Añetehápe ko versíkulo noñeʼẽi hína upévare. Upéva rangue, heʼise peteĩ persóna hoʼaha ombohovái jey jey rupi umi provléma ha situasión ijetuʼúva, péro upéi opuʼã jey pórke ogueropuʼaka entéro koʼã mbaʼe.

Jahechamína umi mbaʼe heʼíva Proverbios 24:16 mboyve, ha avei upe rire: “Ani reiko repeska pe ihústova róga jerére rejapo hag̃ua ivaíva. Ani rehundi pe lugár haʼe oikoha. Pe ihústova ikatu hoʼa 7 vése, péro opuʼã jeýta. Umi iñañáva katu ou iprovléma ha ja nopuʼãvéima. Ani revyʼa ne enemígo hoʼa vove, ani redisfruta haʼe iprovléma jave” (Prov. 24:15-17).

Oĩ umi hénte heʼíva pe versíkulo 16-pe oñeñeʼẽha peteĩ persóna opekávare, péro upéi oñarrepentíva ha oĩ porã jeýva Ñandejára renondépe. Por ehémplo, mokõi saserdóte Gran Bretañagua heʼi heta predikadór, tahaʼe yma guare térã koʼag̃agua, oexplika hague pe versíkulo péicha. Umi saserdóte heʼi avei oiméramo upéicha, upéva heʼiseha peteĩ kuimbaʼe ivuénova ikatuha opeka vaieterei, péro haʼe oñarrepenti rupi Ñandejára osegitaha ohayhu ha oguerohory chupe. Upéva ikatu ogusta peteĩ persóna ndojejokoséivape ani hag̃ua opeka, pórke haʼe ikatu opensa opeka jey jeýramo jepe Ñandejára siémpre operdonataha chupe.

Péro pe versíkulo 16 ndeʼiséi hína upéva.

Pe palávra hebrea ojetradusíva “hoʼa” versíkulo 16 ha 17-pe, ikatu ojepuru heta hendáicha. Por ehémplo, ojeʼe hag̃ua pe tapépe hoʼa hague peteĩ tóro, oĩramo hoʼáva pe terrása árigui, térã peteĩ itaʼi hoʼáramo yvýpe (Deut. 22:4, 8; Amós 9:9). Péro upe palávra ikatu avei oreko ótro signifikádo, por ehémplo: “Jehová oguerohorýramo peteĩ persóna oiko lája, ogia chupe tape porãre. Oñepysangáramo jepe ndoʼavaimoʼãi, pórke Jehová oñakarama hese ipógui omopuʼã jey hag̃ua chupe” (Sal. 37:23, 24; Is. 21:9; 1 Cor. 10:12).

Péro peteĩ profesór hérava Edward Plumptre heʼi: “Pe palávra hebrea ‘hoʼa’ núnka ndojepurúi oñeñeʼẽ hag̃ua peteĩ persóna hoʼávare pekádope”. Upévare ótro expérto oexplika ko versíkulo kóicha: “Reiete ningo oñemaltratáta Ñandejára puévlope, pórke haʼekuéra siémpre osẽ porãta. Péro umi hénte aña katu nahániri”.

Upéicharõ, koʼã mbaʼe ohechauka Proverbios 24:16-pe noñeñeʼẽiha peteĩ hoʼávare pekádope, síno peteĩ ohasávare heta provléma térã situasión ijetuʼúva, ha ikatu voi ohasa koʼã mbaʼe heta vése. Koʼág̃arupi ko múndo añáme, peteĩ persóna ihústova ikatu hasykatu térã ombohovái ótro provléma. Ikatu voi pe goviérno opersegi mbarete chupe ojerovia rupi. Péro haʼe ikatu oĩ segúro Ñandejára oipytyvõtaha chupe ogueropuʼaka hag̃ua umi provléma, ha osẽ porã hag̃ua. Ñapensamíntena mboy vésemapa Ñandejára siervokuéra osẽ porã. La Biblia oasegura voi ñandéve: “Jehová omopuʼã umi ikangy ha hoʼa potávape. Haʼe omombarete entéro umi nomeʼẽvéimavape” (Sal. 41:1-3; 145:14-19).

Pe ihústova ndovyʼái ótro oreko jave provléma, upéva rangue chupe okonsola oikuaávo ‘amo ipahápe oho porãveha umi orrespetávape Ñandejárape, pórke haʼekuéra omombaʼe chupe’ (Ecl. 8:11-13; Job 31:3-6; Sal. 27:5, 6).