Ayi, o vɛrise kɔrɔ t’o ye. Nka a ɲɛsinna mɔgɔ ma min be gwɛlɛyaw wala kɔrɔbɔli sɔrɔ siɲɛ caaman ani a be see sɔrɔ u kan.

An k’a lajɛ min fɔra ka kɔn o vɛrise ɲɛ ani a kɔ. A fɔra ko: “Kana dɛn mɔgɔtilennin ka yɔrɔ la i ko benkannikɛla. Kan’a ka boon ci. Bari, mɔgɔtilennin be ben siɲɛ caaman ka wili. Nga gwɛlɛya tuma na, mɔgɔjugu be ben pepewu. Kana yɛlɛko i jugu benko la. Kana nisɔndiya ko i jugu nagasira.”—Talenw 24:15-17.

Dɔw b’a miiri ko vɛrise 16nan ɲɛsinna mɔgɔ dɔ ma min be jurumu kɛ siɲɛ caaman, nka a be nimisa ani ka segi ka jɛnɲɔgɔnya ɲuman kɛ ni Ala ye. Angletɛri, legilizi kuntigi fila dɔw y’a sɛbɛ ko “galen ani bi, waajulikɛla dɔw b’o vɛrise ɲɛfɔ o cogo la.” U y’a fɔ fana k’o ɲɛfɔli kɔrɔ ko “mɔgɔ ɲuman be se ka jurumuba kɛ, nka Ala bele koo ka di a ye ani a koo ka di Ala ye sabu a be nimisa tuma o tuma.” Mɔgɔ min t’a fɛ k’a jija walisa a kana to ka jurumu kɛ, o miiriya ɲɔgɔn ka di ale ye. A be se k’a miiri ko hali n’ale ye jurumu kɛ siɲɛ caaman, Ala bena yafa ale ma tuma o tuma.

Nka vɛrise 16nan kɔrɔ t’o ye.

Eburukan kumaden min bayɛlɛmana ko “ben” ani “benko” vɛrise 16 ani 17nan kɔnɔ, o be se ka ɲɛsin koo caaman ma. Ɲɛyirali fɛ, misi be se ka ben sira kan, mɔgɔ be se ka bɔ boon sanfɛ ka ben wala sumankisɛ be se ka ben duguma (Deter. 22:4, 8; Amɔsi 9:9). O kumaden be se ka kɛ ni kɔrɔ wɛrɛ ye fana. Ɲɛyirali fɛ, a fɔra ko: “Mɔgɔ min ka kɛwaliw ka di Masaba ye, a b’o tigi taamacogo sabati. N’o tigi benna, a te to yen, bari Masaba b’a dɛmɛna.”—Zab. 37:23, 24; Talenw 17:20.

Profesɛri Edward H. Plumptre y’a fɔ ko: “Eburukan kumaden min bayɛlɛmana ko “ben,” o ma ɲɛsin jurumu koo ma abada.” Bibulu sɛgɛsɛgɛla wɛrɛ ye vɛrise 16nan ɲɛfɔ nin cogo la ko: “Kuun t’a la ka Ala sagokɛlaw tɔɔrɔ sabu u ka koow be ɲɛ tuma bɛɛ. Nka mɔgɔ jugu kɔni ta tɛ ɲɛ abada!”

O koow bɛɛ b’a yira ko Talenw 24:16 ma ɲɛsin jurumu koo ma. Nka a ɲɛsinna gwɛlɛyaw koo lo ma, minw be se ka mɔgɔ sɔrɔ siɲɛ caaman na. Duniɲa juguman nin kɔnɔ, kɛnɛyako wala gwɛlɛya wɛrɛw be se ka mɔgɔ tilennin sɔrɔ. Faamanw yɛrɛ be se k’a kɛlɛ a ka limaniya kosɔn. Nka a ka la a la ko Ala bena barika don a la ani k’a dɛmɛ a ka se k’o koow muɲu. I yɛrɛ ɲininga ko: “Yala n’ m’a ye ko koow ka teli ka ɲɛ Ala sagokɛlaw bolo wa?” Mun na do? Ala ka Kuma b’an hakili sigi ko Jehova be “benbagaw bɛɛ dɛmɛ. Minw jɛngɛna, [a b’olu] tilen.”—Zab. 41:2-4; 145:14-19.

“Mɔgɔtilennin” tɛ ninsɔndiya sabu gwɛlɛya be tɔɔw kan. Nka komi a b’a lɔn ko “minw be siran Ala ɲa, k’olu bena hɛrɛ sɔrɔ u ka Alaɲasiran kosɔn,” o b’a jija.—Waaj. 8:11-13; Zɔbu 31:3-6; Zab. 27:5, 6.