Ni koauana, tiaki anne ae nanonaki n te kibu aei. Ma e nanonaki iai nakon temanna ae bwaka n arona n okioki n rinanoni kangaanga ke rawawata, ao e a manga teirake man arona ni manga nanomwaaka iai.

Ti na nora te kibu are imwain ao imwin Taeka N Rabakau 24:16: “Tai riki bwa te aomata ae buakaka ae kakaran i rarikini mwengan te aomata ae raoiroi, tai urua ana tabo ni motirawa. Bwa e kona ni bwaka te aomata ae raoiroi itiua te tai ao e na manga teirake, ma a na tatanako n te kabuanibwai aomata aika buakaka. Tai kakatonga ngkana e bwaka ane e kairiribai nakoim, ao e aki riai ni kimwareirei nanom ngkana e tatanako.”​—TaeRab. 24:15-17.

A a tia tabeman n iangoa te kibu 16 anne bwa bon taekan temanna ae kona ni bwaka ibukin karaoan te bure, ma e kona ni manga raira nanona ao ni karekea reitakina ae raoiroi ma te Atua. A koreia uoman mataniwi n te Aro aika kaaini Buritan bwa “a a tia taan uarongorongo ake rimoa ao aika ngkai ni kabwarabwaraa te kibu aei” n te aro anne. A reitia n taekinna naakai bwa te aeka n iango aei e kona n nanonaki iai bwa “e kona te aomata ae raoiroi ni bwaka ibukini . . . karaoani buure aika kakaiaki, ma e na aki kabuaa tangiran te Atua irouna, ao e a manga teirake mani bwakana anne ke n raira nanona ni katoaa te tai are e karaoa iai te bure.” E kona te aeka n iango aei n anaaki iai nanon temanna ae e aki kani buakana te bure. E bae n iangoia bwa e ngae ngkana e okioki ni karaoa te bure, ma e na bon teimatoa te Atua ni kabwaraa ana bure.

Ma tiaki anne ae nanonaki raoi n te kibu 16.

E kona rairan te taeka n Ebera ae “bwaka” ni kibuna 16 ao 17 n nanonaki n aanga aika kakaokoro. E kona n nanonaki iai are ko boni bwaka raoi​—⁠n aron, te kao mwaane ae bwaka i nanon te kawai, temanna ae bwaka mai taubukin te auti, ke te atibu teuana ae bwaka i aontano. (TuaKau. 22:4, 8; Amota 9:9) E kona naba ni kabonganaaki n te aro ae kaokoro, n aron ae oti ikai: “‘E kaira nakonakon te aomata Iehova, ngkana E kukurei ni kawaina. E ngae ngkana e bwaka, ma e na aki tewenakoaki, bwa e boutokaia Iehova n taua baina.”​—TaiAre. 37:23, 24; TaeRab. 11:5; 13:17; 17:20.

E ngae n anne, nora ae e taekinna Professor Edward H. Plumptre: “Te taeka n Ebera ibukini [“bwaka”] e bon aki kabonganaaki n nanonaki iai te bwaka ni karaoan te bure.” Ao ibukin aei, e taekinna te tia rabakau temanna ni kabwarabwaraa n te aro ae kimototo te kibu 16 ni kangai: “Bon akea manenan ae e na karaoaki te mwakuri ae buakaka nakoia ana aomata te Atua ibukina bwa a na bon tokanikai n taai nako, ma a na bon aki naake a buakaka!”

Ngaia are n oneani mwin ae e na nanonaki n Taeka N Rabakau 24:16 te “bwaka” ibukini karaoan te bure, e bon nanonaki iai rinanoan taiani kangaanga ke rawawata n taai aika bati. N te waaki ae ngkai ae buakaka aei, e kona temanna ae raoiroi ni kaaitara ma te aoraki ke kangaanga riki tabeua. E kona naba ni kaaitara ma te bwainikirinaki ae korakora irouia kaain te tautaeka. Ma e boni kona n onimakina raoi ana boutoka te Atua bwa e na buokia n nanomwaaka ao n tokanikai. Titirakiniko ni kangai, ‘Tiaki bwa I a tia n nori bwaai aika buokaki iai ana toro te Atua?’ E aera bwa e riki aei? A karauaki nanora bwa “e boutokaiia akana bwaka ni kabane Iehova ao e kateirakeia akana bobaraaki ni kabane.”​—TaiAre. 41:1-3; 145:14-19.

E aki kukurei “te aomata ae raoiroi” n norakia tabeman aika iai aia kangaanga. Ma e bon karauaki nanona n ataakin ae e “na bon nakoraoi aroia te koraki ake a maaka te Atua ae koaua, ibukina bwa a maakua.”​—TeMin. 8:11-13; Iobi 31:3-6; TaiAre. 27:5, 6.