Na, hem vers oxem sangona. Bodlek, hacho orth ekleak porot-porot trasancho vo somoxiancho fuddo korcho poddtta zalear pasun, to porot ubo ravonk xokta vo tacho fuddo korunk xoktolo mhunn hanga dakhoita.

Hem somzonk bhonvtonnichea versancher dhean dilear kollon ieta: “Eka noxttea mon’xak, promannikachea ghora bhonvtonnim vaitt ieuzunk dinakai, tachea ghoracho ibadd kori nakai. Kiteak, promannik sat pavtti poddllearui utth’tolo; Noxtte, addkhollink adllun, kednach uttona zaunk poddtole. Tuzo dusman khala poddllo mhunnon xeboi ghalinaka, To dhortorer xevttota tedna tujea kallzak dhadoxi zaunk dium-naka.”—Mho. 24:15-17.

Vers 16, oslea eka munxa vixim sangta, zo patok adarlea uprant taka bhogsonnem melltta zalear to Deva sangta ixttagot porot zoddunk pavta mhunn thoddim chintat. England-achea don dhormik fuddareamnim oxem boroilem: “Adlea kalla voilea ani aichea kalla voilea prochar korpeamnim sodanch hea versancho orth osoch dila.” Tea bhair, tea versancho orth te oso mhunn sangtat: “Ek boro munis . . . ek gombhir patok pasun adarunk xokta, punn to Devacho mog kednanch hogddaina. Ani dor ek pavtti to patkant poddtta tednam poschatap korun to voir soronk xokta.” Patok nakarunk sodhina toslea eka munxak hem chintop avoddttolem. To patok korit ravlear pasun, Dev taka bhogxit ravtolo mhunn to chintunk xokta.

Punn vers 16-ant oxem sangonk na.

Vers 16 ani 17-ant ‘poddop’ hem utor uzar kelam. Ani hea utrak uzar kelolea Hebrev utracho orth veg-vegllo asonk xokta. Udharonnak, ek zonvar rostear poddtta, konn tori ghora voir thaun poddtta, vo ek konno vo fator zomnicher poddtta, hem sangonk tem utor uzar korunk zata. (D.S. 22:4, 8; Amos 9:9) Tea bhair, hem utor hea toren pasun uzar korunk zata, zoxem: “Monxachim panvlam Sorvespor rakhta ani mogan tache vatteveleo soglleo addkholli kaddun uddoita. Nisorlear-ui to sokla poddcho na, kiteak Sorvespor tachea hatak ghott dhorta.”—St. 37:23, 24; Mho. 11:5; 13:17; 17:20.

Punn Edward H. Plumptre nanvacho ek professor kitem mhunntta tacher dhean diat: “[“Poddop”] hea utrak uzar kelolea Hebrev utrak, patkam vixim sangonk kednanch uzar korinant.” Tor anik ek zannar vers 16 vixim oxem sangta: “Devachea lokam sangata vaitt toren vagop faideachem nhoi, karonn tankam sodanch ies melltta, punn noxtteank ies mellona!”

Tor hachea voilean kollon ieta, ki Mhonn’nneo 24:16 patkant ‘poddchea’ vixim uloina, punn somosia vo oddchonneo onnbhovchea vixim sangta, jeo ghoddie zaite pavtti ieunk puro. Aichea hea noxttea sonvsarant, eka promannik vo nitivont munxak duens vo her somosia asonk xoktat. Punn Dev tankam modot kortolo, ani tacho fuddo korunk adar ditolo mhunn tannim khatri dovrunk zata. Tumi tumkanch vicharat, ‘Devachea sevokanchea jivitant chodd korun soglem borem cholta tem hanvem pollounk na kai?’ Oxem kiteak zait? Karonn “sokla poddloleank Sorvespor hat dita, zuluman cheploleank to nitt ubim korta” mhunn amkam khatri dil’li asa.—St. 41:1-3; 145:14-19.

Dusreank tras asat tem polloun, eka “promannik” munxak buzvonn mellona. Punn, to “zor Devak bhieta, taka Dev boreo vostu rakhun dovorta” hem zannam zalolean taka buzvonn melltta.—Up. 8:11-13; Job 31:3-6; St. 27:5, 6.