tawong matarong mahimong matumba sa makapito, ug siya mobangon pag-usab, apan ang daotan mapukan pinaagig katalagman. Dihang matumba ang imong kaaway, ayaw pagsadya, ug dihang mapukan siya, dili angayng malipay ang imong kasingkasing.”​—Prov. 24:15-17.

Ang pipila naghunahuna nga ang bersikulo 16 naghisgot sa usa ka tawo nga nakasala pero naghinulsol ug gipasaylo sa Diyos. Pananglitan, ang duha ka British nga lider sa relihiyon misulat nga ang “mga magwawali, kaniadto ug karon, nagpatin-aw sa maong teksto” nianang paagiha. Miingon sab sila nga kini nga eksplinasyon magpasabot nga “posible nga ang usa ka maayong tawo makahimog . . . grabeng mga sala, pero dili gyod mawala ang iyang gugma sa Diyos, ug mabatonan gihapon niya ang pag-uyon sa Diyos kay naghinulsol siya.” Ganahan niini nga ideya ang usa nga dili gustong makigbisog batok sa sala. Maghunahuna tingali siya nga bisag balikbalik siyang makasala, pirme siyang pasayloon sa Diyos.

Pero dili nâ maoy gipasabot sa bersikulo 16.

Ang Hebreohanong pulong nga gihubad ug “matumba” diha sa bersikulo 16 ug 17 mahimong gamiton sa lainlaing paagi. Puwedeng literal ang kahulogan niini​—ang torong baka nalup-og sa dalan, ang usa ka tawo nahulog gikan sa atop, o ang usa ka gamayng bato nahulog sa yuta. (Deut. 22:4, 8; Amos 9:9) Ang maong pulong puwede pong gamiton sa simbolikal nga paagi, sama sa mosunod: “Giyahan ni Jehova ang mga lakang sa usa ka tawo dihang malipay Siya sa dalan niini. Bisan pag matumba siya, dili siya malup-og, kay gunitan siya ni Jehova sa kamot.”​—Sal. 37:23, 24; Prov. 11:5; 13:17; 17:20.

Pero matikdi ang giingon ni Propesor Edward H. Plumptre: “Ang Hebreohanong pulong para sa [“matumba”] wala gyod gamita nga magtumong sa pagpakasala.” Busa ang laing eksperto nagpatin-aw sa bersikulo 16 niining paagiha: “Wâ gyoy pulos kon daogdaogon ang katawhan sa Diyos, kay sila kanunayng molampos pero ang mga daotan dili!”

Busa, kining tanan nagpakita nga ang Proverbio 24:16 wala magtumong sa pagpakasala, kondili sa pag-atubang ug daghang problema o kalisdanan. Niining daotang sistema sa mga butang, ang matarong makasinati tingalig dili maayong panglawas o ubang problema. Basin makaatubang pa gani siyag grabeng paglutos gikan sa gobyerno. Pero makasalig siya nga tabangan siya sa Diyos nga makalahutay ug molampos. Pangutan-a ang kaugalingon, ‘Di ba nakita nako nga sagad maayo ang dangatan sa mga alagad sa Diyos?’ Ngano? Gipasaligan ta nga “sapnayon ni Jehova ang tanang nangatumba ug bangonon ang tanang nangaumod.”​—Sal. 41:1-3; 145:14-19.

“Ang tawong matarong” dili malipay nga ang uban makasinatig mga problema. Pero malipay siya sa pagkahibalo nga “maayo ang dangatan niadtong mga nahadlok sa matuod nga Diyos, kay sila nahadlok kaniya.”​—Eccl. 8:11-13; Job 31:3-6; Sal. 27:5, 6.