Non. I pito ka palé di roun moun ki ka tonbé, sa lé di ki ka jwenn patché traka é ki ka roulévé, sa lé di ki ka tchenbé.

Annou gadé vèrsé-ya ki anvan ké apré Proverbes 24:16 : « Ké tout to méchansté, pa séré òbò kaz roun moun ki jis pou baré l’ ; pa krazé koté i ka pozé so kò. Paské sa-la ki jis pouvé tonbé sèt fwa, mé i ké roulévé ; mé moun mové-a ké tribiché akoz di malò-a. Lò to lèlmi ka tonbé pa ari é lò i ka tribiché, to tchò pa divèt kontan » (Prov. 24:15-17).

Roun ran moun ka di ki vèrsé 16-a ka palé di roun moun ki ka péché mé ki apré sa ka répanti so kò é ka viré byen ké Bondjé. Dé chèf légliz an Anglétèr di ki « pastèr-ya toujou itilizé sa vèrsé-a » pou di sa. Yé di osi, ki dapré sa èsplikasyon-an, sa té ké lé di ki, « roun moun pouvé [...] fè péché ki grav, mé roulévé chak kou, répanti so kò san i pa janmen pédi so lanmou pou Bondjé * ». Roun moun ki pa lé briga ké péché-a pouvé kontan sa èsplikasyon-an. I pouvé krè ki menm si i ka péché san pran van, Bondjé ké toujou pardonnen l’.

Mé a pa sa vèrsé 16-a lé di.

Mo ébré-a ki lé di « tonbé » annan vèrsé 16 ké 17 pouvé sèrvi pou di tonbé atè kou annan vèrsé-ya ki ka palé di roun béf ki ka tonbé asou larout-a, roun moun ki ka tonbé di laro roun tèt kaz ouben roun ti ròch ki ka tonbé atè (Deut. 22:4, 8 ; Amos 9:9). Sa mo-a pouvé gen osi rounòt sans kou annan Psaume 37:23, 24 : « Lò Jéova ka pran plézi annan chimen roun wonm ka pran, i ka gidé l’. Menm si i ka tribiché [ouben : tonbé], i pa ké lonjé plat atè, paské Jéova ka tchenbé so lanmen » (Prov. 11:5 ; 13:17).

Mé roun profésò yé ka aplé Édward Plumptre ka di : « Yé pa jen ka sèrvi mo ébré-a [“tonbé”] pou di tonbé annan péché-a *. » A pou sa roun èspésyalis Labib-a ka èspliké vèrsé 16-a konsa : « Malmennen sèrvitèr Bondjé-ya pa té ké sèrvi anyen ; paské yé toujou ka ganyen. Parkont méchan-yan toujou ka pédi * ! »

Donk tousa ka montré ki Proverbes 24:16 pa ka palé di sa-la ki ka tonbé annan péché-a mé di sa-la ki ka jwenn problèm, patché problèm menm. Jòdla, moun ki jis-ya pouvé malad ouben gouvèrnman-yan pouvé pèrsékité yé parèkzanp. Mé sa vèrsé-a ka montré ki Jéova ké idé yé tchenbé. Ès to pa wè ki bagaj-ya toujou ka fini byen pou sèrvitèr Bondjé-ya ? Poukisa ? Paské « Jéova ka soutni tout sa ki ka tonbé é i ka drésé tout sa ki kroubé » (Ps. 41:1-3 ; 145:14-19).

Kou vèrsé 17-a ka di, roun moun ki jis pa ka ari lò ròt-ya gen problèm i pito soulajé paské i savé ki « tout bagaj ké byen fini pou sa-ya ki lé obéyi vré Bondjé-a » (Eccl. 8:11-13 ; Job 31:3-6 ; Ps. 27:5, 6).